ފައިނަލަށް ނުކުންނާނީ ތަޖުރިބާގެ އަލީގައި: އެންރީކޭ

Read Time:3 Minute, 50 Second

ޔުއެފާ ޗެމްޕިއަންސް ލީގުގެ ފައިނަލްގައި މިރޭ އިޓަލީގެ އިންޓަރ މިލާނާ ދެކޮޅަށް ނުކުންނާނީ ތަޖުރިބާގެ އަލީގައި ކަމަށާއި، މި މުބާރާތް ކާމިޔާބުކުރެވޭނެކަމުގެ އުއްމީދު ބޮޑު ކަމަށް ޕީއެސްޖީގެ ކޯޗު ލުއިސް އެންރީކޭ ބުނެފިއެވެ. ޖަރުމަނުގެ ވެރިރަށް މިއުނިކްގައި މިރޭ ރާއްޖެ ގަޑިން 12 ޖަހާއިރު ފެށުމަށް ހަމަޖެހިފައިވާ މި މެޗަށް ޕީއެސްޖީ ތައްޔާރުވަމުންދާއިރު ލުއިސް އެންރީކޭގެ އިރުޝާދުގެ ދަށުން އެ ޓީމުން ވަނީ ފާއިތުވެދިޔަ ދެ އަހަރު ރަގަޅު ނަތީޖާތަކެއް ހޯދާފަ އެވެ. އަދި ޒުވާން ކުޅުންތެރިންނާއިއެކު އެ ޓީމުން މިހާރު ހޯދަމުންދާ ނަތީޖާތަކާއިއެކު މި މުބާރާތުގެ ތަށި ހޯދޭނެކަމުގެ ޔަގީންކަން ބޮޑުކަމަށްވެސް އެންރީކޭ ވަނީ ބުނެފަ އެވެ.

“އަހަރެންގެ އެންމެ ބޮޑު އުންމީދަކީ ޕީއެސްޖީ އާއިއެކު ތާރީހީ ކާމިޔާބީއެއް ހޯދުން. އެއީ ފުރަތަމަ ފަހަރަށް އެ ކްލަބަށް ޗެމްޕިއަންސް ލީގު ކާމިޔާބުކޮށްދިނުން. އެންމެ ފުރަތަމަ ދުވަހުން ފެށިގެން މިއަދާއި ހަމައަށްވެސް އަހަރެންގެ އުންމީދަކީ މި މުބާރާތް ކާމިޔާބު ކުރުން.” ބާސެލޯނާއަށް ކުރިން ކޯޗު ކޮށްދިން އެންރީކޭ ބުންޏެވެ. އެންރީކޭ އިތުރަށް ބުނެފައިވަނީ އިދިކޮޅަށް ނިކުންނަ އިޓަލީގެ އިންޓަރ މިލާނަކީ ހުރިހާ ގޮތަކުންވެސް ވަރުގަދަ ޓީމެއް ކަމަށާއި އެ ޓީމާއި ދެކޮޅަށް ކުޅޭ މެޗުތަކަކީ ފަސޭހަ މެޗުތަކެއް ނޫން ކަމަށެވެ. އަދި މި ދަނޑަކީ ޕީއެސްޖީއަށް އައު ދަނޑެއް ނޫން ކަމަށާއި އެހެންކަމުން މި މެޗުގައި ކަންކުރަންވީ ގޮތް ކުޅުންތެރިންނަށް ވަރަށް ރަގަޅަށް ކިޔައިދީފައިވާ ކަމަށެވެ.

“އިޓަލީގެ ޓީމު ތަކަކީ ފަސޭހަ ޓީމުތަކެއް ނޫން އަދި މި ސީޒަނުގައި އެ ޓީމުން ވަނީ ތަފާތު ދައްކާފަ. ނަމަވެސް ޕީއެސްޖީގައި މިހާރު އޮތް ސްކޮޑަށް އަހަރެންގެ ފުރިހަމަ އިތުބާރު އެބައޮތް އަދި މި ދަނޑަކީ އަހަރުމެންނަށް އައު ދަނޑެއް ނޫން.” އެންރީކޭ ބުންޏެވެ. އޭނާ އިތުރަށް ބުނެފައިވަނީ މި މެޗަށް ނިކުންނައިރު މީގެ ކުރިން ޗެމްޕިއަންސް ލީގުގެ ފައިނަލުން ބަލިވެފައިވާއިރު އެ ހަނދާންތައް ޕީއެސްޖީގައި އެބަހުރި ކަމަށާއި މި މެޗަށް ނިކުންނާނީ އެ ތަޖުރިބާތަކުން އިބްރަތް ލިބިގެން ކަމަށެވެ.