(ފޮޓޯ ކްރެޑިޓްސް: ރޮއިޓާރސް)
ސޫރިޔާގައި ވެރިކަން ކުރާ ނިރުބަވެރި ޖަމާޢަތް، ހަޔިއަތު ތަޙްރީރް އަލް-ޝާމް (އެޗްޓީއެސް) ސަރުކާރުގެ ރައީސް އަޙްމަދު އަލް-ޝަރާޢާ ތުރުކީވިލާތުގެ ރައީސް ރަޖަބް ޠައްޔިބް އުރްދުޣާން ބައްދަލު ކުރައްވައިފިއެވެ. ތުރުކީވިލާތުގެ ވިޔަފާރީގެ މަރުކަޒީ ރަށް، އިސްތަންބޫލުގައި ބޭއްވި ބައްދަލުު ކުރެއްވުމުގައި އުރްދުޣާން ވަނީ، ސޫރިޔާއާ ދެކޮޅަށް އެމެރިކާއާއި ވިލާތުގެ އިއްތިޙާދު (އީޔޫ)ގެ މެންބަރު ޤައުމުތަކުން އަޅާފައިވާ ދަތި ކުރުމުގެ ހަރުކަށި ފިޔަވަޅުތައް އުވައިލާފައިވާ ކަން ފާހަގަ ކުރައްވައި، ޝަރާޢަށް މަރުޙަބާ ދަންނަވާފައެވެ. އެމެރިކާއިން ސޫރިޔާއާ ދެކޮޅަށް އަޅާފައި އޮތް ދަތި ކުރުމުގެ ފިޔަވަޅުތައް 14 އަހަރަށް ފަހު ބާޠިލު ކޮށްފައިވާ ކަން އިޢުލާނު ކޮށްފައި ވަނީ ރައީސް ޑޮނަލްޑް ޓްރަމްޕް ގަލްފުގެ ތިން ޤައުމަކަށް ހުސްވި ހަފުތާގައި ކުރެއްވި ދަތުރުފުޅެއްގެ ތެރެއިންނެވެ. އެމެރިކާގެ ގިނަ ފިޔަވަޅުތައް އަޅާފައި ވަނީ ސޫރިޔާގެ ކުރީގެ ރައީސް ބައްޝާރް އަލް-އަސަދުގެ ވެރިކަމުގެ ތެރެއިން ފެށި އަހުލީހަނގުރާމައާ ގުޅިގެންނެވެ. އެޗްޓީއެސުން ބަޣާވާތެއްކޮށް އަސަދުގެ ސަރުކާރު ވައްޓައިލާފައި ވަނީ 2024ވަނަ އަހަރުގެ ޑިސެންބަރު މަހުގެ 8ވަނަ ދުވަހުއެވެ.
ޝަރާޢު ކުއްލި ދަތުރެއްގައި ތުރުކީވިލާތަށް ގޮސްފައި މި ވަނީ، ޓްރަމްޕްގެ އަމުރަށް ސޫރިޔާއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތައް އުވައިލާފައިވާ ކަން އެ ޤައުމުގެ މާލީ ވުޒާރާއިން އިޢުލާނު ކޮށްފައިވާ ދަނޑިވަޅެއްގައެވެ. “އަޅުގަނޑުމެންގެ ރައީސް [އުރްދުޢާން] ވަނީ، [ސޫރިޔާއާ ދެކޮޅަށް އަޅާފައިވާ] ދަތި ކުރުމުގެ ފިޔަވަޅުތައް އުވައިލުމުން ޝަރާޢަށް މަރުޙަބާ ދަންނަވާފައި،” އުރްދުޣާންގެ އޮފީހުން ނެރުނު ބަޔާނެއްގައި ބުންޏެވެ. އަސަދުގެ ވެރިކަން އެޗްޓީއެސުން ވައްޓައިލުމަށް ފަހު ޝަރާޢުގެ ބެލުމުގެ ދަށުން ޤާއިމު ކޮށްފައިވާ ސަރުކާރާ އެންމެ ގާތް ގުޅުންތަކެއް ބާއްވަމުންދާ ކަމަށް ފެންނަނީ ތުރުކީވިލާތުންނެވެ. އަސަދުގެ ވެރިކަން ނިމުމަކަށް ގެނައުމުގައި ތުރުކީވިލާތުގެ ސަރުކާރުން ވާގިވެރިކަން ފޯރުކޮށްދޭ ހަތިޔާރު އެޅި ޖަމާޢަތްތަކުން ބައިވެރިވެފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ. ފަސް ދަހަރަށް ފަހު އަސަދުގެ ޢާއިލީ ވެރިކަން ނިމުމަކަށް ގެނައުމުން އޭނާ ވަނީ ފިއްލަވައިގެން ރަޝިޔާއަށް ވަޑައިގަންނަވައި، މޮސްކޯއިން ޙިމާޔަތް ހޯއްދަވާފައެވެ.
