ރައީސްގެ އެސްޓޯނިޔާ ދަތުރުފުޅުގައި “ޑިޖިޓަލް މޯލްޑިވްސް” އަކަށް ވާސިލުވުމުގެ މުޙިއްމު މަޝްވަރާތަކެއް!

Read Time:3 Minute, 8 Second

(ފޮޓޯ ކްރެޑިޓްސް: ރައީސް އޮފީސް)

ރައީސުލްޖުމްހޫއްރިއްޔާ، ޑރ. މުޙައްމަދު މުއިއްޒު، އެސްޓޯނިޔާގެ ރައީސްގެ ޑިޖިޓަލް އެޑްވައިޒަރީ ކައުންސިލާއެކު ހާއްސަ މަޝްވަރާތަކެއް ކުރިއަށްގެންދަވައިފިއެވެ. މި ރައުންޑޭޓަބަލް މަޝްވަރާ ބައްދަލުކުރެއްވުން ކުރިއަށް ގެންގޮސްފައިވަނީ ރައީސް މިހާރު އެސްޓޯނިޔާ އަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، އެސްޓޯނިޔާގެ ރައީސް އަލަރް ކަރިސް އަށް، ޑިޖިޓަލް ކަންކަމުގައި ލަފާ އަރުއްވާ ކައުންސިލާއެކު، ރައީސް މުއިއްޒު ވަނީ ވަރަށް ފުންކޮށް މަޝްވަރާކުރައްވާފައެވެ. އެގޮތުން، “ޑިޖިޓަލް މޯލްޑިވްސް” އަކަށް ރައީސް ކުރައްވާ ތަސައްވަރާ ގުޅޭގޮތުން މުހިއްމު މަޝްވަރާތަކެއް ކުރައްވާފައިވެއެވެ.

(ފޮޓޯ ކްރެޑިޓްސް: ރައީސް އޮފީސް)

މީގެއިތުރުންވެސް، ރައީސް އޮފީހުން ވިދާޅުވީ މި މަޝްވަރާތަކުގެ ތެރެއިން ރައްޔިތުންނަށް ފޯރުކޮށްދޭ ޑިޖިޓަލް ސޮލިއުޝަންތަކަކީ ހުރިހާ ރައްޔިތުންނަށްވެސް ފަސޭހައިން ލިބޭ އަދި ދެމެހެއްޓެނިވި ކަންކަމަށް ހެދުމަށާއި، ރާއްޖޭގެ މުސްތަޤުބަލު ބައްޓަންކުރުމުގައި ވިލުންތެރި ކަންކަމަށް ހެދުމަށް ވާހަކަ ދެއްކެވިފައިވާ ކަމަށެވެ. އެސްޓޯނިޔާ އަކީ ޑިޖިޓަލް ދާއިރާއިން ދުނިޔޭގައި އެންމެ ކުރިއަރާފައިވާ އެއް ޤައުމުކަމަށްވާއިރު، އެޤައުމުގެ ސަރުކާރުން ފޯރުކޮށްދޭ ގިނަ އާއްމު ޚިދުމަތްތަކަކީ ޑިޖިޓަލް މަންސަތަކުގެ ތެރެއިން ފަސޭހަކަމާއެކު ރައްޔިތުންނަށް ފޯރުކޮށްދޭ ޚިދުމަތްތަކެކެވެ.

މި ދަތުރުފުޅުގެ ތެރެއިން ރައީސް މިއަދު ވަނީ އެޤައުމުގެ “އީ-އެސްޓޯނިޔާ ބްރީފިންގ ސެންޓަރ” އަށްވެސް ވަޑައިގެންފައެވެ.