އިންޑިޔާގެ ހުޅަނގުގެ ސަރަޙައްދުތަކަށް ޕާކިސްތާނުން ޙަމަލާ ދީފި

Read Time:8 Minute, 15 Second

(ފޮޓޯ ކްރެޑިޓްސް: ރޮއިޓާރސް)

އިންޑިޔާއާއި ޕާކިސްތާނާ ދެމެދު ބަދަލު ކުރަމުންދާ ޙަމަލާތަކުގެ ތެރެއިން އިންޑިޔާގެ ހުޅަނގު ސަރަޙައްދީ ރޮނގު ކައިރީގައި އޮތް ރަށްތަކަށް ޕާކިސްތާނުން ޙަމަލާތަކެއް ދީފައިވާ ކަމުގައި އިންޑިޔާގެ އަސްކަރިއްޔާއިން ބުނެފިއެވެ. ނިއުކްލިޔަރ ދެ ބާރު ކަމުގައިވާ އިންޑިޔާއާއި ޕާކިސްތާނާ ދެމެދު ބަދަލު ކުރަމުންދާ ޙަމަލާތަކުގެ ތެރެއިން އެންމެ ފަހުން ދީފައިވާ ޙަމަލާތަކުގައި ޕާކިސްތާނުގެ އަސްކަރިއްޔާއިން ޑްރޯން ފަދަ ހަތިޔާރު ބޭނުން ކޮށްފައިވާ ކަމުގައި އިންޑިޔާގެ އަސްކަރިއްޔާއިން ބުންޏެވެ.

މޭ 7ވަނަ ދުވަހު އިސްވެ ޕާކިސްތާނަށް ޙަމަލާ ދީފައި ވަނީ އިންޑިޔާގެ އަސްކަރިއްޔާއިންނެވެ. އިންޑިޔާގެ ޙަމަލާތައް އަމާޒު ކޮށްފައި ވަނީ ނިރުބަވެރި ޖަމާޢަތްތަކުން ޕާކިސްތާނުގައި ހަރަކާތްތެރިވަމުންދާ ކަމަށް ބުނާ ސަރަޙައްދުތަކަށެވެ. އިންޑިޔާއިން ޕާކިސްތާނަށް ޙަމަލާ ދީފައި ވަނީ، ނިރުބަވެރި ޖަމާޢަތަކުން އިންޑިޔާގެ ކަޝްމީރުގައި ދިން ބަޑީގެ ޙަމަލާތަކަކާ ގުޅުވައެވެ. އެ ޙަމަލާ ދިނުމުގައި އިސްލާމްއާބާދުގެ ބައިވެރިވުން އޮތް ކަމުގައި ނިއު ދެއްލީން ތުހުމަތު ކުރި ނަމަވެސް، ޕާކިސްތާނުން ދަނީ އެ ތުހުމަތުތައް ދޮގު ކުރަމުންނެވެ. އެ ޙަމަލާތަކުގެ މިނިވަން ތަޙުޤީޤެއް ހިންގުމަށް ޕާކިސްތާނުން ހުށަހަޅާފައިވެއެވެ.

ނަމަވެސް، ދެ ޤައުމުގެ ސަރަޙައްދީ ރޮނގު ގުޅޭ ސަރަޙައްދުގައި މި ވަގުތު ދަނީ ވަރުގަދަ ޙަމަލާތަކެއް ބަދަލު ކުރަމުންނެވެ. މި ޙަމަލާތަކުގައި ދެ ޤައުމުން ހަތަރު ދޮޅަހަށްވުރެ ގިނަ މީހުން މަރުވެ، ގިނަ އަދަދެއްގެ ބަޔަކު ވަނީ ޒަޚަމުވެފައެވެ. ޙަމަލާތަކުގައި ދެ ޤައުމުން ވެސް ދަނީ އަސްކަރީ ޑްރޯނާއި މިސައިލް ފަދަ ހަތިޔާރުތައް ބޭނުން ކުރަމުންނެވެ. އިންޑިޔާގެ އަސްކަރިއްޔާއިން ބުނީ، ދެބަސްވުން އުފެދިފައިވާ ކަޝްމީރުގެ ސަރަޙައްދީ ރޮނގު ކައިރީގައި ޙަމަލާ ބަދަލު ކުރުން މެދުކަނޑައިލުމާ ގުޅޭ ގޮތުން އަމަލު ކުރަމުންދާ އެއްބަސްވުމަށް ޕާކިސްތާނުން މެދުނުކެނޑި ޚިލާފުވަމުންދާ ކަމުގައެވެ. އަދި، އެ ސަރަޙައްދަށް އަމާޒުކޮށް ދެމުންދާ ޙަމަލާތަކުގެ ރައްދުގައި ޙަމަލާ ދޭނެ ކަމުގައެވެ. އިންޑިޔާގެ މި ތުހުމަތުތައް ޕާކިސްތާނުން ކަށަވަރު ކޮށްދީފައެއް ނުވެއެވެ.

