ޙައްޖު 2025: 10ން 4އަކަށް ޙައްޖުވެރިން ފޭލިގެތަކުގައި ތިބުމަށް އިލްތިމާސް ކޮށްފި

Read Time:5 Minute, 49 Second

އަރަފާތު ދުވަހު ސަޢުދީ ޢަރަބިއްޔާގެ ހޫނުމިން އާދަޔާ ޚިލާފަށް މައްޗަށް ދާނެ ކަމަށް ލަފާ ކުރެވޭތީ ޙައްޖުގެ އަޅުކަން އަދާ ކުރަމުންދާ ޙައްޖާޖީން އެ ކަމަށް ސަމާލުވުމަށް އެ ޤައުމުގެ އިދާރާތަކުން ގޮވާލައިފިއެވެ. މައްކާގައި ދުވާލުގެ ވަގުތުގެ ހޫނުމިން 45 ޑިގުރީ ސެލްސިއަސްއަށްވުރެ މައްޗަށް އުފުލޭނެ ކަމަށް މޫސުމާބެހޭ އިދާރާތަކުން ވަނީ ލަފާ ކޮށްފައެވެ. އެއާއެކު ސަޢުދީ ޢަރަބިއްޔާގެ ޞިއްޙީ ވުޒާރާއިން ވަނީ އެއާކޯނު ހަރުކޮށްފައިވާ ފޭލިގެތަކުގައި ހެނދުނު 10ން ހަވީރު 4 ޖަހަންދެން ޙަައްޖުވެރިން މަޑުކޮށްލުމަށް އިރުޝާދު ދީފައައެވެ. އެ ގޮތަށް ޢަމަލު ނުކޮށްފި ނަމަ ފުރާނައަށް ނުރައްކާވާ ފަދަ ހީޓް ސްޓްރޯކެއް ޖެހުން އެކަށީގެންވާ ކަމަށް އެ ވުޒާރާއިން ވަނީ ބުނެފައެވެ.

ފޭލިގޭގައި މަޑުކުރުމަށް އަންގާފައިވާ ވަގުތުގެ ތެރެެއަށް މެންދުރާއި އަޞްރު ނަމާދު ވަގުތު ވަނތް ނަމަވެސް ދެ ނަމާދު ވެސް ފޭލިގެތަކުގައި ކުރުމަށް ޞިއްޙަތާބެހޭ ވުޒާރާއިން ވަނީ އިރުޝާދު ދީފައެވެ. ގަދަ ހޫނަށް ހުށަހެޅޭ ސަރަޙައްދުތައް ކަމަށްވާ މަސްޖިދުއްނަމިރަ އަދި ޖަބަލް ރަޙްމާއަށް، ހޫނު މިން ދަށަށް ނުދަނީސް ދިޔުން މަނާވާނެ ކަމަށް ވެސް އިދާރާތަކުން ވަނީ ބުނެފައެވެ. އޭގެ އިތުރުން، މުޒްދަލިފާއަށް ފައިމަގުގައި ދިޔުން ވެސް އެ ވުޒާރާއިން ވަނީ މަނާ ކޮށްފައެވެ. އޭގެ ބަދަލުގައި އެ ކަމަށް ކަނޑައެޅިފައިވާ ބަސް ނުވަތަ ބާރު ސްޕީޑުގައި ދަތުރުކުރާ ޙަރަމައިން ރޭލު ބޭނުން ކުރުމަށް އެ ވުޒާރާއިން ލަފާދެއެވެ. ޞިއްޙީ ވުޒާރާއިން ބުނީ އެ ވުޒާރާއިން ދީފައިވާ އިރުޝާދުތަކާ އެއްގޮތަށް ޢަމަލު ކުރުމަކީ ކޮންމެހެން މުހިންމު ކަމެއް ކަމަށެެވެ. ގަދަ ހޫނުގައި ކެތްކޮށްލުމަށް ހިޔަލުގައި ތިބުމާއި އެއްތަނުން އަނެއް ތަނަށް ދިޔުން މަދު ކޮށްލުމަކީ ކޮންމެހެން މުހިންމު ކަމެއް ކަމަށާއި، އިރުޝާދާ އެއްގޮތަށް އަމަލު ނުކުރުމުން ފުރާނައަށް ނުރައްކާވުން އެކަށީގެންވާ ކަމަށް ވެސް އެ އިދާރާއިން ފާހަގަ ކޮށްފައިވެއެވެ.

ސަޢުދީ ޢަރަބިއްޔާގެ އިދާރާތަކުން މިހާ ހަރުކަށި އިރުޝާދުތަކެއް ދީފައި މި ވަނީ މީގެ ކުރީގެ ޙައްޖު މޫސުންތަކުގައި ގަދަ ހޫނުގެ ސަބަބުން ހިތާމަވެރި ހާދިޘާތައް ހިނގާފައި ވަނިކޮށެވެ. 2024ވަނަ އަހަރުގެ ޙައްޖުގެ ދުވަސްވަރު ހޫނުމިން 46 ޑިގްރީ ސެލްސިއަސްއަށް އިތުރުވެ، 1500 މީހުންނަށް ވަނީ ގަދަ ހޫނުގެ ސަބަބުން ތަފާތު ޙާލަތްތައް ދިމާވެފައެވެ. މޫސުމާބެހޭ ތަޖުރިބާކާރުން ޤަބޫލު ކުރައްވައި ގޮތުގައި މި އަހަރުގެ ޙައްޖު މޫސުމުގައި ހޫނުމިން އެހާ މައްޗަށް ދާނެ ކަމަށް ބެލެވިފައި ވަނީ ސަރަޙައްދީ ހޫނުގަދަކަން އިތުރުވަުންދާތީއެވެ. އުމުރުން ދުވަސްވީ މީހުންނާއި ދާއިމީ ބަލިތަކަށް ފަރުވާ ކުރަމުންދާ މީހުން ޚާއްޞަ ސަމާލުކަމެއް ދީގެން ރައްކާތެރިކަން ހޯދުމަށާއި ގިނައިން ދިޔާ އެއްޗެެހި ބޭނުން ކޮށް ހޫނުގަދަ ކަން ކުޑަ ކޮށްދޭ އާލާތްތައް ބޭނުން ކުރުމަށް ވެސް ތަޖުރިބާކާރުން ވަނީ އިލްތިމާސް ކޮށްފައެވެ.

މިނާއާއި އަރަފާތު ސަރަޙައްދުގައި ފިނި އަދި ތެތް ވައި ދައުރު ކޮށްދޭ 10،000 ފަންކާ ސަޢުދީ ޢަރަބިއްޔާއިން ވަނީ ބަހައްޓައިފައެވެ. ޞިއްޙީ ޓީމުތަކުން ޙައްޖުވެރިންގެ ޙާލު ގާތުން ބަލަމުންދާނެއެވެ. އަދި ގަދަ ހޫނުގެ ސަބަބުން ބަލިވާ މީހުން ދެނެގަނެ ފަރުވާ ދެމުން ދާނެއެވެ.