އަހަރުމެން ކުޅުނީ މީހަކަށް މީހަކު ނަގައިގެން: މަރެސްކާ

Read Time:3 Minute, 3 Second

ފީފާ ކުލަބު ވޯލްޑް ކަޕުގައި ރޭ ފްރާންސާއި ޔޫރަޕުގެ ޗެމްޕިއަން ޕީއެސްޖީ ބަލިކުރަން ކުޅުނީ ކިރިޔާ ފުރުސަތެއް ދީފި ނަމަވެސް އެ ޓީމުން ޗެލްސީ މަރާލާނެކަން އެނގިތިބެ ކަމަށް ކޯޗު އެންޒޯ މަރެސްކާ ބުނެފ އެވެ. ފުރަތަމަ ހާފުގެ ތިން ގޯލުން ޗެލްސީ ބަލިކޮށް ތަށި ހޯދި މެޗަށް ފަހު ވާހަކަ ދައްކަމުން އިޓަލީގެ ކޯޗު ބުނީ ހުރިހާ ގޮތަކުން ބެލި ނަމަވެސް ޕީއެސްޖީ އަކީ ޗެލްސީ އަށް ވުރެ މޮޅު ޓީމެއް ކަމަށެވެ. “އެ މީހުން އަހަރުމެން މަރާލާނެ ކިރިޔާ ފުރުސަތެއް ދީފި ނަމަވެސް. ހުސް ޖާގައެއް އެ މީހުންނަށް ނުދީ ވާނެ ހުރިހާ ގޮތެއް އަހަރުމެން ހޯދަން ޖެހުނު. މި ގޮތުން އަހަރުމެން ކުޅުނީ މީހަކަށް މީހަކު ނަގައިގެން. މެޗަށް ތައްޔާރުވިއިރު ޕްލޭނުގައި އޮތީ މުޅިން ވެސް އެ ގޮތަށް. އެއީ އެ މީހުންގެ ފެންވަރަށް ބަލާއިރު އަހަރުމެންނަށް އެ ނޫން ގޮތެއް ނެތުމުން،” ކޯޗު ބުންޏެވެ.

ޗެލްސީއާ ހަވާލުވި ފުރަތަމަ ސީޒަނުގައި އެ ޓީމަށް ޔޫއޭފާ ކޮންފަރެންސް ލީގު ވެސް ކާމިޔާބުކޮށްދިން ކޯޗު ބުނީ މި ގޮތަށް ކުޅުމުން ޕީއެސްޖީގެ ވާތް ފަރާތު ފަހަތުން ޗެލްސީގެ ފޯވަޑް ކޯލް ޕަލްމާ އަށް ޖާގަ ލިބެމުންދިޔަ ކަމަށެވެ. “އޭނާ އަށް ވަރަށް ރަނގަޅަށް އަހަރުމެންނަށް ޖާގަ ހޯދައިދެވުނު އެ ފަރާތުން. އޭނާ އެ ހާ އަވަހަށް ދެ ގޯލު ޖެހީ އެ ހިސާބުން ހުސްވި ޖާގަ ތަކުން. ދެން އޭނާ އެކަންޏެއް ނޫން. މުޅި ޓީމު ގުޅިގެން ކުރި މަސައްކަތުން މި ތަށި މި ލިބުނީ. މިއީ ވަރަށް ބޮޑު އުފަލެއް،” ކޯޗު ބުންޏެވެ.

އޭނާ ބުނީ ފުރަތަމަ ސީޒަނުގައި ދެ ތަށި ލިބުމަކި ވަރަށް ބޮޑު ކާމިޔާބީ އެއް ކަމަށާއި ނަމަވެސް ޗެލްސީ އަކީ ބިނާކުރަމުންދާ ޓީމަކަށް ވުމުން އިނގިރޭސި ޕްރެމިއާ ލީގު ކާމިޔާބު ކުރަން އަދިވެސް ވަގުތު ނަގާނެ ކަމަށެވެ.