މައިކްރޯސޮފްޓް އިން 9000 ވަޒީފާ މަދުކުރަނީ

Read Time:3 Minute, 16 Second

އޭއައި އަށް ބަރޯސާވުމަށް މައިކްރޯސޮފްޓުން 9000 ވަޒީފާ މަދުކުރަން ނިންމާފައިވާ ކަމަށް އެ ކުންފުނިން ހާމަކޮށްފިއެވެ. ބައެއް ޑިވިޝަންތަކަށް މި ކަމުގެ ސަބަބުން އަސަރު ކުރާނެ ކަމަށް އެ ކުންފުނިން ބުނި ނަމަވެސް، އެއީ ކޮން ޑިވިޝަންތަކެއް ކަމެއް ހާމަކޮށްފައެއް ނުވެ އެވެ. ރިޕޯޓްތައް ބުނާ ގޮތުން އަސަރުކުރާނެ އެއް ޔުނިޓަކީ އެ ކުންފުނީގެ އެކްސްބޮކްސް ވީޑިއޯ ގޭމިން ޔުނިޓެވެ. އާޓިފިޝަލް އިންޓެލިޖެންސް (އޭއައި) އަށް ވުނަކުރުމަށް މައިކްރޮސޮފްޓުން ނިންމާފައިވާ ކަން ހާމަކޮށް، އޭއައި މޮޑެލްތައް ތަމްރީނު ކުރުމަށް ބޮޑެތި ޑޭޓާ ސެންޓަރުތަކަށް 80 ބިލިއަން ޑޮލަރު (68.6 ބިލިއަން ޕައުންޑް) ކަނޑައަޅައިފައި ވާ ކަމަށް އެ ކުންފުނިން ވަނީ ބުނެފައެވެ.

އެ ކުންފުނީގެ މަންދޫބަކު ބީބީސީއަށް މައުލޫމާތު ދެމުން ބުނީ ބަދަލުވަމުން އަންނަ މާކެޓެއްގައި ކާމިޔާބީއަށް ކުންފުނި އެންމެ ފުރިހަމައަށް ތައްޔާރުކުރުމަށް ބޭނުންވާ އޮގަނައިޒޭޝަނަލް ބަދަލުތައް އަދިވެސް ގެންނަމުން އަންނަ ކަމަށެވެ. މި ވަޒީފާއިން ވަކިކުރުމަކީ މައިކްރޮސޮފްޓްގެ ދުނިޔޭގެ އެކި ކަންކޮޅުތަކުގައި މަސައްކަތް ކުރާ 228،000 މުވައްޒަފުންގެ 4 އިންސައްތައެވެ. ބައެއް ވީޑިއޯ ގޭމް ޕްރޮޖެކްޓްތަކަށް އޭގެ އަސަރު ކޮށްފައިވާ ކަމަށް ރިޕޯޓްތައް ބުނެ އެވެ. ދަ ވާޖް އާއި އައިޖީއެން އިން ރިވިއުކުރި އިންޓާނަލް އީމެއިލްގައި ބުނެފައި ވަނީ ފަސްޓް ޕާސަން ޝޫޓާ ސީރީޒް ޕާފެކްޓް ޑާކްގެ ރީބޫޓާއި އެވާވޯލްޑް ފަދަ ގޭމްތައް ކެންސަލް ކުރުމަށް މައިކްރޮސޮފްޓުން އެ ކުންފުނީގެ ގޭމިން ޓީމަށް އަންގާފައި ވާ ކަމަށެވެ.

ޕާފެކްޓް ޑާކް ރީބޫޓްގެ ޒިންމާ އުފުލާ މައިކްރޮސޮފްޓްގެ ހިއްސާ އޮންނަ ސްޓޫޑިއޯއެއް ކަމަށްވާ ދަ އިނީޝިއޭޓިވް ވެސް މިކަމުގެ ސަބަބުން ބަންދުކުރާނެ ކަމަށް މައުލޫމާތު ލިބެއެވެ.