Read Time:11 Minute, 9 Second
ދިވެހިރާއްޖޭގެ ކުޅިވަރު ޤާނޫނަށް އެއްވަނަ އިސްލާހު ގެނައުމުގެ ބިލު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ތަސްދީގުކުރެއްވުމާއެކު ކުޅިވަރު ލާމަރުކަޒު ކުރެވި ރާއްޖޭގެ ކުޅިވަރަށް ބޮޑެތި ބަދަލުތަކެއް އަންނާނެ ކަމަށް ކުޅިވަރާއި ހަށިހެޔޮކަމާއި ބެހޭ ވަޒީރު އަބުދުﷲ ރާފިއު ވިދާޅުވެއްޖެއެވެ. ކުޅިވަރު ޤާނޫނަށް އިސްލާހު ގެނައުމުގެ ބިލު ތަސްދީގުކުރެއްވުމަށް ރައީސުލްޖުމްހޫރިއްޔާގެ އޮފީހުގައި ބޭއްވި ހާއްސަ ރަސްމިއްޔާތަށްފަހު ޕީއެސްއެމް ނިއުސްއަށް ދެއްވި ހާއްސަ އިންޓަވިއުއެއްގައި ވަޒީރު ރާފިއު ވިދާޅުވީ މި ޤާނޫނަށް ގެނެވުނު އިސްލާހުތަކާއެކު ރާއްޖޭގެ އެކި ކަންކޮޅުތަކުގައިި ތިބި ކުޅިވަރުގެ ހުނަރު ހުރި ކުދިން ފާހަގަކުރެވި އެކުދިންގެ ހުނަރު އިތުރަށް ތަރައްޤީކުރުމަށް މަގުފަހިގެންދާނެ ކަމަށެވެ.
އެގޮތުން މިޤާނޫނުގެ ދަށުން ކުޅިވަރު ކުރިއެރުވުމަށް ހާއްސަ ފަންޑެއް ޤާއިމުކުރެވި އެތުލީޓުންގެ ހުނަރު ތަރައްޤީކުރުމަށް އިންވެސްޓްކުރެވި ޓްރޭނިންގ ޕްރޮގްރާމްތައް ފަހިކޮށްދިނުމަށްވެސް އެ ފަންޑުގެ ސަބަބުން މަގުފަހިވެގެންދާނެ ކަމަށް ފާހަގަ ކުރެއްވިއެވެ. “ކުޅިވަރު ލާމަރުކަޒީ ވެގެން ދިއުމާއެކު ރާއްޖޭގެ އެކި ކޮޅުތަކުގައި ތިބި ހުނަރުވެރި ކުޅުންތެރިން އައިޑެންޓިފައި ކުރެވި އެކުދިންނަށް އިންވެސްޓްކުރެވިގެންދާނެ” ކަމަށް ވަޒީރު ވިދާޅުވިއެވެ. މީގެ އިތުރުން އެކި ރީޖަންތަކުގައި ކުޅިވަރުގެ ވަސީލަތްތައް ޤާއިމު ކުރެވި ރާއްޖޭގެ ކުޅިވަރު ވަސީލަތްތައް ތަރައްޤީކުރެވި މުޅި ރާއްޖެއަށް ކުޅިވަރުތައް ފުޅާކުރެވިގެންދާނެ ކަމަށް ވަޒީރު ވިދާޅުވިއެވެ. ކުޅިވަރު ޤާނޫނަށް ގެނެވުނު ބަދަލުތަކާއެކު ކުޅިވަރުގައި މުޅި ރާއްޖެ ޝާމިލްވާހެން އަތޮޅުތަކުގެ ބައިވެރިވުން އިތުރުވެގެންދާނެ ކަމަށްވެސް ވަޒީރު ފާހަގަ ކުރެއްވިއެވެ.
