Read Time:3 Minute, 30 Second
ބްރެޒިލްގެ ގައުމީ ފުޓްބޯޅަ ޓީމަށް ފޯވަޑް ނޭމާ ސަންޓޯސް ނުނެގުމަކީ އަލަށް ޓީމާ ހަވާލުވި ތަޖުރބާކާރު ކޯޗު ކާލޯ އަންޗެލޯޓީގެ ވަރަށް ރަނގަޅު ނިންމުމެއް ކަމަށް ބްރެޒިލްގެ ތަރި ރިވާލްޑޯ ބުނެފި އެވެ. 2002 ވަނަ އަހަރުގެ ވޯލްޑްކަޕް ބްރެޒިލަށް ކާމިޔާބު ކޮށްދޭން އެންމެ މޮޅަށް ކުޅުނު އެއް ފޯވަޑް ބުނީ ނޭމާ ގައުމީ ޓީމަށް ނެގި ނަމަ އަންޗެލޯޓީ އަށް އެންމެން ފާޑުކިޔާނެ ކަމަށެވެ. “އަންޗެލޯޓީގެ ވަރަށް ރަނގަޅު ނިންމުމެއް އެއީ. ނޭމާ މިވަގުތު ހުރީ ފިޓްކޮށެއް ނޫން. އޭނާ ހުރީ އަނިޔާގައި. އެ އަނިޔާއިން އޭނާ އަރައިގަތުމަށް އޭނާ އެ ދަނީ މަޑުމަޑުން މަސައްކަތް ކުރަމުން. މިވަގުތު އޭނާ ގައުމީ ޓީމަށް ނެގުމަކީ އަހަރެން ދެކޭ ގޮތުގައި ކޯޗަކު ކޮށްގެންވާނެ ކަމެއްނޫން،” ރިވާލްޑޯ ބުންޏެވެ.
ބާސެލޯނާ އާއި އޭސީ މިލާނަށް ވެސް ކުޅުނު ރިވާލްޑޯ ބުނީ ބްރެޒިލް މިވަގުތު ބޭނުންވަނީ މޮޅު ގައުމީ ޓީމެއް އުފައްދަން ކަމަށެވެ. މިހެންވެ ނަމަށް ބަލައިގެން ކުޅުންތެރިން ނެގުމަކީ ރަނގަޅު ގޮތެއް ނޫން ކަމަށެވެ. އަދި ނޭމާ ވެސް ގައުމީ ޓީމަށް އަރަން ވާނީ މުޅިން ފިޓްވެ މޮޅަށް ކުޅޭ ނަމަ ކަމަށެވެ. ބްރެޒިލް ޓީމުން އަންޗެލޯޓީ ޖާގަ ދިން އެންމެ ފާހަގަ ކޮށްލެވޭ އެއް ކުޅުންތެރިއަކީ މިޑްފީލްޑަރު ކަސެމީރޯ އެވެ. އޭނަ އަށް ގައުމީ ޖާޒީން ފުރުސަތު މި ލިބުނީ ގާތްގަނޑަށް ދެ އަހަރެއްހާ ދުވަސް ފަހުންނެވެ. ނަމަވެސް ރިވާލްޑޯ ބުނީ މިއީ ރަނގަޅު ބަދަލެއް ކަމަށެވެ. “އޭނާ އަކީ އަންޗެލޯޓީ ވަރަށް ރަނގަޅަށް ދަންނަ ކުޅުންތެރި އެއް. އަންޗެލޮޓީގެ ކޯޗުކަމުގައި އޭނާ ވަނީ ރެއާލް މެޑްރިޑުގައި މޮޅަށް ކުޅެފައި. އަދި އޭނާގެ ކުލަބު މެންޗެސްޓާގައި ވެސް މިހާރު ދަނީ ރަނގަޅު ކުޅުމެއް ދައްކަމުން. އެ ފަދަ ތަޖުރިބާކާރު ކުޅުންތެރިން ޓީމުގައި ތިބެންވާނެ،” ރިވާލްޑޯ ބުންޏެވެ.
އޭނާ ބުނީ އަންޗެލޯޓީ އަކީ ތަޖުރިބާކާރެއް ކަމަށާއި މިހެންވެ ފާޑު ނުކިޔައި އޭނާ އަށް ބްރެޒިލް ޓީމާއެކު މަސައްކަތް ކުރަން ވަގުތު ދޭން ޖެހޭނެ ކަމަށެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0