ޖާހުގެ އެޕާޓްމަންޓުތައް ނިންމަން އާރުސީސީއާ ހަވާލުކޮށްފި

Read Time:4 Minute, 6 Second

(ފޮޓޯ ކްރެޑިޓްސް: މިހާރު)

ޖާހު އިންވެސްޓްމަންޓު ކުންފުނިން ހުޅުމާލޭގައި ހަދަމުން އަންނަ އެޕާޓްމަންޓުތަކުގެ ބާކީ މަސައްކަތްތައް ނިންމަން އެޗްޑީސީން އާރުސީސީއާ މިއަދު ހަވާލުކޮށްފި އެވެ. ހުޅުމާލޭ 1 ގައި ހަދާ “ދަ ގާޑަންސް” ޕްރޮޖެކްޓުގެ ބައިތައް ނިންމަން އާރުސީސީއާ ހަވާލުކުރި ކަމަށް ބުންޏަސް އޭގެ އެއްވެސް ތަފުސީލެއް އެޗްޑީސީން އަދި މީޑިއާއާ ހިއްސާއެއް ނުކުރެ އެވެ. އެހެންވެ، އެޕާޓްމަންޓުތައް ނިންމަން އާރުސީސީއާ ހަވާލުކުރީ ކޮން އުސޫލަކުން ކަމެއް އަދި ކޮން އަގަކަށް ކަމެއް ސާފެއް ނުވެ އެވެ. އެހެންވެ، މަސައްކަތް ނިންމަން އެއްބަސްވެފައިވާ ތާރީހާއި ބާކީ ހުރި މަސައްކަތުގެ ތަފުސީލެއް ވެސް ނޭނގުނެވެ. ޖާހުގެ އެޕާޓްމަންޓުގެ މަސައްކަތްތައް 2017 ވަނަ އަހަރު ފެށީ ދެ އަހަރުގެ ތެރޭގައި ނިންމާ ގޮތަށެވެ. އެކަމަކު، 8 އަހަރު ވެގެން ދާއިރު ވެސް މަސައްކަތް ނުނިމޭތީ، އެ ތަނުން އެޕާޓްމަންޓް ގަތް މީހުން މުޒާހަރާ ވެސް ކުރި އެވެ.

އެހެންވެ، އެ މައްސަލަ ބެލުމަށް ފަހު، ފްލެޓުތައް ނިންމުމަށާއި ބިމުގެ އަގު ދެއްކުމަށް އެޗްޑީސީން ޖާހު އިންވެސްޓްމަންޓަށް 30 ދުވަހުގެ ނޯޓިސްއެއް މީގެ ދެ އަހަރު ކުރިން ފޮނުވި އެވެ. އެކަމަކު، އެ ނޯޓިސް ހަމަވިއިރު އެއްވެސް ކަމެއް ނުވެ އެވެ. އޭގެ ފަހުން އެޕާޓްމަންޓުތައް ނިންމަން 45 ދުވަހުގެ މުއްދަތެއް ދިނެވެ. އެ މުއްދަތުގައި އެ މަސައްކަތްތައް ނުނިމުމުން އެޗްޑީސީން ވަނީ އެންމެ ފަހުން އެއްބަސްވުން ބާތިލްކޮށްފަ އެވެ. އެ ބިމާ އެޗްޑީސީން ހަވާލުވުން ހުއްޓުވައި ދިނުމަށް އެދި ޖާހުން ކޯޓަށް ވެސް ދިޔަ އެވެ. ނަމަވެސް، ކޯޓުން ނިންމީ އެ ފަދަ އަމުރެއް ނުނެރެވޭނެ ކަމަށެވެ.

އެޗްޑީސީން އޮކްޓޯބަރު 2023 ގައި ބުނެފައިވަނީ ޖާހު ކުންފުނީގެ ފްލެޓްތަކުގެ 10 ވަނަ ފްލޯއިން ތިރީގެ ހުރިހާ ފްލޯތަކުގެ ފިނިޝިން މަސައްކަތް ފަށާފައިވާ ކަމަށެވެ. އޭގެ ތެރޭގައި ހިމެނެނީ ޕްލާސްޓަރިން އާއި ޕުޓީގެ މަސައްކަތާއި މުށި އަދި ސީލިންގުގެ މަސައްކަތްތަކެވެ. އެ އިމާރާތުގައި ނުނިމި ހުރި ހުރިހާ މަސައްކަތްތަކެއް ވެސް ހަ މަސް ދުވަހުގެ ތެރޭގައި ނިންމާލެވޭނެ ކަމަށް އެޗްޑީސީން އޭރު ބުނެފައިވެ އެވެ. ޖާހުގެ “ދަ ގާޑަން” ގައި 2+1 އާއި 3 އަދި 3+1 ގެ ޖުމްލަ 83 އެޕާޓްމަންޓް ހުންނާނެ އެވެ. އޭގެ ގިނަ ތަންތަން ވަނީ ވިކި ހުސްވެފަ އެވެ.