ގައުމީ ޓީމަށް އެރުމަކީ ހަވާލުވާ ބޮޑު ޒިންމާއެއް: ސުޒެއިން

Read Time:7 Minute, 22 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ކުރިއަށް އޮތް ދެ މެޗަށް ގައުމީ ފުޓްބޯޅަ ޓީމު އެކުލަވާލިއިރު ޓީމަށް ނެގި ކުޅުންތެރިންނަށް ލިބިގެންދާނީ ހަމައެކަނި ޝަރަފެއް ނޫން ކަމަށާއި، އެއީ ހަވާލުވާ ބޮޑު ގައުމީ ޒިންމާއެއް ކަމަށް ޓީމުގެ ކޯޗު އަލީ ސުޒެއިން ބުނެފިއެވެ. ގައުމީ ޓީމުން އެންމެ އަވަހަށް ކުޅޭ ބައިނަލްއަގުވާމީ މެޗަކީ ޖޫން މަހުގެ ފަސްވަނަ ދުވަހު ސިންގަޕޫރާއެކު ކުޅޭ އެކުވެރިކަމުގެ މެޗެވެ. އެއަށްފަހު ގައުމީ ޓީމުން ކުޅޭނީ އޭއެފްސީ އޭޝިއަން ކަޕް ކޮލިފައިންގައި ޓިމޯ ލެސްޓޭއާ ދެކޮޅަށެވެ. އެ މެޗު އޮންނާނީ ޖޫން މަހުގެ 10 ގައި އޮސްޓްރޭލިއާގައެވެ. މި ދެ މެޗާ ގުޅޭގޮތުން “ޕީއެސްއެމް ނިއުސް” އިން ގެނެސްދިން “ކުޅިވަރު ވިންދު” ގެ ޚާއްސަ ޕްރޮގްރާމުގައި ވާހަކަދައްކަމުން ސުޒެއިން ބުނީ ކުޅުންތެރިން އެ ޒިންމާ އަދާކުރުމުން ލިބިގެންދާ އުފަލާއި ޝަރަފު ޚާއްސަވެގެންދާނެ ކަމަށެވެ.

ސުޒެއިން ބުނީ ގައުމީ ޓީމު އިއުލާންކުރުމާއެކު ޓީމަށް ކުޅުންތެރިން ހޮވިގަތާމެދު ފާޑުކިޔުން މަދުވެގެން ދިޔައީ ގިނަބަޔަކު ގަބޫލުކުރާ ގޮތުގައި އެކަން ރަނގަޅަށް ކުރުމުން ކަމަށެވެ. އެހެން ނަމަވެސް ޓީމަށް ނެގި ބައެއް ކުޅުންތެރިންނަށް މިވަގުތު އާއިލީ ސަބަބަތަކާއި، އަނިޔާހުރެ ޓީމާ ގުޅޭގޮތް ނުވުމުން ބައެއް ބަދަލުތައް ގެންނަން ޖެހުނު ކަމަށެވެ. “އަޅުގަނޑުމެން މިދައްކަނީ ލީގު ކަޕުގައި ކުޅުނު ބައެއް ކުޅުންތެރިންގެ ވާހަކަ، ދެން ބައެއް ބޭފުޅުންގެ ސުވާލެއް، ލީގު ކަޕުގެ ނުކުޅޭ ކުޅުންތެރިން ގައުމީ ޓީމުގައި ހިމެނިފަ ހުރީ، އެއީ އެކުޅުންތެރިޔާ ގައުމީ ޓީމުގައި ހިމެނޭނެ ރަނގަޅު ރީޒަން ހުރީމަ ހިމެނިފަ އެވަނީ.” ސުޒެއިން ބުންޏެވެ. ގައުމީ ޓީމަށް ކުޅުންތެރިން ހޮވުމުގައި އެންމެ ބޮޑަށް ބެލީ އެންމެ ފަހުން ގައުމީ ޓީމަށް ކުޅުނު ކުޅުންތެރިންގެ މަގާމުތަކަށް ނިމިގެންދިޔަ ލީގު ކަޕުގައި އެ ފެންވަރު ދެއްކި ބައެއް ކުޅުންތެރިންނަށް ފުރުސަތު ދިނުމަށް ކަމަށެވެ.

