ދައުލަތުގެ އާމްދަނީއާއި ހިލޭއެހީ މިދިޔަ 6 އަހަރަށްވުރެ މިއަހަރު އިތުރު

Read Time:4 Minute, 40 Second

މިއަހަރުގެ ފުރަތަމަ 4 މަސްދުވަހު އާމްދަނީއާއި ހިލޭއެހީގެ ގޮތުގައި ދައުލަތަށް 39.8 ބިލިޔަން ރުފިޔާ ލިބިއްޖެއެވެ. މިއީ ފާއިތުވި 6 އަހަރުގެ މި މުއްދަތުގައި ލިބުނު އާމްދަނީއާ އަޅާބަލާއިރު އިތުރު އަދަދެކެވެ. އެމްއެމްއޭއިން އާންމުކޮށްފައިވާ ރިޕޯޓުން ދައްކާގޮތުން މިއަހަރުގެ ފުރަތަމަ 4 މަސްދުވަހު ދައުލަތަށް ލިބުނު ޓެކްސް އާމްދަނީއާއި، ޓެކްސް ނޫން އާމްދަނީ އަދި ހިލޭ އެހީގެ އަދަދުވެސް ވަނީ އިތުރުވެފައެވެ. މިއަހަރުގެ ފުރަތަމަ 4 މަސްދުވަހު އާމްދަނީއާއި ހިލޭއެހީގެ ގޮތުގައި ދައުލަތަށް 39.8 ބިލިޔަން ރުފިޔާވަނީ ލިބިފައެވެ. މިދިޔަ އަހަރުގެ މި މުއްދަތުގައި ލިބިފައިވަނީ 34.1 ބިލިޔަން ރުފިޔާއެވެ. އެހެންކަމުން މިއީ %16.5 އިތުރުވުމެކެވެ.

ފާއިތުވި 6 އަހަރުގެ ފުރަތަމަ 4 މަސްދުވަހު އާމްދަނީއާއި ހިލޭ އެހީގެ ގޮތުގައި ލިބުނު އާމްދަނީ:

• 2019 – 23.2 ބިލިޔަން ރުފިޔާ
• 2020 – 15.2 ބިލިޔަން ރުފިޔާ
• 2021 – 21.3 ބިލިޔަން ރުފިޔާ
• 2022 – 29 ބިލިޔަން ރުފިޔާ
• 2023 – 34.1 ބިލިޔަން ރުފިޔާ
• 2024 – 34.1 ބިލިޔަން ރުފިޔާ

މިއަހަރުގެ ފުރަތަމަ 4 މަސްދުވަހު ދައުލަތަށް ލިބުނު އާމްދަނީ އިތުރުވެފައިވަނީ ޓެކްސް އާމްދަނީގެ ގޮތުގައި ލިބުނު އާމްދަނީ އިތުރުވުމުންނެވެ. ފަތުރުވެރިން އައި އަދަދު އިތުރުވުމާއެކު ފަތުރުވެރިކަމުން ލިބުނު ޓެކްސް އާމްދަނީވެސްވަނީ އިތުރުވެފައެވެ. މިއަހަރުގެ ފުރަތަމަ 4 މަސްދުވަހު ދައުލަތަށް ޓެކްސް އާމްދަނީގެ ގޮތުގައި 29.2 ބިލިޔަން ރުފިޔާ ވަނީ ލިބިފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު %13.8 އިތުރުވުމެކެވެ.

މިއަހަރުގެ މިހާތަނަށް ލިބުނު ޓެކްސް އާމްދަނީގެ ތަފްސީލް:

• ޓީޖީއެސްޓީ – 9.9 ބިލިޔަން ރުފިޔާ
• އިމްޕޯޓް ޑިއުޓީ – 4.6 ބިލިޔަން ރުފިޔާ
• ޖީއެސްޓީ – 5.4 ބިލިޔަން ރުފިޔާ
• އެއަރޕޯޓް ސަރވިސް ޗާޖު – 1.9 ބިލިޔަން ރުފިޔާ
• ބެންކް ޕްރޮފިޓް ޓެކްސް – 732 މިލިޔަން ރުފިޔާ
• ބިޒްނަސް ޕްރޮފިޓް ޓެކްސް – 4 ބިލިޔަން ރުފިޔާ
• ގްރީން ޓެކްސް – 2 ބިލިޔަން ރުފިޔާ
• އިންކަމް ޓެކްސް – 405 މިލިޔަން ރުފިޔާ

ޓެކްސް ނޫން އާމްދަނީގެ ގޮތުގައި މިއަހަރުގެ ފުރަތަމަ 4 މަސްދުވަހު ދައުލަތަށް ލިބިފައިވަނީ 7.9 ބިލިޔަން ރުފިޔާއެވެ. މިދިޔަ އަހަރުގެ މި މުއްދަތުގައި ލިބިފައިވަނީ 6.6 ބިލިޔަން ރުފިޔާއެވެ. އެހެންކަމުން މިއީ %19.8 އިތުރުވުމެކެވެ. މިއަހަރުގެ މިހާތަނަށް ހިލޭ އެހީގެ ގޮތުގައި ދައުލަތަށް 2.6 ބިލިޔަން ރުފިޔާ ވަނީ ލިބިފައެވެ. މިދިޔަ އަހަރުގެ މި މުއްދަތުގައި ލިބިފައިވަނީ 1.5 ބިލިޔަން ރުފިޔާއެވެ. މިއީ %77.1 އިތުރު އަދަދެއްކަމަށް އެމްއެމްއޭގެ މަންތްލީ ސްޓެޓިސްޓިކް ރިޕޯޓުން ދައްކައެވެ.