އުރްދުޣާނާއި ޝަރާޢާ ދެމެދު ބޭއްވި ބައްދަލުވުމުގައި ތުރުކީވިލާތުގެ ސަރުކާރުގެ އިސް ވަޒީރުން ބައިވެރިވެ ވަޑައިގެންނެވިއެވެ. އޭގެ ތެރޭގައި އެ ޤައުމުގެ ޚާރިޖީ ވަޒީރާއި ދިފާޢީ ވަޒީރު ހިމެނިވަޑައިގަންނަވައެވެ. މީގެ އިތުރުން، އެޗްޓީއެސް ސަރުކާރުގެ ޚާރިޖީ އަދި ދިފާޢީ ވަޒީރުން ވެސް ހިމެނެއެވެ. ތުރުކީވިލާތުގެ ޖާސޫސީ އިދާރާގެ އިސްވެރިން ވެސް ބައިވެރިވި އެ ބައްދަލުވުމުގައި ސަލާމަތީ ދާއިރާއިން މުހިންމު މަޝްވަރާތަކެއް ކޮށްފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ދެކެއެވެ. ސޫރިޔާގައި ސުލްޙައާއި ހަމަޖެހުން ޤާއިމު ކުރުމަކީ، ސަރަޙައްދީ، އަދި ތުރުކީވިލާތުގެ ސުލްޙައާއި ސަލާމަތަށް މުހިންމު ކަމެއްގެ ގޮތުގައި އުރްދުޣާންގެ ސަރުކާރުން ޤަބޫލު ކުރެއެވެ. އެޗްޓީއެސްގެ ސަރުކާރާ އެކު ގުޅުންތައް ބަދަހި ކުރުމަށް އެމެރިކާއިން ވެސް ދަނީ މަސައްކަތް ކުރަމުންނެވެ. ނަމަވެސް، އެޗްޓީއެސަކީ އެމެރިކާއިން އެކުލަވައިލާފައިވާ ނިރުބަވެރި ޖަމާޢަތްތަކުގެ ލިސްޓުގައި އަދިވެސް ހިމަނާފައި އޮތް ޤައުމެއް ކަން ފާހަގަ ކޮށްލަން ޖެހެއެވެ. ސޫރިޔާއާއި އެމެރިކާއާ ދެމެދު ގުޅުންތައް ހަރުދަނާ ކުރުމަށް އެމެރިކާއިން ވަނީ އެ ޤައުމުން ތުރުކީވިލާތަށް ކަނޑައަޅާފައި ހުންނަވާ ސަފީރު، ޓޮމް ބަރާކަކީ ސޫރިޔާއަށް ކަނޑައަޅާފައި ހުންނަވާ ޚާއްޞަ މަންދޫބުގެ މަޤާމަށް ވެސް ޢައްޔަން ކޮށްފައެވެ. އެ ނިންމުމާ އެކު، ތުރުކީވިލާތަކީ ދިމިޝްޤުގެ ސަރުކާރަށް ނުފޫޒު ފޯރުވޭނެ ބާރެއްގެ ގޮތުގައި އެމެރިކާއިން ބަލައިގަނެފައިވާ ކަމަށް ޤަބޫލު ކުރެވޭ ކަމުގައި މަސްރަޙު ދިރާސާ ކުރާ ފަރާތްތަކުން ބުންޏެވެ.
ސޫރިޔާގައި ހަރަކާތްތެރިވާ ކުރުދީ ހަނގުރާމަވެރިންގެ ވައިޕީޖީއަކީ ތުރުކީވިލާތުގެ ސަރުކާރާ ދެކޮޅު ޖަމާޢަތެކެވެ. އެ ޖަމާޢަތް ބަލިކަށިކޮށް، ހަތިޔާރު ބެހެއްޓުމަށް މަޖުބޫރު ކުރުވުމަށް އުރްދުޣާންގެ ސަރުކާރުން ދަނީ މަސައްކަތް ކުރަމުންނެވެ. މި ކަމާ ގުޅޭ ގޮތުން ޝަރާޢާއި ތުރުކީވިލާތުގެ ޖާސޫސީ އިދާރާގެ ވެރިޔާ އިބްރާހީމް ކަލިންއާ ދެމެދު ދާދި ފަހުން މުހިންމު މަޝްވަރާތަކެއް ބާއްވާފައިވާ ކަމުގައި ތުރުކީވިލާތުގެ ސަލާމަތީ ދާއިރާގެ މަޞްދަރުތަކުން ހާމަކުރިއެވެ. އެމެރިކާއިން ހަތިޔާރާއި އަސްކަރީ އެހީތެރިކަން ފޯރުކޮށްދެމުންދާ ވައިޕީޖީއަކީ ތުރުކީވިލާތުން ނިރުބަވެރި ޖަމާޢަތެއްގެ ގޮތުގައި ބަލާ ގުރޫޕެކެވެ. އެއީ، ތުރުކީވިލާތުގެ ސަރުކާރާ ދެކޮޅަށް ހަނގުރާމަ ކުރަމުން ގޮސްފައިވާ ކުރްދިސްތާން ވަރކަރސް ޕާޓީ (ޕީކޭކޭ)އާ ގުޅުން އޮންނަ ޖަމާޢަތެކެވެ. ހަތިޔާރު ބަހައްޓައި، ތުރުކީވިލާތުގެ ސަރުކާރާ ދެކޮޅަށް ކުރަމުން ދިޔަ ހަނގުރާމަ ނިމުމަކަށް ގެނައުމަށް ޕީކޭކޭން ދާދިފަހުން ވަނީ ނިންމައި، އެ ކަން އިޢުލާނު ކޮށްފައެވެ.