“މިސާލަކަށް ރިޒޭއަށް ލީގުކަޕުގަ ކުޅެލަން ނުލިބުން އެއީ ރިޒޭގެ މައްސަލައެއް ނޫން، ރިޒޭ އަކީ ގައުމީ ޓީމަށް ހުރިހާ އިރެއްގަވެސް އަރާނެ ކުޅުންތެރިޔެއްކަން ކުޅެން ލިބުނު ހުރިހާ ފުރުސަތެއްގެ ހުންނީ ސާބިތުކޮށްދީފައި.” ސުޒެއިން ބުންޏެވެ. މިފަހަރު އަލަށް ގައުމީ ޓީމާ ގުޅުނު ކުޅުންތެރިންނަށް މަރުހަބާ ކިޔަމުން ސުޒެއިން ބުނީ ކުޅުންތެރިންގެ ފަރާތުން އެނގުނު ގޮތުގައި މިއީ އެކުޅުންތެރިން އަބަދުމެ ދެކޭ ހުވެފަނެއް ކަމަށާއި، އެހެން ކަމުން ކުރިއަތް އޮތް ދުވަސްތަކުގައި އެ ކުޅުންތެރިންގެ ހިތްވަރާއި މަސައްކަތް ފެންނާނެ ކަމަށެވެ. ސުޒެއިން ބުނީ ގައުމީ ޓީމުގެ ތައްޔާރީތަކާ މެދު ހިތްހަމަޖެހޭ ކަމަށާއި، ޓީމު ފުރާނީ މި ވަގުތު ތިބި އެންމެ ރަނގަޅު ކުޅުންތެރިންނާއެކު ކަމަށެވެ. ދާދިފަހުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބޭއްވި ލީގު ކަޕުގެ ސަބަބުން ގައުމީ ޓީމަށް ވަރަށް ބޮޑު ފައިދާއެއް ވެގެންދާނެ ކަމަށް ސުޒެއިން ވަނީ ބުނެފައެވެ. މިއީ މި ދަނޑިވަޅުގައި ސަރުކާރުން ފުޓްބޯޅައަށް ކޮށްދިން ވަރަށް މުހިންމު ކަމެއް ގޮތުގައި ސުޒެއިން ވަނީ ފާހަގަކޮށްފައެވެ.

“ހަގީގަތުގައި ކުޅުންތެރިންނަށް ވަރަށް ރަނގަޅު ފުރުސަތެއް މި ލިބުނީ، ފަސް މެޗު ކުޅެ، ގައުމީ ޓީމަށް މީގެ ސަބަބުން ބޮޑެތި ފައިދާތަކެއް ކުރާނެ، ފިޓްނަސްގެ ވާހަކަޔާއި، މިހުރިހާ ވާހަކަތަކެއް ދައްކާ އިރު އެންމެ މުހިންމު އެއްޗަކަށް ހުރިހާ ބޭފުޅުން ވެސް ފާހަގަކުރާ އެއްޗެއް މެޗު ފިޓްނަސް.” ސުޒެއިން ބުންޏެވެ. އެފްއޭއެމްއިން ކުރު މުބާރާތެއް ބޭއްވުމުގެ ސަބަބުން ކުޅުންތެރިންގެ މެޗު ފިޓްނަސްކަންތައް ހައްލުކުރެވި، އެކަމުގައި ކާމިޔާބު ހޯދިއްޖެ ކަމަށް ސުޒެއިން ވަނީ ބުނެފައެވެ. އަންނަ މަހު 10 ވަނަ ދުވަހު، ރާއްޖެއާ ދެކޮޅަށް ޓިމޯ ލެސްޓޭއިން ކުޅެން އޮތް މެޗު އެންމެ ފުރަތަމަ ތާވަލުކުރެވޭތީ މަސައްކަތްކުރީ ތައިލެންޑުގައި ކުޅުމަށެވެ. އެކަމަކު އެ ނިންމުން ކޮޅެއްގައި ނުޖެހި، އެންމެ ފަހުން އޮސްޓްރޭލިއާގައި ކުޅޭ ގޮތަށް ޓިމޯ ލެސްޓޭއިން ނިންމީއެވެ. ޓިމޯ ލެސްޓޭއިން ރާއްޖެއާ ދެކޮޅަށް ނުކުންނަ މެޗު އޮތީ، އޮސްޓްރޭލިއާގެ ޑާވިންގެ ޓެރިޓަރީ ރަގްބީ ލީގު ސްޓޭޑިއަމްގައެވެ.