ދިވެހިރާއްޖޭގެ ކުޅިވަރު ޤާނޫނަށް އެއްވަނަ އިސްލާހު ގެނައުމުގެ ބިލު ތަސްދީގު ކުރެއްވުމަށްފަހު މީޑިއާ އާއި ބައްދަލުކުރައްވާ ރައީސުލްޖުމްހޫރިއްޔާ ވިދާޅުވީ މި ޤާނޫނުގެ ދަށުން ކުޅިވަރުތަކުގެ ސަރަހައްދީ އެސޯސިއޭޝަންތައް އުފެދިގެންދިއުމާއެކު، ޤައުމީ ފެންވަރުގެ ކުޅުންތެރިން އުފެއްދުމަށް ކުރާ މަސައްކަތުގައިވެސް ބޮޑު ކުރިއެރުމެއް ލިބިގެންދާނެކަމަށެވެ. މިގޮތުން އަތޮޅުތަކުގައި ތިބި ހުނަރުވެރި ކުޅުންތެރިންނަށް ބައިވެރިވެވޭ ގޮތަށް ސަރަޙައްދީ މުބާރާތްތައް ބާއްވައި، ފާހަގަވާ ކުޅުންތެރިންނަށް ޤައުމީ ޓީމުތަކުން ފުރުޞަތުތައް ފަހިވެގެންދިއުމުގެ އިތުރުން އަތޮޅުތަކުގައި ކުޅިވަރު ކުރިއަރުވައި ބައިވެރިވުން އިތުރު ކުރެވިގެންދާނެއެވެ.
ކުޅިވަރު އެސޯސިއޭޝަންތަކާއި ކްލަބްތަކަށްވެސް މިހާތަނަށް އައިއިރު އެންމެ ބޮޑު ގޮންޖެހުމެއްގެ ގޮތުގައި ފާހަގަކޮށްފައިވާ އެއްކަމަކީވެސް އަތޮޅުތަކުގެ ބައިވެރިވުން އިތުރު ކުރުމަށްޓަކައި ކުރެވޭ މަސައްކަތްތައް މަދުވުމެވެ. އަދި ރާއްޖޭގެ ކުޅިވަރު އެހެން ހަރުފަތަކަށް ގެންދިއުމަށްޓަކައި އެންމެ ބޮޑަށް ކުރަން ޖެހިފައިވާ އެއް ކަމަކީވެސް ކުޅިވަރު ޑީސެންޓްރަލައިޒް ކުރުން ކަމަށް ކުޅިވަރުގެ ގިނަ މާހިރުން ތަކުރާރުކޮށް ދަނީ ބުނަމުންނެވެ.
ދިވެހިރާއްޖޭގެ ކުޅިވަރު ޤާނޫނަށް ގެނައި އިޞްލާޙާއެކު އަންނާނެ ބައެއް ބަދަލުތައް
1. ކުޅިވަރު ކުރިއެރުވުން ލާމަރުކަޒީކޮށް އަތޮޅުތަކާއި ރަށްތަކުގެ ފެންވަރުގައި ކުޅިވަރު ކުރިއަރުވަން އިޚްތިޔާރުތަކަކާއި ފުރުޞަތުތަކެއް ލިބުން.
2. ކޮންމެ ކުޅިވަރެއްގެވެސް ސަރަޙައްދީ އެސޯސިއޭޝަންތައް ރާއްޖޭގެ އެކި ސަރަޙައްދުތަކުގައި މި ޤާނޫނުގެ ދަށުން އުފެއްދުމަށް ކަނޑައެޅުން. އަދި ކޮންމެ ކުޅިވަރެއްގެވެސް ސަރަޙައްދީ މުބާރާތްތައް ބާއްވަން ފެށުން.
3. ކުޅިވަރުގެ ވަކި ފަންޑެއް ޤާއިމުކޮށް، އެ ފަންޑުން ކުޅިވަރު ކުރިއަރުވަން ހޭދަކުރަން ފެށުން.
4. ދިވެހިރާއްޖޭގެ ޕެރަލިމްޕިކް ކޮމިޓީއަކީ، މޯލްޑިވްސް އޮލިމްޕިކް ކޮމިޓީއާ އެއް ގިންތިއެއްގައި ހިންގާނެ ޤާނޫނީ ބާރުވެރިކަން ފުރިހަމައަށް ލިބިފައިވާ ކުޅިވަރުގެ އިދާރާއެއްގޮތުގައި ހަމަޖެއްސުން.
5. މޯލްޑިވްސް ޕެރަލިމްޕިކް ކޮމެޓީގެ ދަށުން، ހިންގާ ޚާއްޞަ ޑިވިޝަންތައް ކުޅިވަރު އެސޯސިއޭޝަންތަކުގައި އުފެއްދުން.
