ބައިނަލްއަގްވާމީ 4 ޖަމިއްޔާއަކަށް ކަނޑައެޅުމަށް ނަން ފޮނުވި މަންދޫބުންނަށް ރުހުންދީފި

Read Time:3 Minute, 45 Second

ބައިނަލްއަގްވާމީ ހަތަރު ޖަމިއްޔާއަކަށް ކަނޑައެޅުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނަން ފޮނުވި މަންދޫބުންނަށް ރައްޔިތުންގެ މަޖިލީހުން ރުހުން ދީފިއެވެ. ރުހުން ހޯދުމަށް ރައީސް މަޖިލީހަށް ފޮނުއްވި ހަތަރު ޖަމިއްޔާއަކީ އިންޓަނޭޝަނަލް މެރިޓައިމް އޯގަނައިޒޭޝަން (އައިއެމްއޯ)އާއި، އިންޓަނޭޝަނަލް ރިނިއުބަލް އެނާޖީ އޭޖެންސީ (އައިރީނާ) އަދި ވޯލްޑް ޓްރޭޑް އޯގަނައިޒޭޝަން (ޑަބްލިއުޓީއޯ) އާއި އޯގަނައިޒޭޝަން އޮފް އިސްލާމިކް ކޯޕަރޭޝަނެވެ.

އެ ޖަމިއްޔާތަކަށް އައްޔަން ކުރެއްވުމަށް ހުށަހެޅި ނަންތަކަކީ:

އިންޓަނޭޝަނަލް މެރިޓައިމް އޯގަނައިޒޭޝަން (އައިއެމްއޯ) – އިނގިރޭސިވިލާތަށް ކަނޑައަޅާފައި ހުންނަވާ ސަފީރު ޑރ. އިރުތިޝާމް އާދަމް

އިންޓަނޭޝަނަލް ރިނިއުބަލް އެނާޖީ އޭޖެންސީ (އައިރީނާ) – އެކުވެރި އަރަބި އިމާރާތަށް ކަނޑައަޅާފައި ހުންނަވާ ސަފީރު މުޙައްމަދު ޙުސައިން ޝަރީފް

ވޯލްޑް ޓްރޭޑް އޯގަނައިޒޭޝަން (ޑަބްލިއުޓީއޯ) – ޖެނީވާގައި ހުންނަ އ.ދ.ގެ މަރުކަޒުތަކަށް ކަނޑައަޅާފައި ހުންނަވާ ދާއިމީ މަންދޫބު ޑރ. ސަލްމާ ރަޝީދު

އޯގަނައިޒޭޝަން އޮފް އިސްލާމިކް ކޯޕަރޭޝަން – ސައުދީ އަރަބިއްޔާއަށް ކަނޑައަޅާފައި ހުންނަވާ ސަފީރު އަހްމަދު ސަރީރް

އެ މައްސަަލަތައް މަޖިލީހުގެ ހާރިޖީ ކޮމިޓީއިން ދިރާސާކުރުމަށްފަހު މިއަދު ވަނީ ތަޅުމުގައި ވޯޓަށް އަހާވައެވެ. އެގޮތުން އިންޓަނޭޝަނަލް މެރިޓައިމް އޯގަނައިޒޭޝަން (އައިއެމްއޯ)ގެ މަމްދޫބަކަށް އިރުތިޝާމް ކަނޑައެޅުމަށް 73 މެމްބަރުން ރުހުންދީފައިވެއެވެ. އަދި އިންޓަނޭޝަނަލް ރިނިއުބަލް އެނާޖީ އޭޖެންސީ (އައިރީނާ)ގެ މަމްދޫބަކަށް މުހައްމަދު ހުސެއިން ޝަރީފް ކަނޑައެޅުމަށް ވެސް 73 މެންބަރުން ރުހުންދީފައިވެއެވެ.

ވޯލްޑް ޓްރޭޑް އޯގަނައިޒޭޝަން (ޑަބްލިއުޓީއޯ)ގެ މަމްދޫބަކަށް ޑރ. ސަލްމާ ކަނޑައެޅުމަށް މަޖިލީހުގެ 72 މެންބަރުން ފެންނަ ކަމަށް ވޯޓު ދީފައިވާއިރު އޯގަނައިޒޭޝަން އޮފް އިސްލާމިކް ކޯޕަރޭޝަންގެ މަމްދޫބަކަށް އަހުމަދު ސަރީރް ހަމަޖެއްސުމަށް 74 މެންބަރުން ފެންނަ ކަމަށް ވޯދު ދެއްވެވިއެވެ.