ރަމަޟާން މަހަށް ހާއްސަކޮށް މާލެ ސަރަހައްދުގައި ވަގުތީ މާރުކޭޓުތައް ހަދަނީ

Read Time:3 Minute, 36 Second

(ފޮޓޯ ކްރެޑިޓްސް: ވަގުތު)

ކުރިއަށް އޮތް ރަމަޟާން މަހަށް ހާއްސަކޮށް ގްރޭޓާ މާލެ ސަރަހައްދުގައި ވަގުތީ މާރުކޭޓުތައް ހަދަން މަޝްވަރާ ކުރަމުންދާ ކަމަށް އިޤްތިސާދީ ތަރައްޤީ އާއި ވިޔަފާރިއާ ބެހޭ ވުޒާރާއިން ވިދާޅުވެއްޖެއެވެ. ރައީސް އޮފީހުގެ ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ވުޒާރާގެ ކޮންސަލްޓަންޓް ފާތިމަތު ނަޝްވާ ބަދީއު ވިދާޅުވީ އާންމު ރައްޔިތުންނަށް ކާބޯތަކެތި ހެޔޮ އަގުގައި ފޯރުކޮށްދިނުމަށްޓަކައި ކުރިއަށް އޮތް ރަމަޟާން މަހަށް ހާއްސަކޮށް މާލޭގެ އެކި ސަރަހައްދުތަކުގައި އަދި ހުޅުމާލޭގެ ދެފިޔަވަހީގައިވެސް ވަގުތީ މާރުކޭޓުތައް ޤާއިމު ކުރުމަށް އެ ވުޒާރާއިން މަޝްވަރާތައް ކުރަމުންދާ ކަމަށެވެ.

“ރައްޔިތުންނަށް ފަސޭހަ ގޮތެއްގައި އަސާސީ ކާބޯތަކެތި ފޯރުކޮށްދިނުމަށް ގްރޭޓާ މާލެ ސަރަހައްދުގައި އަޅުގަނޑުމެން ވަގުތީ މާކެޓުތައްވެސް ހުޅުވުމުގެ މަޝްވަރާތައް މިދަނީ ކުރިޔަށް. އެގޮތުން މަޝްވަރާ ކުރަމުންދާ ތަންތަނަކީ މާލޭގެ ސަރަހައްދުތަކާއި ހުޅުމާލޭގެ ފޭސް 1 އަދި 2.” ނަޝްވާ ވިދާޅުވިއެވެ. މާލޭގެ އިތުރުން އަތޮޅެތެރޭގައި ކާބޯތަކެތީގެ އަގު ހިފެހެއްޓުމަށް އަތޮޅެތެރޭގައި ޤާއިމުކޮށްފައި ހުންނަ 13 ފިހާރައެއްގެ ސްޓޮކް ބަލައި ރަމަޟާން މަހަށް ބޭނުންވާ ވަރަށް ސްޓޮކް ހުރިތޯވެސް އެ ވުޒާރައިން ދަނީ ބަލަމުންނެވެ. އަދި އެއްވެސް ބާވަތެއް މަދުވާ ހާލަތެއްގައި އެމްޓީސީސީ މެދުވެރިކޮށް ވީހާވެސް އަވަހަކަށް އެ ބާވަތެއް އެރަށަކަށް ފޯރުކޮށްދެވޭނެ ކަމަށް ނަޝްވާ ވަނީ ވިދާޅުވެފައެވެ.

ހަމައެއާއެކު ކާބޯތަކެތީގެ އަގު ރައްޔިތުންނަށް ފަސޭހަކަމާއެކު ފެންނާނެ ފަދަ އޮންލައިން ޕްލެޓް ފޯމެއް ޑިވެލޮޕް ކުރުމުގެ މަސައްކަތްވެސް އެ ވުޒާރާއިން ދަނީ ކުރަމުންނެވެ. ރޯދަ މަހަށް އަސާސީ ކާބޯތަކެތި އަވަހަށް ކްލިއާކުރުމަށް އެމްޕީއެލް، ކަސްޓަމްސްގެ އިތުރުން އެއާޕޯޓް ކާގޯ އަދި މޯލްޑިވްސް ސްޓޭޓް ޝިޕިންއާ އެކު އެ ވުޒާރާއިން މަޝްވަރާކުރަމުން ދެއެވެ.