ލިވަޕޫލް ކިރިޔާ މޮޅުވިއިރު، ޔުނައިޓެޑު އަނެއްކާވެސް ބަލިވެ ނޭވާހޮޅިއަށް!

Read Time:4 Minute, 24 Second

އިނގިރޭސި ޕްރިމިއާ ލީގުގައި ވުލްވްސް އަތުން ލިވަޕޫލް އުނދަގޫ މޮޅެއް ހޯދިއިރު، ޓޮޓެންހަމް އަތުން ބަލިވެ މެންޗެސްޓަރ ޔުނައިޓެޑް އުނދަގޫ ހާލަތަކަށް ވެއްޓިއްޖެއެވެ. ލީގުގެ އެއްވަނައިގައި އޮތް ލިވަޕޫލުން 2-1 އިން ވުލްވްސް އަތުން މޮޅުވުމާއިއެކު އެޓީމަށް ލިބިފައިވާ ލީޑް ވަނީ ހަތް ޕޮއިންޓަށް ފުޅާވެފައެވެ. ދެވަނައިގައި އޮތީ އާސެނަލް އެވެ.

ވުލްވްސް އަތުން މޮޅުވި މެޗުގައި ލިވަޕޫލްގެ ގޯލްތައް ޖަހައިދިނީ ލުއިސް ޑީއާޒް އާއި މުހައްމަދު ސަލާހު އެވެ. ސަލާހު ގޯލު ޖެހީ ލިބުނު ޕެނަލްޓީއަކުންނެވެ. ފުރަތަމަ ހާފުގައި ދެ ގޯލު ޖެހި ނަމަވެސް މެޗުގެ ދެވަނަ ހާފުގައި ލިވަޕޫލަށް އެންމެ ހަމަލާއެއްވެސް ވުލްވްސްގެ ގޯލަށް އަމާޒުކޮށްނުލެވުނެވެ. އަނެއްކޮޅުން ވުލްވްސްއިން މިހާފުގައި މޮޅަށް ކުޅޭ ގިނަ ހަމަލާތަކެއް އުފެއްދިއެވެ. މެތަޔަސް ކުންހާގެ ގޯލުން އެޓީމަށް ފަރަގު ކުޑަކުރެވުުނު ނަމަވެސް އިތުރު ގޯލެއް ޖެހޭ ގޮތެއް ނުވިއެވެ.

ރޭ މެންޗެސްޓަރ ޔުނައިޓެޑް ޓޮޓެންހަމް އަތުން ބަލިވީ 1-0ގެ ހަނި ތަފާތަކުންނެވެ. ދެ ޓީމުންވެސް ގިނަ ހަމަލާތަކެއް އުފެއްދި މި މެޗުގައި ޓޮޓެންހަމްގެ ހަމައެކަނި ގޯލު ޖަހައިދިނީ މަހެއްހާ ދުވަހު ކުޅުމާ ދުރުގައި ހުރެފައި އެނބުރިއައި މިޑްފިލްޑަރު ޖޭމްސް މެޑިސަންއެވެ. މިއީ އެޓީމްގެ ލޫކަސް ބާގްވާލް ފޮނުވާލި ހަމަލާއެއް ކީޕަރު އަންދްރޭ އޮނާނާ އަތުގައި ޖެހިފައި ނިކުތް ވަގުތު އެ ބޯޅަށް ގޯލަށް ވައްދާލައިގެން މެޑިސަން ޖެހި ގޯލެކެވެ. މެޗުގައި ޔުނައިޓެޑުން ނުރައްކާތެރި ހަ ހަމަލާއެއް ފޮނުވާލިނަމަވެސް އަނިޔާއިން އެނބުރިއައިސް މި މެޗުގައި ކުޅުނު ގޯލްކީޕަރު ވިކާރިއޯ ވަނީ އެ ހަމަލާތައް ދިފާއުކޮށްފައެވެ.

ރޭގެ މޮޅާއިއެކު ޓޮޓެންހަމް ލީގުގެ 12 ވަނައަށް ކުރިއަށްޖެހިލިއިރު، ޔުނައިޓެޑްވަނީ ލީގުގެ 15 ވަނައަށް ވެއްޓިފައެވެ. މިއީ މިދިޔަ 51 އަހަރުގެ ތެރޭގައި ޕްރިމިއަރ ލީގުގެ 15 ވަނައަށް ނުވަތަ އެއަށްވުރެ ދަށަށް ޔުނައިޓެޑް ވެއްޓުނު ފުރަތަމަ ފަހަރެވެ. އަނެއްކޮޅުން މިއީ ކޯޗު ރުބެން އަމޮރިމް ޔުނައިޓެޑަށް އިރުޝާދުދިން 14 ވަނަ މެޗުގެ ތެރެއިން އެ ޓީމް ބަލިވި އަށްވަނަ މެޗެވެ. ރޭގެ މެޗަކީ މި ސީޒަންގައި ޓޮޓެންހަމް އަތުން ޔުނައިޓެޑް ބަލިވި ތިންވަނަ މެޗެވެ. ލީގުގައި މިދިޔަ ސެޕްޓެމްބަރު މަހު 3-0 އިން ޓޮޓެންހަމް އަތުން ޔުނައިޓެޑް ބަލިވިއިރު، މިދިޔަ ޑިސެމްބަރު މަހު ލީގު ކަޕްގައިވެސް ޔުނައިޓެޑް ވަނީ ޓޮޓެންހަމް އަތުން ބަލިވެފައެވެ.