Read Time:4 Minute, 37 Second
(ފޮޓޯ ކްރެޑިޓްސް: ވަގުތު)
އަންނަ ސެޕްޓެމްބަރު މަސް އައުމުގެ ކުރިން ރާއްޖޭގެ ހުރިހާ ސްކޫލެއްގެ ކްލާސްރޫމްތައް އިއާދަކުރުވަނިވި ހަކަތަ ބޭނުންކޮށްގެން އޭސީ ކުރުމުގެ މަސައްކަތް ކުރަމުންދާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. ރ. އަތޮޅުގެ 11 ރަށަކަށް މިހާރު ކުރައްވަމުން ގެންދަވާ ދަތުރުފުޅުގައި ރ. ހުޅުދުއްފާރަށް ވަޑައިގެން އެ ރަށުގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ އިމާރާތްތަކެއް އެކަނި ހެދުމަށް ވުރެ، ގައުމަކަށް ތަރައްގީ ގެނެވޭނީ ޒުވާން ޖީލަށް ރަނގަޅު ތައުލީމެއް ދީގެން ކަމަށެވެ.
ސްކޫލްތަކަށް ބޭނުންވާ ވަސީލަތްތައް ފުރިހަމަކޮށް ދިނުމަކީ ހަގީގީ އަދި ވަށާޖެހޭ ތަރައްގީއަށް އެންމެ މުހިންމު ކަންތައް ކަމަށް ރައީސް ވިދާޅުވިއެވެ.
(ފޮޓޯ ކްރެޑިޓްސް: ވަގުތު)
“ރަނގަޅު ފެންވަރެއްގައި، ހިތްހަމަޖެހޭ މާހައުލެއްގައި ކިޔަވައިދެވޭ ގޮތް ފަހިކޮށް ދިނުމަކީ އެންމެ ރަނގަޅު ނަތީޖާ، އޭގެން އުފާވެރިކަން ލިބޭނެ ކަންތައް.” ރާއްޖޭގެ ތައުލީމީ ނިޒާމު ކުރިއަރުވައި ތަރައްގީ ކުރުމަށް ހާއްސަ އިސްކަމެއް ދެއްވާކަން ފާހަގަ ކުރައްވައި ރައީސް ޑރ. މުއިއްޒު ވިދާޅުވިއެވެ. ރާއްޖޭގެ ހުރިހާ ކްލާސްރޫމްތަކެއް ފިނިކޮށް ދިނުމުގެ މަޝްރޫއެއް މި ސަރުކާރުގެ ވަރަށް ކުރީކޮޅު ވަނީ ފަށައިފައެވެ. ސަރުކާރުން ފުރަތަމަ އިސްކަން ދެނީ ކްލާސްރޫމްތަކަށެވެ. އޭސީ ހަރުކުރުމާއި އެއަށް ބޭނުންވާ ކަރަންޓު އިއާދަކުރުވަނިވި ހަކަތައިގެ ތެރެއިން ފޯރުކޮށްދިނުމަކީ ވެސް ސަރުކާރުގެ އަމާޒެކެވެ.
(ފޮޓޯ ކްރެޑިޓްސް: ވަގުތު)
ރައީސް ޑރ. މުއިއްޒު ވިދާޅުވީ އެ މަޝްރޫއު ފެށިފައިވާ އިރު، އެކަމަށް ބޭނުންވާ އެއްޗެހި ހަމަޖެހި ރަނގަޅު ހިސާބަކަށް ގޮސްފައިވާ ކަމަށެވެ. “މި އަހަރު ދެން އޮތް ދުވަސްތަކުގައި އިރާދަކުރެއްވިއްޔާ މި ރަށާއި ރާއްޖޭގެ ހުރިހާ ރަށެއްގެ ހުރިހާ ސްކޫލެއްގެ ހުރިހާ ކްލާސްރޫމްތަކެއް އިރާދަކުރެއްވިއްޔާ އަޅުގަނޑުމެން އިއާދަކުރަނިވި ހަކަތައިގެ ބޭނުން ކޮށްގެން އޭސީ ކޮށްދީ، ފިނި ކޮށްދޭނަން. އެކަން އިރާދަކުރެއްވިއްޔާ ހަމަޖެހިގެންދާނެ ކަމުގެ ޔަގީންކަން ތިބޭފުޅުންނަށް އަޅުގަނޑު ދެން،” ރައީސް ވިދާޅުވިއެވެ.
“އަޅުގަނޑުމެން ބޮޑަށް މި އަމާޒު ކުރަނީ ވެސް ވީހާ ވެސް އަވަހަކަށް، ސެޕްޓެމްބަރު މަހާ ހަމައަށް ދާންވާއިރަށް ވެސް ނިންމާލެވޭތޯ. އެއީ ހައެއްކަ މަސް ދުވަސް، އަށެއްކަ މަސް ދުވަސް ބޭނުންވާނެ މުޅި ރާއްޖެ އެއްކޮށް ނިންމާލަން. އެހެންވީމަ އެގޮތަށް އެކަން ކުރިއަށް ގެންދާ ވާހަކަ ދަންނަވާލަން.”
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0