Read Time:5 Minute, 30 Second
(ފޮޓޯ ކްރެޑިޓްސް: ވަގުތު)
ޖުވާގެ ނުބައިކަން ވަރަށް ބޮޑު ކަމަށާއި ހަރާމް ގޮތުގައި ހޯދާ އެއްޗެއް ކައިގެން ހަށިގަނޑުގައި އުފެދޭ މަހާއި ލެއަށް ހައްގުކަން ބޮޑީ ނަރަކަ ކަމަށް ހުކުރު ހުތުބާގައި ވިދާޅުވެއްޖެއެވެ. ހުތުބާ ހާއްސަ ކޮށްފައިވަނީ ޖުވާގެ މުއާމަލާތާއި ގުޅޭ ގޮތުންނެވެ. ޖުވާއަކީ ފައިސާ ބަހައްޓައިގެން ބަޔަކު މީހުންގެ މެދުގައި ކުޅެ، މޮޅުވާ މީހާއަށް ނުވަތަ ޓީމަށް އެ އެންމެން ބެހެއްޓި ފައިސާ ނުވަތަ އެއިން ބައެއް ލިބޭ ގޮތަށް ކުޅޭ ކޮންމެ ކުޅިވަރެކެވެ. އެއީ އިސްލާމް ދީނުގައި ހަރާމްކަމެއް ކަމަށް ހުތުބާގައި ވިދާޅުވިއެވެ.
މާތް ﷲ އެ ކަލާނގެ އަޅުތަކުންނަށް ހުއްދަކުރެއްވީ، ހަލާލު ރަނގަޅު ތަކެއްޗާއި އެ ފަދަ އަމަލުތަކެއް ކަމަށާއި ނުބައި އެއްވެސް އެއްޗެއް އަދި އެއްވެސް ޢަމަލެއް އެ ކަލާނގެ ހުއްދައެއްނުކުރައްވާ ކަމަށް ހުތުބާގައި ވިދާޅުވިއެވެ. އާމްދަނީ ހޯދުމަށް ޓަކައި، އިސްލާމީ ޝަރީއަތް ހުއްދަކުރަނީ، ކެހިވެރިކަމެއް، މަކަރުވެރިކަމެއް، އޮޅުވައިލުމެއް ނެތް، ވަކި ފަރާތަކަށް ގެއްލުމެއް ނުލިބޭ، ހާމަކަން ބޮޑު ސާފު މުއާމަލާތުތަކެއް ކަމަށް ވިދާޅުވިއެވެ. “ހަރާމް ގޮތުގައި ހޯދާ އެއްވެސް އެއްޗެއް، ކެއުމަށް ވެސް އަދި އެހެން ކަމަކަށް ވެސް ބޭނުންކުރުން ހުއްދައެއް ނޫން. އެހެނީ އެ ފަދަ އެއްޗެއް ކައިގެން ހަށިގަނޑުގައި އުފެދޭ މަހާއި ލެއަށް ހައްގުކަން ބޮޑީ ނަރަކަ.” ހުތުބާގައި ވިދާޅުވެފައިވެއެވެ.
ޖުވާ ކުޅެގެންނާއި، ދީނުގައި ހަރާމްކުރައްވައިފައިވާ އެއްވެސް ވަސީލަތަކުން ހޯދާ ފައިސާ، ތިމާގެ ނަފުސަށާއި، އަނބިދަރީންނަށް ހޭދަކުރުމުން އެއްކިބާވުމަށް ހުތުބާގައި ގޮވާލާފައިވެއެވެ. އެހެނީ އެ ފައިސާ ދީފައި ގަންނަ ތަކެތި ކެއުމާއި، އެ ފަދަ ފައިސާއިން ހޯދާ ފޭރާންލުމާއި، ގެދޮރު އެޅުމާއި، ދަރީންގެ ތައުލީމާއި ސިއްހަތަށް ހަރަދުކުރުމަކީ، އޭގެ ސަބަބުން އެ މީހަކު ސުވަރުގެއިން މަހްރޫމުވެ، ނަރަކަވަންތަވެރިވެދާނޭ ކަމެއްކަން ހަދީސްތަކުން އެނގޭކަމަށް ވިދާޅުވެފައިވެއެވެ. “ޖުވާގެ ތެރޭގައި، ކާޑު ބޭނުންކޮށްގެން ކުޅޭ ކުޅިވަރާއި، ނަސީބު ނަންބަރު ނެގުމާއި، ކެސިނޯތަކުގައި ކުޅޭ ކުޅިވަރުތަކާއި، އިލެކްޓުރޯނިކު ވަސީލަތެއް ބޭނުންކޮށްގެން ކުޅޭ ކުޅިވަރުތަކާއި، ހަރާދުކިއުން ނުވަތަ ބެޓުކުރުން ހިމެނޭ. މިއިން ކޮންމެ ކުޅިވަރަކީ، ނަތީޖާ ނުކުންނާނޭ ގޮތެއް ނޭނގޭ ކުޅިވަރެއް. ތިބާއަށް އެ ފީނައިގަނެވެނީ ފުންމިން ނޭނގޭ ކަނޑަކަށް.” ހުތުބާގައި ވިދާޅުވެފައިވެއެވެ.
ޖުވާގެ ބާވަތްތައް ހަރާމްވީ، ނުޙައްގުން މީސްތަކުންގެ މުދަލަށް އަރައިގަނެވޭތީ ކަމަށާއި ފައިދާވާ މީހާއަށް އެ ލިބެނީ ހަރާމް މުދަލެއްކަމުގައި ވާތީ ކަމަށް ހުތުބާގައި ވިދާޅުވެފައިވެއެވެ. އަދި އޭނާއާއި އޭނާގެ އަނބިދަރީންނަށް އެ ކާންދެވެނީ ހަރާމްތަކެތިކަމުގައި ވާތީ ކަމަށެވެ. ގެއްލުންވާ މީހުން ބަނގުރޫޓުވާތީ ކަމަށެވެ. ޖުވާކުޅޭ މީހުންގެ މެދުގައި އުފެދޭ އަދާވާތްތެރިކަމުގެ ސަބަބުން ހިނގާ މާރާމާރީތަކުގައި، މުދަލާއި، ގެދޮރާއި، ފުރާނައަށް، ގެއްލުން ލިބޭ ކަމަށާއި މުޅި މުޖުތަމައު ފަސާދަވެ، އޭގެ ގެއްލުން އާންމުވާ ކަމަށް ވެސް ހުތުބާގައިވެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0