Read Time:6 Minute, 28 Second
(ފޮޓޯ ކްރެޑިޓްސް: ޕީއެސްއެމް ނިއުސް)
ދިވެހީންގެ އުފެއްދުންތެރިކަމުގެ މައުރަޒު 2025 އަކީ މިހާތަނަށް ރާއްޖޭގައި ބޭއްވި މައުރަޒުތަކުގެ ތެރެއިން އެންމެ ބޮޑު އަދި އާންމުންގެ ފަރާތުން އެންމެ ތަރުޙީބު ލިބުނު މައުރަޒެވެ. މި މައުރަޒުގައި ތަފާތު ގިނަ ހަރަކާތްތަކެއް ދަނީ ކުރިއަށް ގެންދަމުންނެވެ. ދިވެހީންގެ ޒަމާނީ މަސައްކަތްތެރިކަމާއި، ޒަމާންވީ ފަންނުވެރިކަން ހިމެނޭހެން ދިވެހިރާއްޖޭގެ ހުރިހާ ކަންކޮޅުތަކެއްގެ ފަންނުވެރިންގެ ހުނަރުވެރި އުފެއްދުންތައް އެއް ތަނަކުން ދައްކުވައިދޭ މި މައުރަޒުގައި ކޮންމެ ރެއަކުވެސް ޚާއްސަ ޝޯވްތަކެއް ދަނީ ކުރިއަށްގެންދަމުންނެވެ. އެގޮތުން މި މައުރަޒުގެ ތެރެއިން ބޮޑުބެރު ޗެލެންޖެއް ކުރިއަށްގެންގޮސްފައިވާއިރު މި ޗެލެޖުންގެ ބޭނުމަކީ ރާއްޖޭގެ ތާރީޚާއި ސަގާފަތުގެ މުއްސަނދިކަން ދައްކުވައިދީ، ބޮޑުބެރުގެ ވާދަވެރިކަމުގެ ތެރެއިން ދާއިރާއަށް އައު ތަރިން ނެރުންކަމަށް އިޤްތިސާދީ ވުޒާރާއިން ވިދާޅުވެއެވެ.
ރާއްޖޭގެ އުފެއްދުންތެރިކަން އިތުރުކުރުމަށާއި، ވިޔަފާރި ފުޅާކުރުމުގެ މަޤްސަދުގައި ސަރުކާރުން ބާއްވާ މި މައުރަޒުގެ ހުރިހާކަމެއް ކުރިއަށްގެންދަވަނީ އިޤްތިސާދީ ތަރައްޤީއާއި ވިޔަފާރިއާ ބެހޭ ވުޒާރާގެ އިރުޝާދުގެ ދަށުން ބިޒްނަސް ސެންޓަރ ކޯރޕަރޭޝަން، ބީސީސީއިންނެވެ.
(ފޮޓޯ ކްރެޑިޓްސް: ޕީޢެސްއެމް ނިއުސް)
ދިވެހީންގެ ހުނަރުވެރިކަމާއި ފަންނުވެރިކަމާއި، އުފެއްދުންތެރިކަން ދައްކުވައިދޭ ގިނަ ހަރަކާތްތަކެއް އެއް މައުރަޒެއްގެ ތެރެއިން ފެނިގެންދާ އުފެއްދުންތެރިކަމުގެ މައުރަޒުގައި މާކެޓް ޕްލޭސް އެއްވެސް ވަނީ ޤާއިމްކޮށްފައެވެ. އެގޮތުން ކާބޯތަކެތީގެ އެކި ރަހަތައް މިމައުރަޒުގެ ތެރޭގައި ތަޖުރިބާކޮށްލުމުގެ ފުރުސަތު ލިބިގެންދެއެވެ. ރާއްޖޭގެ އުފެއްދުންތެރިކަން އިތުރުކުރުމަށާއި ވިޔަފާރި ފުޅާކުރުމުގެ މަޤްސަދުގައި ސަރުކާރުން ބާއްވާ މި މައުރަޒަށް ކޮންމެ ދުވަހަކުވެސް އެތައް ބަޔަކު ޒިޔާރަތްކުރެއެވެ. އޭގެތެރޭގައި ދޭސީންގެ އިތުރުން ގިނަ އަދަދެއްގެ ބިދޭސީންވެސް ދިވެހީންގެ އުފެއްދުންތައް ބައްލަވާލެއްވުމަށް މައުރަޒަށް ޒިޔާރަތް ކުރައްވާކަން ފާހަގަކޮށްލެވެއެވެ.
(ފޮޓޯ ކްރެޑިޓްސް: ޕީއެސްއެމް)
އިހުގެ ދިވެހީންގެ ހުރި އުފެއްދުންތެރިކަމާއި ހުނަރުވެރިކަން މިއަދުވެސް ފެންނަންހުރި މި މައުރަޒުން ކްރިއެޓިވް އިކޮނޮމީ ޑިސްޓްރިކްޓް، ޑިޖިޓަލް އެންޑް އިނޮވޭޓިވް ޑިސްޓްރިކްޓް، އެންޓަރޓެއިންމަންޓް ޑިސްޓްރިކްޓް އަދި މާރކެޓް ޕްލޭސް ޑިސްޓްރިކްޓް ހިމެނޭއިރު މިއިން ކޮންމެ ޑިސްޓްރިކްޓަކީ އެ ދާއިރާއަކާ ގުޅޭ އެކި ޙަރަކާތްތައް ހިމަނައިގެން ވިޔަފާރިތަކުގެ ބައިވެރިވުމާއެކު ކުރިއަށްގެންދާ ޑިސްޓްރިކްޓް ތަކެކެވެ. 9 ދުވަހުގެ މުއްތައް ކުރިއަށްދާ މައުރަޒުގައި 14 ކެޓެގަރީއަކުންނާއި 82 ސަބް ގިންތިއަކުން، ރާއްޖޭގެ އެކި ކަންކޮޅުތަކުން ޖުމްލަ 383 ފަރާތަކުން ވަނީ ބައިވެރިވެފައެވެ. އަދި 3600އަަށްވުރެ ގިނަ އުފެއްދުންތައް މި މައުރަޒުގައި ބައިވެރިކޮށްފައިވާއިރު، އެންމެ ގިނައިން ބައިވެރިކޮށްފައިވަނީ އަތްތެރި މަސައްކަތުގެ ދާއިރާއިންކަން ބީސީސީން ފާހަގަކުރައްވައެވެ.
(ފޮޓޯ ކްރެޑިޓްސް: ޕީއެސްއެމް)
އަންނަ އަހަރަކީ ޤައުމީ އުފެއްދުންތެރިކަމުގެ އަހަރެއްގެ ގޮތުގައި ކަނޑައެޅުއްވުމަށް، މަސައްކަތް ކުރައްވަމުންދާ ކަމަށް ރައީސުލް ޖުމްހޫރިއްޔާ ޑރ.މުޙައްމަދު މުޢިއްޒު ވަނީ ވިދާޅުވެފައެވެ. އަދި އެންމެން ގުޅިގެން ޤައުމަށާއި ވަކިވަކި ފަރުދުންނަށް ކުރިއެރުން ހޯދުމަށް މަސައްކަތް ކުރައްވާނެ ކަމަށްވެސް ރައީސް ވިދާޅުވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0