އީރާނާ އެކު ކުރަމުންދާ މަޝްވަރާތަކަށް ޓްރަމްޕްގެ ތާރީފު

Read Time:6 Minute, 45 Second

(ފޮޓޯ ކްރެޑިޓްސް: ރޮއިޓާރސް)

އީރާނުގެ ނިއުކްލިޔަރ ޕުރޮގުރާމާ ގުޅޭ ގޮތުން އެމެރިކާއާ އެކު ކުރަމުންދާ މަޝްވަރާތަކުގައި ކުރިއެރުންތަކެއް ލިބެމުންދާ ކަން ހާމަކުރައްވައި، ރައީސް ޑޮނަލްޑް ޓްރަމްޕް އެ މަޝްވަރާތަކަށް ތާރީފު ކުރައްވައިފިއެވެ. ޓްރަމްޕްގެ އިސްނެންގެވުމަށް އެމެރިކާއިން އީރާނާ އެކު ކުރަމުންދާ މަޝްވަރާތަކުގެ މައިގަނޑު މަޤުޞަދަކީ އީރާނުގެ ނިއުކްލިޔަރ ޕުރޮގުރާމަށް ނުފޫޒު ފޯރުވައި، އެ ޕުރޮގުރާމު ކޮންޓުރޯލު ކުރުމެވެ. ހުސްވި ހަފުތާ ބަންދުގެ ތެރޭގައި ދެ ޤައުމުގެ އޮފިޝަލުން ވަނީ މަޝްވަރާތަކުގެ އިތުރު ބައްދަލުވުންތަކެއް ބާއްވާފައެވެ. އެ ބައްދަލުވުންތަކަށް އިޝާރާތް ކުރައްވައި ވާހަކަފުޅު ދައްކަވަމުން ޓްރަމްޕް ވިދާޅުވީ، ދެ ޤައުމުގެ އޮފިޝަލުންގެ މެދުގައި “ރަނގަޅު” މަޝްވަރާތަކެއް ކުރެވިގެން ގޮސްފައިވާ ކަމުގައެވެ.

“އީރާނާ ގުޅޭ ކަމުގައި ރަނގަޅު ޚަބަރުތަކެއް ލިބިގެން ގޮސްދާނެ ކަމަށް އަޅުގަނޑަށް ޤަބޫލު ކުރެވޭ،” ނިއު ޖަރޒީގެ މޮރިސްޓައުންގައި ނޫސްވެރިންނާ ބައްދަލު ކުރައްވައި ވާހަކަފުޅު ދައްކަވަމުން ޓްރަމްޕް ވިދާޅުވިއެވެ. އޭނާ ވިދާޅުވީ، މަޝްވަރާތަކުގައި ބޮޑެތި ކުރިއެރުންތަކެއް ލިބެމުންދާ ކަމުގައެވެ. ނަމަވެސް، އިޓަލީވިލާތުގެ ވެރިރަށް ރޯމްގައި އެންމެ ފަހުން ބޭއްވި މަޝްވަރާތަކުގެ އިތުރު ތަފުސީލު އޭނާ ހާމަކުރައްވާފައެއް ނެތެވެ. އީރާނާ އެކު ކުރަމުންދާ މަޝްވަރާތަކުގައި އެމެރިކާ ތަމްސީލު ކުރައްވަނީ ޓްރަމްޕްގެ ޚާއްޞަ މަންދޫބު ސްޓީވް ވިޓްކޮފެވެ. “ކުރިއަށް އޮތް ދެ ދުވަހުގެ ތެރޭގައި ތިޔަ ބޭފުޅުންނަށް ރަނގަޅު ނުވަތަ ނުރަނގަޅު ޚަބަރެއް ދެވޭނެއެކޭ ދަންނަވަން މި ވަގުތު ނޭނގޭ، ނަމަވެސް އަޅުގަނޑަށް ޤަބޫލު ކުރެވެނީ ރަނގަޅު ޚަބަރެއް ދެވޭނެއޭ،” ޓްރަމްޕް ވިދާޅުވިއެވެ.

