ސިއްހީ ދާއިރާ ޑިޖިޓަލައިޒްކޮށް ވަރުގަދަކުރަން އެސްޓޯނިއާއެކު މުހިއްމު މަޝްވަރާތަކެއް ރައީސް ކުރައްވައިފި

Read Time:2 Minute, 59 Second

(ފޮޓޯ ކްރެޑިޓްސް: ރައީސް އޮފީސް)

ސިއްހީ ދާއިރާ ޑިޖިޓަލައިޒްކުރުމަށް ކުރެވޭނެ ކަންކަމާ ގުޅޭގޮތުން، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، އެސްޓޯނިޔާގެ ހެލްތު މިނިސްޓަރާއެކު މަޝްވަރާތަކެއް ކުރައްވައިފިއެވެ. މި މަޝްވަރާތައް ކުރައްވާފައިވަނީ ރައީސުލްޖުމްހޫރިއްޔާ މިހާރު އެސްޓޯނިޔާ އަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން، އެގައުމުގެ ހެލްތު މިނިސްޓަރު، ރައީސްގެ އަރިހަށް ކުރެއްވި އިހުތިރާމުގެ ޒިޔާރަތުގައެވެ. ރައީސުލްޖުމްހޫރިއްޔާގެ އޮފީހުން ވިދާޅުވީ މި މަޝްވަރާތަކުގައި އެސްޓޯނިޔާ އިން ސިއްހީ ދާއިރާ ޑިޖިޓަލައިޒްކޮށް، ސިއްހީ ދާއިރާ އިތުރަށް ތަރައްގީކޮށް ވަރުގަދަކުރުމަށް ކުރި މަސައްކަތްތަކުގެ މައުލޫމާތު، ރައީސް ވަނީ އޮޅުންފިލުއްވާފައެވެ.

(ފޮޓޯ ކްރެޑިޓްސް: ރައީސް އޮފީސް)

ހަމައެހެންމެ، އެސްޓޯނިޔާގެ މަސައްކަތްތަކުން ފިލާވަޅު ލިބިގަނެ، ދިވެހިރާއްޖޭގެ ސިއްހީ ނިޒާމު ޑިޖިޓަލައިޒްކޮށް، ރައްޔިތުންނަށް ސިއްހީ ހިދުމަށް ފޯރުކޮށްދިނުން އިތުރަށް ފުރިހަމަކުރެވޭނެ ގޮތްތަކާ ބެހޭގޮތުންވެސް ރައީސް އަދި އެގައުމުގެ ހެލްތު މިނިސްޓަރު ވަނީ މަޝްވަރާކުރައްވާފައެވެ. މި ބައްދަލުކުރެއްވުމުގައި، ރައީސްގެ އަރިހުގައި ހާރިޖީ ވަޒީރު އަބްދުﷲ ޚަލީލު އަދި ދާހިލީ ސަލާމަތާއި ފަންނިއްޔާތާ ބެހޭ ވަޒީރު، އަލީ އިހުސާންވެސް ބައިވެރިވެވަޑައިގަންނަވާފައިވެއެވެ.

އެސްޓޯނިޔާ އަކީ ޑިޖިޓަލް ދުނިޔޭގައި އެންމެ ކުރިއަރާފައިވާ އެއް ޤައުމަށްވާއިރު، ރައީސް މިއަދު ވަނީ އެގައުމުގެ ރައީސްގެ ޑިޖިޓަލް އެޑްވައިޒަރީ ކައުންސިލާވެސް ބައްދަލުކުރައްވާފައެވެ.