About Post Author
މާދަމާ ނިއުސް
ފުޓްބޯޅައަށް ހައްގު މަގާމު އަލުން ހޯދަައިދިނުމަށް ސަރުކާރުން ކުރާ މަސައްކަތް ދަނީ ކާމިޔާބީގެ އަމާޒަށް: ރައީސުލްޖުމްހޫރިއްޔާ
(ފޮޓޯ ކްރެޑިޓްސް: ޕީއެސްއެމް ނިއުސް) ދިވެހީންގެ މެދުގައި ފުޓްބޯޅައަށް ހައްގު މަގާމު އަލުން އަނބުރައި ހޯދައިދިނުމަށް ސަރުކާރުން ކުރާ މަސައްކަތް ދަނީ ކާމިޔާބީގެ އަމާޒަށް...
ކުރީ ސަރުކާރުތަކަށް ގޭންގުތަކާ ދެކޮޅަށްފިޔަވަޅު އެޅިފައިނުވަނީ ސިޔާސީ މަސްލަހަތު އިސްކުރުމުން: ރައީސް
(ފޮޓޯ ކްރެޑިޓްސް: ރައީސް އޮފީސް) ކުރީ ސަރުކާރުތަކަށް ގޭންގުތަކާ ދެކޮޅަށް ފިޔަވަޅު އެޅިފައިނުވަނީ ސިޔާސީ މަސްލަހަތު އިސްކޮށް، މައްސަލަ ހައްލުކުރުމުގެ ނިޔަތް ނެތުމުންކަމަށް ރައީސުލްޖުމްހޫރިއްޔާ...
ޤާނޫނުގެ ބާރު ނުފޯރާ ހިސާބުގައި ގޭންގުތަކަށް ދެން ހަރަކާތްތެރި ނުވެވޭނެ: ވަޒީރު އިހްސާން
(ފޮޓޯ ކްރެޑިޓްސް: ރައީސް އޮފީސް) ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ އައު ޤާނޫނާއެކު ޤާނޫނުގެ ބާރު ނުފޯރާ ހިސާބުގައި ގޭންގުތަކަށް...
ޤައުމީ ޚިދުމަތުގެ ޕްރޮގުރާމުގައި ބައިވެރިވުމަށް އެދި 658 އަށްވުރެ ގިނަ ހުށައެޅުން
(ފޮޓޯ ކްރެޑިޓްސް: ރައީސް އޮފީސް) ދިވެހިރާއްޖޭގެ ޤައުމީ ޚިދުމަތުގެ ޕްރޮގުރާމްގައި ބައިވެރިވުމަށް އެދި މިހާތަނަށް 658 ފަރާތަކުން ހުށައަޅާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު...
ޙައްޖުވެރިން މާދަމާ ފުރަން ފަށާނެ، ބަސް ދަތުރުތައް ފެށުމުގެ 15 މިނެޓް ކުރިން ނުކުތުން މުހިންމު
(ފޮޓޯ ކްރެޑިޓްސް: ޕީއެސްއެމް ނިއުސް) ދިވެހި ރާއްޖެއިން މިއަހަރު ޙައްޖަށް ދާ ޙައްޖުވެރިން މާދަމާ ފުރަން ފަށާއިރު، ޙައްޖުވެރިންނަށް ފަސޭހައިން އެއަރޕޯޓަށް ދަތުރުކުރެވޭނެ އިންތިޒާމް...
ބޮޑެތި އަދަބުތަކެއް ހިމަނާފައިވާ ގޭންގު ކުށްތައް ހުއްޓުވުމުގެ ބިލު ރައީސް ތަސްދީޤުކުރައްވައިފި
(ފޮޓޯ ކްރެޑިޓްސް: ރައީސް އޮފީސް) ބޮޑެތި އަދަބުތަކާއެކު ގޭންގު ކުށްތައް ހުއްޓުވުމަށް އެކުލަވާލާފައިވާ "ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ބިލު"...