ފްލެޓަކީ ބަޔަކު އާމްދަނީ ހޯދުމަށްދޭ މުދާގަނޑެއް ނޫން: މުއްތަލިބު

Read Time:4 Minute, 36 Second

(ފޮޓޯ ކްރެޑިޓްސް: ރައްޔިތުންގެ މަޖިލިސް)

ސަރުކާރުން ބޯހިޔާވަހިކަމުގެ ގޮތުގައި ދޫކުރާ ފްލެޓްތަކަކީ ކުއްޔަށް ދީގެން އާމްދަނީ ހޯދުމަށް ދޫކުރާ މުދަލެއް ނޫން ކަމަށާއި، މިފަދަ ޢަމަލުތަކަކީ އެއްބަސްވުމާ ހިލާފު ކަންކަން ކަމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. ޢަބްދުﷲ މުއްތަލިބް ވިދާޅުވެއްޖެއެވެ. މިނިސްޓަރު މިހެން ވިދާޅުވީ، ދިވެހިރާއްޖޭގެ އަޑުން ގެނެސްދޭ “އާހާށޭ ބުނާނަން” ޕްރޮގްރާމްގައި އާއްމުންގެ ސުވާލުތަކަށް ޖަވާބު ދެއްވަމުންނެވެ. ވަޒީރު ފާހަގަކުރެއްވި ގޮތުގައި ފްލެޓްތައް ކުއްޔަށް ދީގެން އާމްދަނީ ހޯދުމުގެ މަސައްކަތަކީ ވަރަށް ބޮޑު މައްސަލައެކެވެ. އެކަމަކީ ބޯހިޔާވަހިކަން ނުލިބޭ ފަރާތްތަކުގެ ހައްގަށް އަރައިގަތުން ކަމުގައި ވަނީ ވިދާޅުވެފައެވެ.

“ފުލެޓްތައް ކުއްޔަށް ދީގެން އާމްދަނީ ހޯދުމުގެ މަސައްކަތް ވަރަށް ބޮޑު މައްސަލައެއް ޙަޤީޤަތުގައި. އަޅުގަނޑު ކުރީންވެސް މި ދެންނެވި އެއްވެސް ފަރާތަކަށް މި ދެނީ އެބަޔަކު އާމްދަނީ ހޯދަންދޭ މުދާ ގަނޑެއް ނޫނޭ. އަޅުގަނޑު މި ކުރާ ކަމަކީ ބޯހިޔާވަހިކަމުގެ ދަތިކަން ހުރި ފަރާތްތަކަށް ހެޔޮ އަގުގައި ބޯހިޔާވަހިކަމަށް ފޯރުކޮށްދެނީ،” ޑރ. މުއްތަލިބް ވިދާޅުވިއެވެ.

ވަޒީރު އިތުރަށް ވިދާޅުވީ، ސަރުކާރުން ފޯރުކޮށްދޭ ބޯހިޔާވަހިކަމުގެ ތަންތަން މިސްޔޫސް ކުރުމަކީ، ވެފައި އޮންނަ އެއްބަސްވުމާ ހިލާފު ވުން ކަމަށެވެ. އަދި މިފަދަ ކަންކަމަކީ އެންމެ ރަނގަޅު ކަމެއް ނޫން ކަމަށް މިނިސްޓަރު ފާހަގަކުރެއްވިއެވެ.

މީގެ އިތުރުން، ސަރުކާރުގެ ބޯހިޔާވަހިކަމުގެ މަޝްރޫއުގެ ތެރެއިން ދޫކުރާ ފުލެޓްތައް ކުއްޔަށް ދޫކުރުން ހުއްޓުވުމަށްޓަކައި، ގާނޫނީ ގޮތުން ފިޔަވަޅު އަޅާނެ ކަމުގެ އިންޒާރު ވަޒީރު ވަނީ ދެއްވާފައެވެ. ބޯހިޔާވަހިކަމާއި ބެހޭ ބިލް ފާސްވެގެން ދިޔުމުން މިފަދަ ފަރާތްތަކާ މެދު ފިޔަވަޅު އެޅުން ފަސޭހަވާނެ ކަމަށް މުއްތަލިބު ވިދާޅުވިއެވެ.

“އެކަން ހުއްޓުވުމަށްޓަކައި އަޅުގަނޑުމެން ގާނޫނީ ގޮތުން މިހާރު ގާނޫނު ފާސްވެގެން އަންނައިރު، އިރާދަކުރެއްވިއްޔާ އޭގެތެރޭގައި އޮންނާނެ އެ ފަރާތްތަކާ މެދު ފިޔަވަޅު އެޅޭނެ އުސޫލުތަކާ އެއްޗެހި،” ވަޒީރު ވިދާޅުވިއެވެ.

ކުލި ނުދައްކާ މީހުން ގޮވައިގެން ކޯޓު މަރުހަލާ އަށް ނުގޮސް އަދި މާ ބޮޑު ދަތިތަކެއް ނެތި ކުލި ހޯދުމުގެ ފުރުސަތު ފަހިވާނެ ކަމަށް ވަޒީރު ވިދާޅުވިއެވެ. މިހާރު ދޫކޮށްފައިވާ ޔުނިޓްތައް ދޫކޮށްފައި ހުންނަނީ ސޭލް ޕާޗޭސް އެގްރިމަންޓު އުސޫލުން ކަމަށްވުމާއެކު، ދައުލަތުން ފިޔަވަޅު އެޅުމަށް ދަތިތައް ކުރިމަތިވެއެވެ.