Read Time:4 Minute, 47 Second
(ފޮޓޯ ކްރެޑިޓްސް: ރޮއިޓާރސް)
އީރާނުގެ ނިއުކްލިޔަރ މަޝްރޫޢުއާ ގުޅޭގޮތުން އެ ޤައުމާއި އެމެރިކާއާ ދެމެދު ކުރިއަށްދާ މަޝްވަރާތަކުން އެއްބަސްވުމަކާ ހަމައަށް ދެވިއްޖެނަމަ، އެޓޮމިކް ހަކަތައާ ބެހޭ ބައިނަލްއަޤުވާމީ އިދާރާ (އައިއޭއީއޭ)އިން ފޮނުވާ އެމެރިކާއަށް ނިސްބަތްވާ މޮނިޓަރުން އައުމުގެ ފުރުޞަތު ދެވިދާނެކަމަށް އީރާނުގެ ނިއުކްލިޔަރ ޕްރޮގްރާމުގެ ވެރިޔާ މުޙައްމަދު އިސްލާމީ ވިދާޅުވެއްޖެއެވެ. ޢުމާން މެދުވެރިވެ އެމެރިކާއާއި އީރާނާ ދެމެދު ކުރެވޭ މަޝްވަރާތަކުގެ ހަވަނަ ބުރެއް ބާއްވަން ތައްޔާރުވަމުންދާއިރު، އެ މަޝްވަރާތަކުން “ރަނގަޅު ޚަބަރެއް” ނެރެވޭނެކަމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ ލަފާކުރައްވައިފައެވެ.
“”ޢަދާވާތްތެރި ޤައުމުތަކަށް ނިސްބަތްވާ މޮނިޓަރުން އައުމުގެ ޙުއްދަ ނުދިނުމަކީ އާންމު ކަމެއް. ނަމަވެސް، ނިއުކްލިޔަރ އެއްބަސްވުމަކަށް ދެވިއްޖެނަމަ، އިންޓަނޭޝަނަލް އެޓޮމިކް އެނާޖީ އެޖެންސީގައި މަސައްކަތްކުރާ އެމެރިކާގެ މޮނިޓަރުންނަށް އަޅުގަނޑުމެންގެ ނިއުކްލިޔަރ ސައިޓްތަކަށް ޒިޔާރަތް ކުރުމުގެ ހުއްދަ ދެވިދާނެ،” އީރާނުގެ ވެރިރަށް ތެހެރާނުގައި ބޭއްވި ނޫސްވެރިންގެ ބައްދަލުވުމެއްގައި އިސްލާމީ ވިދާޅުވިއެވެ. އެމެރިކާގެ އިތުރުން ހުޅަނގާއި ޔަހޫދީން ޤަބޫލު ކުރާ ގޮތުގައި، އީރާނުން ހިންގަމުންދާ ނިއުކްލިޔަރ ޕުރޮގުރާމުގެ މައިގަނޑު މަޤުޞަދަކީ ނިއުކްލިޔަރ ހަތިޔާރެއް އުފެއްދުމެވެ. އެއީ، ޔަހޫދީންނަށް އޮތް ބޮޑު ނުރައްކަލެއްގެ ގޮތުގައި ޓްރަމްޕް ދެކެވަޑައިގަންނަވައެވެ. އަދި، ކޮންމެ ގޮތަކުން ވިޔަސް، ނިއުކްލިޔަރ ބާރަކަށް ވުމުގެ ފުރުޞަތުން އީރާން މަޙްރޫމު ކުރުވުމަކީ ޓްރަމްްޕްގެ މައިގަނޑު އަމާޒެވެ.
އަދި ޔުރޭނިއަމް މުއްސަނދި ކުރުމުގެ ވިސްނުން ދޫކޮށްނުލައިފިނަމަ، އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށި ކުރާނެކަމުގެ އިންޒާރު ޓްރަމްޕް ވަނީ ތަކުރާރުކޮށް ދެއްވައިފައެވެ. ނިއުލްލިކަރ ހަތިޔާރެއް އުފެއްދުމަށް ނޫނަސް، މަދަނީ ބޭނުމަށް އެކަނި ވެސް ޔުރޭނިއަމް މުއްސަނދި ކުރަމުން ދިޔުމަށް އީރާނުން ބޭނުންވާއިރު މިއީ އެމެރިކާއިން އެދޭ ގޮތެއް ނޫނެވެ. ޔުރޭނިއަމް މުއްސަނދި ކުރުން ހުއްޓާލުމަށް އެމެރިކާއިން ޝަރުތުކުރާއިރު، އެ ޝަރުތައް އެއްބަސް ނުވެވޭނެ ކަމަށް އީރާނުން ދަނީ ބުނަމުންނެވެ. އިޓަލީވިލާތުގެ ރޯމްގައި ބޭއްވި މި މަޝްވަރާތަކުގެ ފަސް ބަނަ ބުރު މިހާރު ނިންމާލާފައިވާއިރު، މަޝްވަރާތަކުގައި ކުރިއެރުންތަކެއް ލިބިފައިވީނަމަވެސް، އެއްބަސްވުމަކާ ހަމައަށް ދިޔުމަށް ވަރަށް ގިނަ މަސައްކަތް ކުރަންހުރި ކަމަށް ދެ ފަރާތުން ވެސް ވަނީ ބުނެފައެވެ.
Happy
0 %
Sad
0 %
Excited
0 %
Sleepy
100 %
Angry
0 %
Surprise
0 %
0
0