ރަސްގެތީމުގައި ހަގީގީ ތަރައްގީގެ ކުލަ ޖައްސަވާ ދެއްވާނަން: ރައީސް

Read Time:6 Minute, 19 Second

(ފޮޓޯ ކްރެޑިޓްސް: ވަގުތު)

މި އަހަރު ތެރޭގައި ރ. ރަސްގެތީމުގައި ހަގީގީ ތަރައްގީގެ ކުލަ ޖައްސަވާ ދެއްވާނެ ކަމުގެ ޔަގީންކަން ދެއްވާ ކަަމަށާއި، މިރަށަށް ބޭނުންވާ ކަންކަން ނިންމަދީ އޭގެ ގިނަ ކަންކަމުގެ ނިމުން ފާހަގަކުރައްވަން ރައްޔިތުން ބޭނުންވާނަމަ މިރަށަށް އަނެއްކާވެސް ވަޑައިގަތުމަށް އުއްމީދު ކުރައްވާ ކަަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. ރ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ރަސްގެތީމަށް ވަޑައިގެން ރައްޔިތުންނާއި ބައްދަލު ކުރައްވާ ވާހަކަފުޅުދައްކަވަމުން ރައީސް ވިދާޅުވީ، މިރަށުގެ ތަރައްގީއަށް ކުރަން ހުރި ކަންކަން ބާރު ސްޕީޑްގައި މި އަހަރު ކޮށްދިނުމުގެ ފުރިހަމަ ޔަގީންކަން ދެއްވާ ކަމަށެވެ.

މިދިޔަ އަހަރު ތެރޭގައި މުޅި ރާއްޖޭގައިވެސް ސަރުކާރުން ކަންކަން ކުރެވުނު ވަރާއި ނުކުރެވުނު ސަބަބު ހާމަކުރައްވަމުން ރައީސް ވިދާޅުވީ، މި ސަރުކާރުން ގައުމާއި ހަވާލުވެވަޑައިގެންނެވިއިރު، އިގްތިސާދީ ގޮތުން އޮތް ހާލަތުން އަރައިގަތުމަށް ނުހަނު ގިނަ މަސައްކަތްތައް ކުރަން ޖެހުނު ކަމަށާއި، މިހާރުވެސް ގިނަ ކަންކަން ކުރެވެމުންދާ ކަމަށެެވެ. “އެހެންވީމަ އެ މަސައްކަތުގެ ތެރެއިން އައިސް މިހިސާބަށް މި އާދެވުނީ، ނިމިގެންދިޔަ އަހަރާއި ހިލާފަށް މި އަަހަރު ތެރޭގައި، ކެމްޕެއިންގައި އަޅުގަނޑު ދެންނެވި ކަންކަން އަމަލީ ގޮތުން ކޮށްދޭނަން، އެގޮތުގެ މަތިން ބަލާއިރުގައި އަޅުގަނޑު ދެންނެވި ހުރިހާ ކަމެއް މި އަހަރު ތެރޭގައި ފަށާ، ގިނަ ކަންކަން ނިންމާ ދިނުަމަކީ ސަރުކާރުގެ އަޒުމަކީ އަދި ޕްލޭނަކީވެސް،”. ރައީސް ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

ރައީސް ވިދާޅުވީ، މިރަށު ބަނދަރުގެ ގިނަ ކަންކަން ހުރި ކަމަށާއި، އެކަމާއި ގުޅިގެން މަސައްކަތްތަކެއް ކުރެވިގެން ގޮސްފައިވާ ކަމަށެވެ. އެމަނިިކުފާވެވަޑައިގެންނެވި ފަދައިން އެ މަސައްކަތްވެސް މި އަހަރު ތެރޭގައި ކުރައްވާނެ ކަމަށާއި، ސްކޫލް ޖާގަ އިތުރު ކުރުންވެސް މި އަހަރު ތެރޭގައި ކުރިއަށް ދާނެ ކަން ރައީސް ފާހަގަކުރެއްވިއެވެ. އަދި ކުޅިވަރުގެ ދާއިރާއިން ފުޓްސަލް ދަނޑާއި ގުޅިފައިވާ މަޝްރޫއުތަކާއި އަދިވެސް އެފަދަ ގިނަ ކަންކަމުގެ އިތުރުން، ކުނި މެނޭޖް ކުރުމާއި، ފެނާ ނަރުދަމާ މަޝްރޫއުގެ މައްސަލަތައް ހައްލުކޮށްދެއްވުމާއި، ރަށުގެ މައިމަގުތައް ހެދުން ފަދަ ކަންކަންވެސް ހައްލުކޮށްދެއްވާނެ ކަަމަށް ރައީސް ވިދާޅުވިއެވެ. އަދި ކަރަންޓް މައްސަލަތާއި، ސިއްހީ މައްސަލަތައްވެސް ހައްލުކޮށްދެއްވާނެ ކަމަށްވެސް ރައީސް ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

“މި އަހަރު ތެރޭގައި، މި ކަންތައްތައް ކުރިއަށް އޮތް މަސްތަކުގައި ވަރަށް އިސްކަމެއް ދީގެން، މިރަށުގައި ފެށި ނިންމަ ދޭނެކަން، އެކަމުގެ ފުރިހަމަ ޔަގީންކަން އަރުވަން،”. ރައީސް ވިދާޅުވިއެވެ. ރައީސް ވިދާޅުވީ، ކުރިއަށް އޮތް ދުވަސްތަކުގައި، ކައުންސިލާއި ވުޒާރާތަކާއި ކުންފުނިތަކާއި ގުޅިގެން ކަންކަން ތަރުތީބުވެގެން ދާނެ ކަަމަށެވެ. އަދި އޭގެ ނަތީޖާއަކަށް ވެގެން ދާނީ ގިނަ ދުވަސްތަކެއް ވަންދެން މިރަށުގައި ނުކުރެވި ހުރި ކަންކަން މި އަހަރު ނިމިގެންދާއިރު މައްސަލަތައް ހައްލު ކުރެވި، އުފާފަގަތިކަން ލިބި ކުރިއެރުންތައް ލިބިގެން ދިޔުން ކަމަށްވެސް ވިދާޅުވިއެވެ.

“ރަސްގެތީމުގެ ތަރައްގީއަށްޓަކައި ކުރަން މި ހުރި، ހުރިހާ ކަންކަމަކީ ހަމަ އެހެން ކޮންމެ ރަށެކޭ އެއްފަދައިން އެއް ފެންވަރެއްގައި އެއް އިސްކަމެއް ދެވޭ ކަންކަން، އެގޮތުގެ ހަމަ އެކަންކަން ކުރިއަށް ގެންދާނަން،”. ރައީސް ވިދާޅުވިއެވެ.