ރާއްޖެ އާއި އެސްޓޯނިއާ ދެމެދު ސިޔާސީ މަޝްވަރާ އާއި ސައިބާ ސެކިއުރިޓީއާ ގުޅޭ އެއްބަސްވުމަކަށް

Read Time:3 Minute, 6 Second

(ފޮޓޯ ކްރެޑިޓްސް: ފޮރިން މިނިސްޓްރީ)

ރާއްޖެ އާއި އެސްޓޯނިއާ ދެމެދު ޕޮލިޓިކަލް ކޮންސަލްޓޭޝް (ސިޔާސީ މަޝްވަރާ) ބޭއްވުމަަށާއި އިންފޮމޭޝަން ޓެކްނޮލޮޖީ، އާޓިފިޝަލް އިންޓެލިޖެންސް ސްމާޓް ޓެކްނޮލޮޖީ އަދި ސައިބާ ސެކިއުރިޓީގެ ދާއިރާއިން އެއްބާރުލުން ދިނުމަށް ދެ ގައުމުގެ ދެމެދުގައި އެއްބަސްވުމެއްގައި ސޮއިކޮށްފިއެވެ. އެސްޓޯނިއާގެ ރައީސް ޑރ.އަލާރް ކަރިސްގެ ދައުވަތަކަށް ކުރައްވާ ރަސްމީ ދަތުރުފުޅެއްގައި ރައީސް ޑރ. މުހައްމަދު މުއިއްޒާއި ވަޒީރުންގެ މަޖިލީހުގެ ޓީމެއް ހިމެނޭ ގޮތަށް އެ ގައުމަށް ވަޑައިގެން އެ ގައުމުގެ ސަރުކާރާއި އެކި ދާއިރާތަކުން ދަނީ ގުޅުން ބަދަހި ކުރަމުންނެވެ.

މިގޮތުން މިއަދު ހާރިޖީ ވަޒީރު ޑރ. ޢަބްދުﷲ ޙަލީލް ރާއްޖެ އާއި އެސްޓޯނިއާ ދެމެދު ޕޮލިޓިކަލް ކޮންސިއުލޭޝަން ގާއިމް ކުރުމަށް އެއްބަސްވުމެއްގައި ސޮއި ކުރެއްވިއިރު، ހާރިޖީ ވުޒާރާއިން ވިދާޅުވީ، މި އެއްބަސްވުމަކީ ރާއްޖެއާއި އެސްޓޯނިއާގެ ގުޅުން އިތުރަށް ހަރުދަނާކޮށް، ކުރިއަށް އޮތް އަހަރުތަކުގައިވެސް މަޝްވަރާކޮށް، ގުޅުން ބަދަހިކުރުމަށް އެޅުނު މުހިންމު ފިޔަވަޅެއް ކަމަށެވެ.

(ފޮޓޯ ކްރެޑިޓްސް: ފޮރިން މިނިސްޓްރީ)

އަދި އިންފޮމޭޝަން ޓެކްނޮލޮޖީ، އާޓިފިޝަލް އިންޓެލިޖެންސް ސްމާޓް ޓެކްނޮލޮޖީ އަދި ސައިބާ ސެކިއުރިޓީގެ ދާއިރާއިން އެއްބާރުލުން ދިނުމުގެ އެއްބަސްވުމުގައި ރާއްޖެއާއި އެސްޓޯނިއާއާ ދެމެދު ސޮއި ކުރެއްވިއިރު، ރާއްޖޭގެ ފަރާތުން މި އެއްބަސްވުމުގައި ސޮއިކުރެއްވީ ދާހިލީ ސަލާމަތާއި ފަންނިޔަތާއި ބެހޭ ވަޒީރު އަލީ އިހުސާނެވެ. އަދި އެ ގައުމުގެ ފަރާތުން ސޮއިކުރެއްވީ މިނިސްޓަރ އޮފް ޖަސްޓިސް އެންޑް ޑިޖިޓަލް އެފެއާޒް ލިސާ-ލީ ޕަކޮސްޓާއެވެ.