އެމެރިކާއަކީ ޔަހޫދީންގެ އެންމެ ބޮޑު މަދަދުގާރެވެ. މެދުއިރުމަތީގެ މުސްލިމް ޤައުމުތަކާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޖަރީމާތަކުގައި ބޭނުން ކުރަމުންދާ ނުރައްކާތެރި އަދި ފަނާކުރަނިވި ހަތިޔާރު އެމެރިކާއިން ޔަހޫދީންނަށް ފޯރުކޮށްދެމުން ދަނީ ޓްރަމްޕްގެ އަމުރަށެވެ. މެދުއިރުމަތީގެ މައި ބާރެއްގެ ގޮތުގައި ބެލެވޭ އީރާނަކީ ޔަހޫދީންގެ ސަލާމަތާއި ރައްކާތެރިކަމާއި، ޒަޔަނިސްޓު އިސްރާއީލުގެ ދެމިއޮތުމަށް އޮތް ބޮޑު ނުރައްކަލެއްގެ ގޮތުގައި ޓްރަމްޕް ދެކެވަޑައިގަންނަވައެވެ. އެމެރިކާގެ އިތުރުން ހުޅަނގާއި ޔަހޫދީން ޤަބޫލު ކުރާ ގޮތުގައި، އީރާނުން ހިންގަމުންދާ ނިއުކްލިޔަރ ޕުރޮގުރާމުގެ މައިގަނޑު މަޤުޞަދަކީ ނިއުކްލިޔަރ ހަތިޔާރެއް އުފެއްދުމެވެ. އެއީ، ޔަހޫދީންނަށް އޮތް ބޮޑު ނުރައްކަލެއްގެ ގޮތުގައި ޓްރަމްޕް ދެކެވަޑައިގަންނަވައެވެ. އަދި، ކޮންމެ ގޮތަކުން ވިޔަސް، ނިއުކްލިޔަރ ބާރަކަށް ވުމުގެ ފުރުޞަތުން އީރާން މަޙްރޫމު ކުރުވުމަކީ ޓްރަމްްޕްގެ މައިގަނޑު އަމާޒެވެ. ނިއުކްލިޔަރ ހަތިޔާރެއް އުފެއްދުމަށް މަސައްކަތް ކުރަމުންދާ ކަމުގައި އެމެރިކާއާއި ޔަހޫދީން ތުހުމަތު ކުރި ނަމަވެސް، އީރާނުން ދަނީ އެ ތުހުމަތު ދޮގު ކުރަމުންނެވެ.

އީރާނުގެ ނިއުކްލިޔަރ ޕުރޮގުރާމު ކޮންޓުރޯލު ކުރުމަށް އެމެރިކާއާއި ހުޅަނގުގެ ބާރުތަކާ ދެމެދު 2015ވަނަ އަހަރު ވެސް އެއްބަސްވުމެއް އެކުލަވައިލިއެވެ. އަދި، އެ އެއްބަސްވުމުގެ ދަށުން ހުޅަނގުގެ ބާރުތަކުން ވަނީ އީރާނާ ދެކޮޅަށް އަޅާފައިވާ ދަތި ކުރުމުގެ ހަރުކަށި ފިޔަވަޅުތަކަށް ލުއި ދީފައެވެ. 2018ވަނަ އަހަރު އެ އެއްބަސްވުން އުވައިލާފައި ވަނީ ޓްރަމްޕްގެ ރައީސް ކަމުގެ ފުރަތަމަ ދައުރުގައެވެ. ޖަނަވަރީ 20ވަނަ ދުވަހު އެމެރިކާގެ ރައީސް ކަމުގެ މަޤާމާ އަލުން ޙަވާލުވެ ވަޑައިގަނެންނެވުމަށް ފަހު ޓްރަމްޕް ވަނީ އީރާނާ ދެކޮޅަށް އިތުރު ފިޔަވަޅުތަކެއް އަޅުއްވައި، ދަތި ކުރުމުގެ ފިޔަވަޅުތައް އިތުރަށް ހަރުކަށި ކުރައްވާފައެވެ.