އދގެ ސަލާމަތީ މަޖިލީހަށް އައު ފަސް މެންބަރުން އިންތިޚާބުކޮށްފި

Read Time:5 Minute, 1 Second

(ފޮޓޯ ކްރެޑިޓްސް: ރޮއިޓާރސް)

އެކުވެރި ދައުލަތްތައް (އދ)ގެ ސަލާމަތީ މަޖިލީހަށް އައު ފަސް މެންބަރުން އިންތިޚާބު ކޮށްފިއެވެ. ޖުމުލަ 15 މެންބަރުންގެ މައްޗަށް އެކުލެވިގެންވާ އެ މަޖިލީހަށް އަލަށް އިންތިޚާބު ކޮށްފައިވާ ޤައުމުތަކަކީ ބަޙްރަޔިން، ކޮލޮމްބިޔާ، ޑިމޮކްރެޓިކް ރިޕަބްލިކް އޮފް ކޮންގޯ، ލެޓްވިޔާ އަދި ލައިބީރިޔާއެވެ. އެއީ، 2026ން 2027އަށް، ދެ އަހަރު ދުވަހުގެ ދައުރަކަށެވެ. އެ ޤައުމުތަކުގެ ދައުރު ފެށޭނީ 2026 ޖަނަވަރީ 1 ގައެވެ. އދގެ ސަލާމަތީ މަޖިލީހަށް އައު ފަސް މެންބަރުން އިންތިޚާބު ކޮށްފައި ވަނީ އދގެ ޢާންމު މަޖިލީހުގައި ނެގި ވޯޓެއްގައެވެ. އެ މަޖިލީހުގައި ހިމެނޭ 15 މެންބަރުންގެ ތެރެެއިން ފަސް މެންބަރުންނަކީ ދާއިމީ މެންބަރުންނެވެ. އެއީ، އިނގިރޭސިވިލާތް، ޗައިނާ، ފަރަންސޭސިވިލާތް، ރަޝިޔާ އަދި އެމެރިކާއެވެ. ބާކީ ތިބި 10 މެންބަރުންނަކީ އިންތިޚާބު ކުރެވޭ މެންބަރުންނެވެ. އެ މަޖިލީހަށް އައު ފަސް މެންބަރުން އިންތިޚާބު ކޮށްފައި މި ވަނީ، އަލްޖީރިޔާ، ސިއެރެ ލިޔޯން، ދެކުނު ކޮރެޔާ، ގަޔާނާ އަދި ސްލޮވީނިޔާގެ ދައުރު ހަމަވާތީއެވެ.

ޤާނޫނީ ބާރުވެރިކަން ލިބިފައިވާ ނިންމުންތައް ނިންމުމުގެ ބާރު އޮންނަނީ އދގެ ސަލާމަތީ މަޖިލީހަށެވެ. ނަމަވެސް، އެ މަޖިލީހުގައި ހިމެނޭ ދާއިމީ ފަސް މެންބަރުންނަކީ، އެހެން ޤައުމުތަކާއި އަޅައިބަލާއިރު ނުފޫޒާއި ބާރުތައް ގިނަ ޤައުމުތަކެކެވެ. އޭގެ ތެރޭގައި މަޖިލީހުގެ ނިންމުންނަށް ވީޓޯ ކުރުން ނުވަތަ ބާޠިލު ކުރުމުގެ ބާރު ހިމެނެއެވެ. ބަޙްރަޔިން، ކޮލޮމްބިޔާ، ކޮންގޯ، ލެޓްވިޔާ އަދި ލައިބީރިޔާ އދގެ ސަލާމަތީ މަޖިލީހަށް އިންތިޚާބު ކޮށްފައި ވަނީ އެއްވެސް ވާދަވެރިކަމަކާ ނުލައެވެ. އދގެ ސަލާމަތީ މަޖިލީހަށް މެންބަރު ޤައުމެއް އިންތިޚާބު ކުރެވޭނީ ޢާންމު މަޖިލީހުގައި ނަގާ ވޯޓެއްގައި، ހުރިހާ މެންބަރުންގެ ތިންބައިކުޅަ ދެބައި ތާޢީދު ލިބުމުންނެވެ.

އިންތިޚާބުގައި އެންމެ ގިނަ ވޯޓު ހޯދާފައި ވަނީ ބަޙްރަޔިނުންނެވެ. އެ ޤައުމަށް 186 މެންބަރުންގެ ތާޢީދު ލިބުނެވެ. ކޮންގޯއަށް ތާޢީދު ކޮށްފައި ވަނީ 183 މެންބަރުންނެވެ. އަދި، އެ މަޖިލީހަށް ލެޓްވިޔާ އިންތިޚާބު ކޮށްފައި ވަނީ 181 މެންބަރުންގެ ތާޢީދާ އެކުގައެވެ. އަދި، ކޮލަމްބިޔާއަށް 180 މެންބަރުންގެ ވޯޓު ލިބިފައިވާއިރު، އެ މަޖިލީހަށް ލެޓްވިޔާ އިންތިޚާބު ކޮށްފައި ވަނީ 178 މެންބަރުންގެ ތާޢީދާ އެކުގައެވެ. ޖޫން 2ވަނަ ދުވަހު ބޭއްވި އިންތިޚާބުގައި އދގެ ޢާންމު މަޖިލީހުން ވަނީ އެ މަޖިލީހުގެ ރައީސް ކަމުގެ މަޤާމަށް ވެސް ބޭފުޅަކު އިންތިޚާބު ކޮށްފައެވެ. އދގެ ޢާންމު މަޖިލީހުގެ 80ވަނަ ސެޝަންގެ ރައީސް ކަމުގެ މަޤާމަށް އިންތިޚާބު ކޮށްފައި ވަނީ ޖަރުމަނުވިލާތުގެ ޚާރިޖީ ވަޒީރު އެނެލިނާ ބެއަރބޮކެވެ. 193 މެންބަރުންގެ މައްޗަށް އެކުލެވިގެންވާ އދގެ ޢާންމު މަޖިލީހުގެ ރިޔާސަތާ އޭނާ ޙަވާލުވެ ވަޑައިގަންނަވާނީ ސެޕްޓެންބަރު މަހުއެވެ.