އެކުގައި މަސައްކަތްކުރުމަށް ހުރި ފުރުސަތުތަކާ ގުޅޭގޮތުން އެސްޓޯނިއާގެ މަޖިލީހުގެ ރައީސްއާ މަޝްވަރާކުރައްވައިފި

Read Time:4 Minute, 26 Second

(ފޮޓޯ ކްރެޑިޓްސް: ރައީސް އޮފީސް)

ދެ ގައުމު އެކުގައި މަސައްކަތްކުރުމަށް ހުރި ފުރުސަތުތަކާއި ގުޅޭގޮތުން އެސްޓޯނިއާގެ ގާނޫނު ހަދާ މަޖިލީހުގެ ރައީސް ލޯރީ ހުއްސާރް އާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަޝްވަރާކުރައްވައިފިއެވެ. ރައީސް މުއިއްޒު އެ މަޝްވަރާތައް ކުރައްވާފައިވަނީ އެސްޓޯނިއާގެ މަޖިލީހުގެ ރައީސް ލޯރީ ހުއްސާރް ރޭ ދެއްވި ފަރިއްކޮޅުގެ ތެރެއިންނެވެ.

(ފޮޓޯ ކްރެޑިޓްސް: ރައީސް އޮފީސް)

ރައީސް އޮފީހުން ވިދާޅުވީ ގާނޫނު ހަދާ މަޖިލިސް “ރިގިކޮގޫ” އަށް ވަޑައިގަތުމުން، ރައީސްއަށް މަރުޙަބާ ވިދާޅުވީ، އެސްޓޯނިއާގެ ގާނޫނު ހަދާ މަޖިލީހުގެ ރައީސް ލޯރީ ހުއްސާރް ކަމަށެވެ. އެ ތާރީހީ ޒިޔާރަތުގައި ދެ ބޭފުޅުން ވަނީ ހަނދާނީ ފޮޓޯއެއް ނަންގަވައިފައި ކަމަށާއި އެއަށްފަހު، ގާނޫނު ހަދާ މަޖިލީހުގެ މެހުމާނުން ސޮއިކުރައްވާ ފޮތުގައި ރައީސް ސޮއިކުރެއްވާފައި ކަމަށް ވިދާޅުވިއެވެ.

ފަރިއްކޮޅު ކުރިއަށްގެންދެވި ވަގުތު ދެ ބޭފުޅުން ވަނީ، ދެ ގައުމުގެ މެދުގައި ގުޅުން ބަދަހިކުރުމާ ގުޅޭގޮތުންނާއި ދެ ގައުމުން ބައިވެރިވެގެން ކުރެވިދާނޭ މަސައްކަތްތަކާ ގުޅޭގޮތުން މަޝްވަރާކުރައްވާފައި ކަމަށް ރައީސް އޮފީހުން ވިދާޅުވިއެވެ. ރައީސް ވަނީ، އާންމު ހިދުމަތްތައް ހަރުދަނާކުރެއްވުމަށް އަޒުމް ކަނޑައަޅުއްވާފައިވާކަން ފާހަގަކުރައްވައި، ރާއްޖެއަށް ޓަކައި އެމަނިކުފާނު ގެންގުޅުއްވާ ތަރައްގީގެ އެޖެންޑާގެ މައްޗަށް އަލިއަޅުވައިލައްވާފައި ކަމަށް ވެސް އެ އޮފީހުން ވިދާޅުވެއެވެ. އަދި ދެ ގައުމުން ހިއްސާކުރާ ލަނޑުދަނޑިތައް ހާސިލުލުކުރުމަށް އެކުގައި މަސައްކަތްކުރުމަށް ހުރި ފުރުސަތުތަކުގެ މައްޗަށް ވެސް ދެ ބޭފުޅުން މަޝްވަރާކުރެއްވިއެވެ.

(ފޮޓޯ ކްރެޑިޓްސް: ރައީސް އޮފީސް)

ރައީސް އޮފީހުން ވިދާޅުވީ އީ-ވޯޓިން އާއި އެ ނޫން ވެސް އީޖާދީ ފަންނިއްޔާތުގެ އުފެއްދުންތަކުގެ ތެރެއިން ޑިޖިޓަލް ގަވާނަންސްގެ ދާއިރާއިން އެސްޓޯނިއާ ހޯދާފައިވާ ކާމިޔާބީތަކާ ގުޅޭގޮތުން ދެކެވަޑައިގަންނަވާ ގޮތް، ގާނޫނު ހަދާ މަޖިލީހުގެ ރައީސް ލޯރީ ހުއްސާރް ހިއްސާކުރެއްވި ކަމަށެވެ. މަޝްވަރާތައް ނިންމަވާލައްވާފައިވަނީ، ބައިނަލްއަގްވަމީ ސުލްޙަ މަސަލަސްކަމާއި ސަލާމަތާ ގުޅޭގޮތުން ދެ ގައުމުން ހިއްސާކުރާ ކަންބޮޑުވުންތައް ފާހަގަކުރައްވައި، ބައިނަލްއަގްވާމީ މައިދާނުގައި ދެ ގައުމު އެކުގައި މަސައްކަތްކުރުމުގެ އަޒުމު އައުކުރައްވަމުން ކަމަށް ރައީސް އޮފީހުން ވިދާޅުވެއެވެ.