Read Time:3 Minute, 53 Second
ފީފާ ކްލަބް ވޯލްޑް ކަޕްގެ ސެމީ ފައިނަލުގެ ޖާގައެއް ސްޕެއިންގެ ރެއާލް މެޑްރިޑް އިން ހޯދައިފި އެވެ. ރެއާލް މެޑްރިޑް އިން މި މުބާރާތުގެ ސެމީ ފައިނަލުގެ ޖާގައެއް ހޯދާފައިވަނީ ކުއާޓަ ފައިނަލުގައި ޖަރުމަނުގެ ބޮރޫޝިޔާ ޑޯޓްމަންޑް އާއި ދެކޮޅަށް ކުޅުނު މެޗު 3-2 ގެ ނަތީޖާއަކުން ކާމިޔާބުކޮށްގެންނެވެ. ނިއު ޔޯކުގެ މެޓްލައިފް ސްޓޭޑިއަމްގައި ހަތްދިހަ ހަ ހާހަށްވުރެ ގިނަ މީޙުންގެ ކުރިމަތީގައި ކުޅުނު މި މެޗުގެ ދިހަވަނަ މިނިޓުގައި ރެއާލް މެޑްރިޑްގެ ގޮންޒާލޯ ގާސިއާ ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ. މިއީ މި މުބާރާތުގައި އޭނާ ޖެހި ހަތަރުވަނަ ލަނޑެވެ.
ދެ ޓީމުގެ ފަރާތުންވެސް ފޯރިގަދަ ކުޅުމެއް ފެނިގެން ގޮސްފައިވާ މި މެޗުގައި ރެއާލް މެޑްރިޑް އިން ޖެހި ދެވަނަ ލަނޑު މެޗުގެ 20 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ ފްރޭން ގާސިއާ އެވެ. މި މެޗުގެ ދެވަނަ ހާފުގައި ބޮރޫޝިޔާ ޑޯޓްމަންޑް އިން ވަނީ އެ ޓީމުގެ ކުޅުން ރަގަޅުކޮށް ރެއާލްގެ ގޯލަށް ނުރައްކާތެރި ހަމަލަތަކެއް ފޮނުވާލާފަ އެވެ. ނަމަވެސް އެ ޓީމަށް ލަނޑެއް ޖެހިފައިވަނީ މެޗުގެ ފުރިހަމަ ވަގުތު ހަމަވެ އިތުރު ވަގުތުގެ ކުޅުމުގެ 2 ވަނަ މިނިޓުގަ އެވެ. މި ލަނޑު ބޮރޫޝިޔާއަށް ކާމިޔާބު ކޮށްދީފައިވަނީ ބަދަލު ކުޅުންތެރިއެއްގެ ގޮތުގައި ކުޅެން އެރި މެކްސިމިލިއަން ބެއިއާ އެވެ. މެޗުގެ ނަތީޖާ ބޮރޫޝިޔާ ޑޯޓްމަންޑް އިން އެއްވަރު ކޮށްފާނެހެން ހީވެފައިވަނިކޮށް އޭގެ ދެ މިނިޓު ފަހުން ރެއާލް މެޑްރިޑްގެ ކިލިއަން އެމްބާޕޭ ވަނީ ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ.
ނަމަވެސް އޭގެ ދެ މިނިޓު ފަހުން ރެއާލް މެޑްރިޑްގެ ޑީން ހުއިސެން ސޭހޫ ގިރެސީއަށް ފައުލް ކުރުމާއި ގުޅިގެން ރެފްރީ ވަނީ އޭނާއަށް ރަތް ކާޑު ދައްކާ ދަނޑުން ފޮނުވާލުމަށްފަހު ބޮރޫޝިޔާއަށް ޕެނަލްޓީ އެއް ދީފަ އެވެ. ބޮރޫޝިޔާ ޑޯޓްމަންޑް އިން މި މެޗުގައި ޖެހި ދެވަނަ ލަނޑު މެޗުގެ ފަހު ވަގުތުގައި ލިބުނު ޕެނަލްޓީއިން އެ ޓީމަށް ކާމިޔާބު ކޮށްދީފައިވަނީ ގިރެސީ އެވެ. މުބާރާތުގެ ސެމީ ފައިނަލުގައި ރެއާލް މެޑްރިޑް އާއި ދެކޮޅަށް ނިކުންނާނީ ޔޫރަޕްގެ ޗެމްޕިއަން ފްރާންސްގެ ޕީއެސްޖީ އެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0