އަޒަރުބައިޖާންގެ ވަފުދަށް ރާއްޖޭގައި ހުރި އިންވެސްޓްމެންޓްގެ ފުރުސަތުތައް ކިޔާ ދީފި

Read Time:3 Minute, 33 Second

ރާއްޖެއަށް ޒިޔާރަތްކުރި އަޒަރުބައިޖާންގެ ވަފުދަށް ހާއްސަކޮށް ބައިލެޓްރަލް ކޮންސަލްޓޭޝަންގެ ފުރަތަމަ ބައްދަލުވުން ބާއްވައިފިއެވެ. މިއީ މިދިޔަ ނޮވެމްބަރު މަހުގެ ތެރޭގައި ރައީސް ޑރ.މުހައްމަދު މުއިއްޒު ސީ.އޯ.ޕީ.29 ގައި ބައިވެރިވެވަޑައިގަތުމަށް ބާކޫއަށް ކުރެއްވި ދަތުރުފުޅުގައި ބޭއްވެވި މަތީ ފަންތީގެ މަޝްވަރާތަކުގެ ފޮލޯއަޕްގެ ގޮތުން ޒިޔާރަތްކުރެއްވި ވަފުދެކެވެ.

ފޮރިން މިނިސްޓްރީން ނެރުނު ބަޔާނެއްގައި ވިދާޅުވީ އަޒަރުބައިޖާނަށް ޒިޔާރަތްކުރައްވާ މަތީ ފަންތީގެ ވަފުދަށް ރާއްޖޭގެ ފޮރިން މިނިސްޓްރީން އެކި ދާއިރާތަކުން ރާއްޖޭގައި ހުރި އިންވެސްޓްމަންޓް ފުރުސަތުތައް ދައްކާލުމުގެ މަގްސަދުގައި އިންފޮމޭޝަން ފޯރަމެއް ކާމިޔާބުކަމާއެކު ބާއްވާފައިވާ ކަމަށެވެ.

އަޒަރުބައިޖާންގެ ޚާރިޖީ ވަޒީރުގެ ނައިބު އެލްނޫރު މަމަޑޯވް އިސްވެ ހުންނަވާ މި ވަފުދުގައި ހިމެނިވަޑައިގަންނަވަނީ ސަރުކާރުގެ އޮފިޝަލުންނާއި އަޒަރުބައިޖާންގެ މަޝްހޫރު ކުންފުނިތަކުގެ މަންދޫބުންނެވެ. މި ފޯރަމަކީ 2025 ވަނަ އަހަރުގެ ޖެނުއަރީ މަހުގެ 13 އިން 16 އަށް ވަފުދުން ރާއްޖެއަށް ކުރައްވަމުން ގެންދަވާ ދަތުރުފުޅުގައި އެންމެ ފާހަގަކޮށްލެވޭ އެއް ހަރަކާތެވެ. މި ޕްރެޒެންޓޭޝަންތަކުގައި މައިގަނޑު ގޮތެއްގައި އަލިއަޅުވާލާފައިވަނީ ސެކްޓަރ ސްޕެސިފިކް އިންވެސްޓްމަންޓް ފުރުޞަތުތަކުގެ ދާއިރާއިންނެވެ.

މި ދަތުރުފުޅުގައި އަޒަރުބައިޖާން ސަރުކާރުގެ ކަމާބެހޭ ވުޒާރާތަކުގެ އިސް ބޭފުޅުންނާއި، އަޒަރުބައިޖާންގެ އެކްސްޕޯޓް އެންޑް އިންވެސްޓްމަންޓް ޕްރޮމޯޝަން އޭޖެންސީ (އަޒްޕްރޯމޯ)ގެ އިސްވެރިންނާއި އާއި ޕްރައިވެޓް ސެކްޓާގެ މަންދޫބުން ހިމެނިވަޑައިގަންނަވައެވެ. މި ވަފްދުގެ ދަތުރުފުޅުގައި ދިވެހި ސަރުކާރުގެ ކަމާބެހޭ ވުޒާރާތަކާއި މަޝްވަރާކުރައްވައި، ރާއްޖޭގައި ހުރި އިންވެސްޓްމަންޓްގެ ފުރުސަތުތައް ދެނެގަތުމަށް ވެސް ވަނީ ހަމަޖެހިފައެވެ.