ނ.މިނާވަރު ސަރުކާރަށް ނަގަންނިންމީ އެއްބަސްވުމާ ޚިލާފަށް ކުރަމުންދިޔަ ކަންކަން ރަނގަޅުނުކުރުމުން

Read Time:4 Minute, 36 Second

ދަނޑުވެރިކަމާއި ވެލިއުއެޑެޑް ޕްރޮސެސިންގ މަސައްކަތްކުރުމަށް ދޫކޮށްފައިވާ ނ.މިނާވަރުގެ އެއްބަސްވުން އުވާލީ އެއްބަސްވުމާ އެއްގޮތަށް ކަންކަން ރަނގަޅުކުރުމަށް ދިން ފުރުޞަތުގައި އެކަންކަން ރަނގަޅުނުކުރުމުންކަމަށް ދަނޑުވެރިކަމާއި ދިރާތަކެއްޗާއި ބެހޭ ވުޒާރާއިން ވިދާޅުވެއްޖެއެވެ.

މަޝްހޫރު ވިޔަފާރިވެރިޔާ އަދި ދ. މީދޫ ދާއިރާގެ ރައްޔިތުންގެ މަޖިލިހުގެ މެންބަރު އަހުމަދު ސިޔާމް މުހައްމަދުގެ ސަން ޓްރެވަލްސްއަށް ނ. މިނާވަރު ކުއްޔަށްދީފައި ވަނީ 2010 ވަނަ އަހަރުގެ ފެބުރުއަރީ މަހުގެ 6ވަނަ ދުވަހުއެވެ. ދަނޑުވެރިކަމާއި ވެލިއުއެޑެޑް ޕްރޮސެސިންގ މަސައްކަތްކުރުމަށް ނުވަތަ އަގުއެއްކޮށްގެން ވިއްކާނެ ބާވަތްތައް އުފައްދާ ބާޒާރަށް ނެރުމުގެ މަސައްކަތްކުރުމަށް ދޫކޮށްފައިވާ އެރަށުގައި އެއްބަސްވުމާއި ޚިލާފަށް ކަންކަން ކުރަމުންދާތީ އެކަންކަން ރަނގަޅުކުރުމަށް ތަކުރާރުކޮށް އަންގާފައިވާކަމަށާއި، އެއްބަސްވުން ބާތިލުކޮށްފައިވަނީ، އެއްބަސްވުމާއި އެއްގޮތަށް މަސައްކަތް ކުރިއަށްނުދާތީކަމަށް ދަނޑުވެރިކަމާއި ބެހޭ ވުޒާރާއިން ވިދާޅުވެއެވެ.

ދަނޑުވެރިކަމާ ބެހޭ ވުޒާރާގެ ފަރާތުން ކުރި މޮނީޓަރިން ދަތުރުތަކުގައި އެރަށުގައި، އެގްރީމަންޓުގައި ބަޔާންކޮށްފައިވާ މަސައްކަތްތަކުގެ ތެރެއިން ވެލިއު އެޑްކޮށްގެން އެކި ބާވަތްތައް އުފެއްދުމާއި ޕްރޮސެސްކުރުމުގެ އެއްވެސް މަސައްކަތެއް މިހާތަނަށް ކުރިއަށްގެންގޮސްފައިނުވާކަން ފާހަގަކުރެވިފައިވާކަމަށް އެވުޒާރާއިން ވިދާޅުވެއެވެ. އެހެންކަމުން މިކަންކަން ރަނގަޅުކޮށް އެގްރީމަންޓުގައި ބަޔާންކުރާގޮތަށް މަސައްކަތްކުރުމަށް މާރިޗުމަހުގެ 19 ވަނަ ދުވަހު އެކުންފުންޏަށް އަންގާ 30 ދުވަހުގެ މުއްދަތެއް ދިންނަމަވެސް އެމުއްދަތުގެ ތެރޭގައިވެސް އެކަންކަން ރަނގަޅުކޮށްފައިނުވާކަމަށް އެވުޒާރާއިން ވިދާޅުވެއެވެ. އެހެންކަމުން މައްސަލަތައް ރަނގަޅުކުރުމަށް ދިން މުއްދަތު ހަމަވުމާއި ގުޅިގެން މިމަހުގެ 5 ވަނަ ދުވަހު، އެރަށް އަނބުރާ ސަރުކާރަށް ނެގުމަށް ނިންމާފައިވާކަން ރަށް ކުއްޔަށް ހިފާފައިވާ ސަން ޓްރެވެލްސް ކުންފުންޏަށް އަންގާފައިވާނެކަމަށް ދަނޑުވެރިކަމާއި ބެހޭ ވުޒާރާއިން ވިދާޅުވެއެވެ.

މީގެކުރިންވެސް އެކި ސަރުކާރުތަކުން މިރަށް އަތުލުމުގެ މަސައްކަތްވަނީ ކޮށްފައެވެ. އެއްބަސްވުމުގައި ބަޔާންކުރާ މަސައްކަތުގެ ބޭރުން އެރަށުގައި ކުރަމުން ގޮސްފައިވަނީ ސަން ޓްރެވެލްސްގެ ކުންފުންޏާއި ގުޅޭ ރިސޯޓުތަކަށް ބޭނުންވާ އެކި އުފެއްދުންތައް އުފެއްދުމުގެ މަސައްކަތެވެ.