6. ކުޅިވަރުގެ ދާއިރާގައި އެންމެންނަށް ހަމަހަމަކަން އޮންނާނެކަން ކަށަވަރު ކޮށްދޭ “މޯލްޑިވްސް ނޭޝަނަލް އެންޓި ޑޯޕިންގ އެޖެންސީ” ވަކި މުސްތަޤިއްލު މުއައްސަސާއެއްގެ ގޮތުގައި ހިނގަން ފެށުން.
7. ސްޕޯޓްސް އާބިޓްރޭޝަން ނިޒާމު ރާއްޖޭގައި ޤާއިމުކޮށް ޢަމަލުކުރަން ފެށުމަށް ކަނޑައެޅުން. (މިއީ ކުޅުންތެރީންގެ ހައްގުތައް ރައްކާތެރިކޮށް ދީ އިންސާފު ލިބޭނެ ގާނޫނީ ހައިސިއްޔަތު، ދިނުމަށް ފުރުޞަތު ފަހިކޮށްދިނުމަށް ކަނޑައަޅާފައިވާކަމެއް).
8. ސްކޫލް ސްޕޯޓްސް ރޭވިގެން ކުރިއަށް ގެންދެވޭ ގޮތަށް ފުރުޞަތު ފަހިވުން. (މިގޮތުން ‘އިންޓަރ ސްކޮލަރސްޓިކް’ ކުޅިވަރު އެސޯސިއޭޝަންތަކާއި ކްލަބުތައް މި ޤާނޫނުގެ ދަށުން އުފައްދައި ހަރަކާތްތެރިވަމުންދާނެ.)
މީގެ އިތުރުންވެސް ކުޅިވަރުގެ ދާއިރާގެ ކަންކަން މިހާރަށްވުރެ ހަރުދަނާ ކުރުމަށް ގިނަ ކަންތައްތަކެއް ކުރުމުގެ ފުރުޞަތު، މި ޤާނޫނަށް ގެނައި އިސްލާހުގެ ތެރެއިން ފަހިވެގެންދާނެއެވެ. ރައީސުލްޖުމްހޫރިއްޔާގެ އޮފީހުގައި ބިލް ތަސްދީގުކުރެއްވުމަށް ކުރިއަށްދިޔަ މި ރަސްމިއްޔާތުގައި މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން އާއި އެޓަރނީ ޖެނެރަލްގެ އިތުރުން ކޮމިޝަނަރ އޮފް ސްޕޯޓްސް، މޯލްޑިވްސް އޮލިމްޕިކް ކޮމިޓީގެ ރައީސް، ނޭޝަނަލް ސްޕޯޓްސް ކައުންސިލްގެ ރައީސް، ކުޅިވަރުގެ ދާއިރާގެއެހާރާއި މިހާރުގެ މަޝްހޫރު ބޭފުޅުން ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވިއެވެ. އަދި ރައީސުލްޖުމްހޫރިއްޔާވަނީ ދިވެހިރާއްޖޭގެ ކުޅިވަރު ޤާނޫނަށް 1 ވަނަ އިޞްލާޙު ގެނައުމުގެ ބިލާ ގުޅޭގޮތުން ނޫސްވެރިން ކުރެއްވި ސުވާލުތަކަށް ޖަވާބުދެއްވައި، މި އިސްލާހާގުޅިގެން އަންނާނެ ބަދަލުތަކާއި ރައްޔިތުންނަށް ލިބޭނެ ފައިދާތަކާގުޅޭ މަޢުލޫމާތު ޙިއްޞާކުރައްވާފައެވެ.
މި ބިލަކީ، 5 މެއި 2025 ވީ ހޯމަ ދުވަހު ބޭއްވެވި ރައްޔިތުންގެ މަޖިލީހުގެ 2025 ވަނަ އަހަރުގެ ފުރަތަމަ ދައުރުގެ 26 ވަނަ ޖަލްސާއިން ފާސްކުރެއްވި ބިލެކެވެ.
Happy
0 %
Sad
0 %
Excited
100 %
Sleepy
0 %
Angry
0 %
Surprise
0 %
0
0