މުލީ އެއަރޕޯޓާއެކު އިޤްތިޞާދީ ކުރިއެރުން ހާސިލުވެ މުޅި އަތޮޅަށް ފާގަތިކަން ލިބޭނެ: ނާޒިމް

Read Time:4 Minute, 11 Second

(ފޮޓޯ ކްރެޑިޓްސް: ޕީއެސްއެމް ނިއުސް)

މުލީ އެއަރޕޯޓާއެކު އިޤުތިޞާދީ ގޮތުން ގިނަ ދޮރުތަކެއް ހުޅުވި މުލަކަތޮޅަށް ފާގަތިކަން ލިބޭނެކަމަށް ރައްޔިތުންގެ މަޖިލީހުގެ ނައިބު ރައީސް ދިއްގަރު ދާއިރާގެ މެންބަރު އަޙްމަދު ނާޒިމް ވިދާޅުވެއްޖެއެވެ. މަސައްކަތް ފެށިތާ 11 އަހަރަށްފަހު މުލަކަތޮޅު މުލީ އެއަރޕޯޓު ހުޅުވާއިދެއްވާފައި މިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. އެއަރޕޯޓު ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން މުލިވެސް ހިމެނޭ ދިއްގަރު ދާއިރާގެ މެންބަރު އަޙްމަދު ނާޒިމް ވިދާޅުވީ ވެރިކަން ބަދަލުވިއިރު، ހުޓިފައިއޮތް އެއަރޕޯޓުގެ މަސައްކަތް އަލުން ފެށުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި އަހަންމިއްޔަތުކަން މިއަދު ފާހަގަކުރަންޖެހޭ ކަމަށެވެ. އެ ގޮތުން އެއަރޕޯޓަށް ބޭނުންވާ ވަޞީލަތްތައް ހޯދުމުގައި ދިމާވި ދަތިތައް ހައްލުކޮށްދެއްވުމަށް ރައީސް ގިނަ މަސައްކަތްތަކެއް ކުރެއްވިކަން ނާޒިމް ފާހަގަކުރެއްވިއެވެ.

ނާޒިމް ވިދާޅުވީ މ. އަތޮޅުގައި އެއަރޕޯޓެއް ނެތުމުން ދަތުރުފަތުރުގެ ދާއިރާއިން އަތޮޅުގެ ރައްޔިތުންނަށް ދަތިތަކެއް ކުރިމަތިވެފައިވީ ނަމަވެސް އެއަރޕޯޓާއެކު އިތުރު ފަސޭހަތައްލިބި، އިޤުތިޞާދީ ގޮތުންވެސް ބޮޑެތި ކުރިއެރުންތަކެއް ލިބޭނެކަމަށް ނާޒިމް ވިދާޅުވިއެވެ. “މީހަކު ބަލިވެގެން އިތުރު ފަރުވާއަށް މާލެ ގެންދަންޖެހިއްޖެނަމަ ޖެހެނީ ލޯންޗުގައި ގެންދަން. އެހެންވީމަ އެކަމަށްވެސް ލުޔެއް ލިބޭނެ އެއަރޕޯޓާއެކީ. ދެން މި އަތޮޅުގައި މިހާރު އެއް ފަޅެއްގައި އެބައޮވޭ މިތާ ކައިރީ 2 ރިސޯޓު. އަދިވެސް އެއް ރިސޯޓު ތަރައްޤީކުރަމުންދަނީ. އެހެންވީމަ އިޤުތިޞާދީ ގޮތުންވެސް ގިނަ ދޮރުތަކެއް ހުޅުވިގެންދާނެ” ނާޒިމް ވިދާޅުވިއެވެ.

ނާޒިމް ވިދާޅުވީ އެއަރޕޯޓުގެ އިތުރުންވެސް މި ސަރަހައްދުގައި ތަރައްޤީގެ ގިނަ މަޝްރޫޢުތަކެއްގެ މަސައްކަތް ކުރިއަށްދާ ކަމަށެވެ. އަދި ރައީސް މުޢިއްޒުގެ މި 5 އަހަރުގެ ތެރޭގައި މ. އަތޮޅަށް ބޮޑެތި ކުރިއެރުންތަކެއް އަންނާނެކަމަށް އުންމީދުކުރައްވާކަމަށް މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު ވިދާޅުވިއެވެ. މުލީ އެއަރޕޯޓުގެ މަސައްކަތް ފެށީ 2014 ވަނަ އަހަރުއެވެ. މި މަޝްރޫޢަށް ދައުލަތުން 200 މިލިޔަނަށްވުރެ ގިނަ ރުފިޔާ ވަނީ ޚަރަދުކޮށްފައެވެ.