އިންޑިޔާގެ ޕަންޖާބް ސްޓޭޓްގެ ޕަތާންކޯޓާއި، ކަޝްމީރު ވާދީގެ ޝްރީނަގަރު އަދި ރާޖަސްތާނުގެ ޖައިސަލްމޭރަށް ޕާކިސްތާނުން ޙަމަލާތައް އަމާޒު ކޮށްފައިވާ ކަމުގައި ވެސް އިންޑިޔާއިން ތުހުމަތު ކުރެއެވެ. ނަމަވެސް، ޕާކިސްތާނުން ވަނީ އެ ތުހުމަތުތަކަށް ރައްދު ދީފައެވެ. ޕާކިސްތާނުން ބުނީ، އެ ރަށްތަކަށް ޙަމަލާ ދީފައިވާ ކަމަށް އިންޑިޔާއިން ތުހުމަތު ކޮށްފައި ވަނީ “ސިޔާސީ މަޤުޞަދެއްގައި” ކަމުގައެވެ. އަދި، އެއީ ޙަޤީޤަތެއް ނޫން ކަމުގައެވެ.

ކަޝްމީރުގެ ސަމްބާ ސަރަޙައްދަށް ޕާކިސްތާނުގެ ސިފައިން އެއްގަމު މަގުން އެރުމަށް މަސައްކަތް ކޮށްފައިވާ ކަމުގައި ވެސް އިންޑިޔާގެ ސަރަޙައްދީ ރޮނގު ބަލަހައްޓާ ސިފައިން ތުހުމަތު ކުރިއެވެ. އެ އޮޕަރޭޝަން ފޭލުކޮށްލާފައިވާ ކަމަށާއި، ނަމަވެސް އެ ސަރަޙައްދުގައި އޮތް އުރީއަށް ޕާކިސްތާނުގެ އަސްކަރިއްޔާއިން އާޓިލަރީ ބަޑީގެ ޙަމަލާތައް އަމާޒު ކުރަމުންދާ ކަމުގައި ވެސް އެ ސިފައިން ތުހުމަތު ކުރިއެވެ. އުރީއަށް ދީފައިވާ ޙަމަލާތަކުގައި ޢާންމުންގެ އެކަކު މަރުވެ، ބައެއް ގެތަކުގައި އަލިފާން ރޯވެ، ބޮޑެތި ގެއްލުންތަކެއް ލިބުނު ކަމުގައި ވެސް ނަން ހާމަކޮށްފައި ނުވާ އިންޑިޔާގެ ސަލާމަތީ ދާއިރާގެ މަޞްދަރަކުން ބުންޏެވެ.

ދެކުނު އޭޝިޔާ ސަރަޙައްދުގެ މައި ދެ ބާރުގެ ގޮތުގައި ބެލެވޭ އިންޑިޔާއާއި ޕާކިސްތާނާ ދެމެދު ބަދަލު ކުރަމުންދާ ޙަމަލާތައް ހުއްޓުމަކަށް ގެނައުމަށް ދުނިޔޭގެ ބާރުތަކުން ދަނީ މަސައްކަތް ކުރަމުންނެވެ. ޙަމަލާ ބަދަލު ކުރުން މެދުކަނޑައިލައި، މަޝްވަރާއާއި ސުލްޙަ އިސް ކުރުމަށް ބާރު އަޅަމުންދާ ޤައުމުތަކުގެ ތެރޭގައި އެމެރިކާއާއި ޗައިނާ ހިމެނެއެވެ. ޙަމަލާ ބަދަލު ކުރުން ހުއްޓައިލުމަށް ގޮވައިލައްވާފައިވާ ބޭފުޅުންގެ ތެރޭގައި އެމެރިކާގެ ނައިބު ރައީސް ޖޭޑީ ވޭންސް ވެސް ހިމެނެއެވެ. “އަޅުގަނޑުމެން ބޭނުމީ ވީ އެންމެ އަވަހަކަށް ޙަމަލާ ބަދަލު ކުރުން މެދުކަނޑައިލުން. ނަމަވެސް، އަޅުގަނޑުމެންނަށް އެ ދެ ޤައުމު ކޮންޓުރޯލެއް ނުކުރެވޭނެ،” އޭނާ ވިދާޅުވިއެވެ. އިނގިރޭސިންގެ އަތްދަށުން އިންޑިޔާއާއި ޕާކިސްތާނަށް މިނިވަން ކަން ލިބިފައި ވަނީ 1947ވަނަ އަހަރުއެވެ. އެއަށް ފަހު، އެ ދެ ޤައުމުގެ ދެމެދުގައި ތިން ހަނގުރާމައެއް ކޮށްފައިވެއެވެ. އޭގެ ތެރެއިން ދެ ހަނގުރާމައެއް ގުޅިފައި އޮތީ ކަޝްމީރުގެ މިލްކުވެރިކަމާ މެދު އުފެދިފައިވާ ޚިޔާލު ތަފާތުވުންތަކާއެވެ.