Read Time:5 Minute, 38 Second
(ފޮޓޯ ކްރެޑިޓްސް: ރޮއިޓާރސް)
މި އަހަރުގެ ތެރޭގައި ސޫރިޔާއަށް ވާރޭ ނުވެހި ގިނަ ދުވަސްވެ، ކުރިމަތިވެފައިވާ ހަނަފަސްކަމުގެ ސަބަބުން ސޫރިޔާގެ ގޮވާން ދަނޑުތަކުގެ 75 އިންސައްތަ ސަލާމަތް ނުކުރެވުން އެކަށީގެންވާ ކަމަށާއި އޭގެ ސަބަބުން އެތައް މިލިޔަން މީހުންގެ ކާބޯތަކެތީގެ ރައްކާތެރި ކަމަށް ނުރައްކާ ވެދާނެ ކަމަށް އދގެ ކަނާއާއި ދަނޑުވެރިކަމާބެހޭ އިދާރާ، އެފްއޭއޯއިން ބުނެފިއެވެ. ސޫރިޔާގައި ހުންނަވާ އެފްއޯއޭގެ މަންދޫބު ޓޯނީ އެޓެލް ވިދާޅުވީ ދަނޑުތަކުން މި އަހަރު ލިބޭ ގޮދަނުގެ މިންވަރު، ބޭނުންވާ މިންވަރަށްވުރެ 2.7 މިލިޔަން ޓަން މަދުވާނެ ކަމަށް ބެލެވޭ ކަމަށެވެ. 2.7 މިލިޔަން ޓަނުން 16.3 މިލިޔަން މީހުންނަށް އެއް އަހަރަށްވުރެ ގިނަ ދުވަސްވަންދެން ކާބޯތަކެތި ފޯރު ކޮށްދެވޭނެ ކަމަށް އޭނާ ފާހަގަ ކުރެއްވިއެވެ.
ސޫރިޔާގެ ކުރީގެ ރައީސް ބައްޝާރު އަލް-ޢަސަދުގެ ވެރިކަމުގައި ހަނަފަސް މޫސުމުގައި ގޮވާމުގެ ބާވަތްތައް ހޯދުމަށް ބަރޯސާ ވަނީ ރަޝިޔާއަށެވެ. ސޫރިޔާއަށް އެ ތަކެތި ފޯރު ކޮށްދީ، ސޫރިޔާގެ ސަބްސިޑީ މަޝްރޫޢުއަށް ރަޝިޔާއިން ދިޔައީ އެހީތެރިވަމުންނެވެ. ސޫރިޔާގެ ދަނޑުވެރިއެއް ކަމަށްވާ އުމުރުން 45 އަހަރުގެ އަސާދް އަޒަލުއްދީން ބުނީ ވާރޭ ނުވެހުމުގެ ސަބަބުން އޭނާގެ ދަނޑުތައް ހަލާކުވެފައިވާ ކަމަށެވެ. 13 އަހަރަށް ދެމިގެންދިޔަ ސޫރިޔާގެ އަހުލީ ހަނގުރާމައިގެ ސަބަބުން ވެސް ސޫރިޔާގެ ދަނޑުވެރިކަމުގެ ސިނާޢަތަށް ބޮޑެތި ގެއްލުންތައް ލިބިފައިވެއެވެ. އަޒަލުއްދީން ބުނީ ދަނޑުތަކަށް ފެން ފޯރު ކޮށްދޭ ނިޒާމެއް ނެތުމުގެ ސަބަބުންނާއި ވާރޭ ނުވެހޭތީ ދަނޑުވެރި ކަމަށް ވަރަށް ބޮޑަށް އަސަރު ކޮށްފައިވާ ކަމަށެވެ.
މިދިޔަ އަހަރުގެ ޑިސެމްބަރު މަހުގެ ތެރޭގައި ސޫރިޔާގެ ކުރީގެ ރައީސް ބައްޝާރު އަލްއަސަދުގެ ވެރިކަން ކުއްލި ގޮތަކަށް ނިމުމަކަށް ގެނެސް، ސޫރިޔާގެ ހިންގުމާ އެ ޤައުމުގެ ހަތިޔާރު އެޅި ޖަމާޢަތެއް ކަމަށްވާ ހަޔިއަތު ތަޙްރީރް އަލް-ޝާމް (އެޗްޓީއެސް)ން ޙަވާލުވުމުން، އަސަދަށް ވާގިވެރިވަމުން ދިޔަ ރަޝިޔާއިން ވަނީ ސޫރިޔާއަށް ގޮވާމުގެ ބާވަތްތައް ފޯރު ކޮށްދިނުން މެދުކަނޑާލައިފައެވެ. ރަޝިޔާއިން އޭރު ބުނީ އެ ގޮތަށް ނިންމީ ސޫރިޔާގެ އައު ވެރިންނާމެދު ކަންބޮޑުވުންތަކެއް ހުރުމުން ކަަމަށެވެ.
މިދިޔަ ހަފްތާގެ ތެރޭގައި އެމެރިކާގެ ރައީސް ޑޮނަލްޑް ޓްެރަމްޕް ވަނީ އެ ޤައުމުން ސޫރިޔާއާ ދެކޮޅަށް އަޅާފައިވާ ހުރިހާ ދަތިކުރުމުގެ ފިޔަވަޅުތައް އުވާލުމަށް އަމުރު ކުރައްވާނެ ކަމަށް އިޢުލާނު ކުރައްވައިފައެވެ. އެ އިޢުލާނާ އެއްގޮތަށް، ކުރިއަށް އޮތް ހަފްތާތަކުގައި އެމެރިކާއިން ސޫރިޔާއަށް ލުއިތައް ދޭން ފަށާނެ ކަމަށް ބެލެވެއެވެ. ވިލާތުގެ އިއްތިޙާދުން ވެސް މިހާރު ވަނީ ސޫރިޔާއާ ދެކޮޅަށް އަޅާފައިވާ ފިޔަވަޅުތައް އުވައިލުމަށް އެއްބަސްވެފައެވެ. އެއާއެކު، ސޫރިޔާއަށް އަނެއްކާ ވެސް ފައިސާ ވަންނަން ފެށުމުން ދަނޑުވެރިކަމުގެ ސިނާޢަތް އަލުން ދިރުވޭނެ ކަމަށް ސޫރިޔާގެ ދަނޑުވެރިން އުއްމީދު ކުރެއެވެ. ދަނޑުވެރިކަމަށް ބޭނުންވާ އެންމެހާ ވަޞީލަތްތައް ހޯދައި އިމާރާތްތައް ޤާއިމު ކޮށް، ފެން ހޯދޭނެ މަގުތައް އޭރަށް ފަހިިވާނެ ކަމަށް ދަނޑުވެެރިން ޤަބޫލު ކުރެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0