އިތުބާރު ހޯދަން ސިންގަޕޫރު މެޗު ކާމިޔާބުކުރަން ޖެހޭ: ސުޒެއިން

Read Time:5 Minute, 15 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ރާއްޖޭގެ ގައުމީ ފުޓްބޯޅަ ޓީމުގެ ހުރީހާ ފޯކަހެއް އޮތީ ޓިމޯ ލެސްޓޭ މެޗަށް ކަމަށާއި، އެ މެޗުން ނަތިޖާއެއް ހޯދަން އިތުބާރު ގާއިމުކުރަން ސިންގަޕޫރު މެޗު ކާމިޔާބުކުރަން ޖެހޭ ކަމަށް ޓީމުގެ ކޯޗު އަލީ ސުޒެއިން ބުނެފިއެވެ. ގައުމީ ޓީމުން އެންމެ އަވަހަށް ކުޅޭ ބައިނަލްއަގުވާމީ މެޗަކީ ޖޫން މަހުގެ ފަސްވަނަ ދުވަހު ސިންގަޕޫރާއެކު ކުޅޭ އެކުވެރިކަމުގެ މެޗެވެ. އެއަށްފަހު ގައުމީ ޓީމުން ކުޅޭނީ އޭއެފްސީ އޭޝިއަން ކަޕް ކޮލިފައިންގައި ޓިމޯ ލެސްޓޭއާ ދެކޮޅަށެވެ. އެ މެޗު އޮންނާނީ ޖޫން މަހުގެ 10 ގައި އޮސްޓްރޭލިއާގައެވެ.

މި ދެ މެޗާ ގުޅޭގޮތުން “ޕީއެސްއެމް ނިއުސް” އިން ގެނެސްދިން “ކުޅިވަރު ވިންދު” ގެ ޚާއްސަ ޕްރޮގްރާމުގައި ވާހަކަދައްކަމުން ސުޒެއިން ބުނީ ސިންގަޕޫރު މެޗު ބޭނުން ހިފާނީ ޓިމޯ ލެސްޓޭ މެޗަށް ތައްޔާރުވުމަށް ކަމަށެވެ. އަލަށް ގައުމީ ޓީމާ ގުޅުނު ކުޅުންތެރިންނާއި ކުރިން ތިބި ކުޅުންތެރިންނާ އެކު އެންމެ ފަހުން ކުޅުނު ލީގު ކަޕުގެ ސަބަބުން ހުރިހާ ކުޅުންތެރިންގެ ވެސް ފިޓްނަސް ރަނގަޅުވާނެ ކަމަށް އުންމީދުކުރާ ކަމަށް ސުޒެއިން ބުންޏެވެ. “ދެން އަނެއްކާވެސް އަޅުގަނޑަށް މިއޮތީ ޖާދުލެއް ހަދަން ޖެހިފަ ބަރާބަރު ތިން ޕްރެކްޓިސް އަށް ފަހު ދެ މެޗު ކުޅެން ޖިހަފަ މިއޮތީ” ސުޒެއިން ބުންޏެވެ.

ސުޒެއިން ބުނީ މަދު ފަރިތަކުރުންތަކަކަށް ފަހު މެޗާ ކުރި މަތިލާން ޖެހުނު ކަމުގައި ވިޔަސް އެއްވެސް ހާސްކަމެއް ނެތް ކަމަށާއި ކުޅުންތެރިން ޤައުމީ ޓީމާ ގުޅުނީ ވަރަށް ރަނގަޅު ތަމްރީން ތަކަކަށް ފަހު ކަމަށެވެ. އެހެން ކަމުން މެޗަށް ތައްޔާރުވާން ކުރިއަށްގެންދާ ފަރިތަކުރުންތައް ރަނގަޅަށް ގޮސްފިކަމަށް ވާނަމަ އެއީ އޭނާއަށް ލިބިގެންދާނެ ލުޔެއް ކަމަށެވެ. ޓިމޯ ލެސްޓޭގެ މެޗު އޮސްޓްރޭލިޔާގެ ޑާވިންގައި ކުޅޭއިރު އެއީ ރާއްޖެއާ މޫސުމާ އެއްގޮތް ތަނެއް ކަމަށާއި އެހެން ނޫނަސް ދިވެހި ޓީމުން މިހާރު މެޗުތަކަށް ތައްޔާރުވާއުރު މޫސުމުގެ ވާހަކަ އެއީ ދައްކަން ބޭނުންވާ ވާހަކައެއް ނޫން ކަމަށް ވެސް ސުޒެއިން ފާހަގަކުރިއެވެ.

“ކޮންމެ ގޮތެއް ވިޔަސް އޮތް މާހައުލެއްގަ އޮތް ގޮތަކަށް ކުޅެން ތައްޔާރުވާން ޖެހޭނީ، އެހެންވީމަ އެގޮތައް ބަލާއިރު ޑާވިންގެ މޫސުން ހޫނުމިން ރާއްޖެއާ އެއްގޮތަކަށް ކަމަށް މި ބަލަނީ އޮންނާނީ.” ސުޒެއިން ބުންޏެވެ. ސުޒެއިން އިތުރަށް ބުނީ ޓީމަށް ނަގަން ބޭނުންވި ކުޅުންތެރިންގެ ތެރެއިން ޓީސީގެ އަހުމަދު މާއިޝް ރަޝީދު މާއީއަށް ޖާގަ ނުދެވުނީ އަނިޔާގެ ސަބަބުން ކަމަށާއި، މާއީ އަކީ ނިމުނު އެފްއޭއެމް ލީގު ކަޕުގައި އެންމެ މަސައްކަތު ރޭޓް މަތީގައި ހުރި ކުޅުންތެރިންގެ ތެރޭގަ ހިމެނޭ ކުޅުންތެރިއެއް ކަމަށެެވެ. މީގެއިތުރުން މި ފަހަރު ޓީމުގައި އަމިއްލަ ސަބަބުތަކާހުރެ ޓީމުގައި ބައިވެރިނުވާ ދެ ކުޅުންތެރިޔަކުވެސް ހިމެނޭ ކަމަށެވެ.

އެފްއޭއެމް ލީގުކަޕުން މި ދެމެޗަށް ބޭނުންވާ ޓީމު ލިބުނު ކަން ސުޒެއިންގެ ވާހަކައިގައި ވަނީ ފާހަގަކޮއްފައެވެ.