ދެކުނު ކޮރެއާގައި ފްލައިޓެއް ވެއްޓި ހިނގި ހާދިސާއާ ގުޅިގެން ރައީސްގެ ތަޢުޒިޔާ

Read Time:4 Minute, 14 Second

ދެކުނު ކޮރެއާގެ ފްލައިޓެއް ވެއްޓި ހިނގި ހާދިސާއާ ގުޅިގެން ރައީސުލްޖުމްޙޫރިއްޔާ ޑރ. މުޙައްމަދު މުޢިއްޒު އެ ޤައުމުގެ ވަގުތީ ރައީސް ޗޮއި ކޮރެއާގެ ވަގުތީ ރައީސް ޗޮއި ސަންގ-މޮކްއަށް ހަމްދަރުދީގެ މެސެޖެއް ފޮނުއްވައިފިއެވެ. ރައީސުލްޖުމްހޫރިއްޔާ ފޮނުއްވެވި ތައުޒިޔާގެ މެސެޖުގައި ވިދާޅުވީ މުއާން އިންޓަނޭޝަނަލް އެއަރޕޯޓުގައި ފްލައިޓެއް ވެއްޓި ހިނގި ހިތާމަވެރި ހާދިސާގެ ޚަބަރު އެއްސެވީ ހައިރާންކަމާއި ފުން ހިތާމައާއެކުގައިކަމަށެވެ.

ރައީސުލްޖުމްހޫރިއްޔާ ފޮނުއްވި މެސެޖުގައި، މުއާން އިންޓަރނޭޝަނަލް އެއަރޕޯޓަށް މަތިންދާބޯޓު ވެއްޓި ހިނގާދިޔަ ހިތާމަވެރި ހާދިސާގެ ސަބަބުން އެތައް ބަޔަކު މަރުވި ޚަބަރު އެއްސެވީ ކުއްލި ހައިރާންކަމާއި ފުންހިތާމައާ އެކުގައި ކަމުގައި ވިދާޅުވެފައިވެއެވެ. އެ މަނިކުފާނުގެ މެސެޖުގައި، މި ހާދިސާގައި މަރުވި މީހުންގެ އާއިލާތަކަށާއި ކޮރެއާ ސަރުކާރަށާއި ރައްޔިތުންނަށް، ޚާއްޞަގޮތެއްގައި މި ހާދިސާގެ ސަބަބުން އަސަރުކުރި ފަރާތްތަކަށް ވަރަށް އިޚްލާޞްތެރިކަމާއެކު ތަޢުޒިޔާ ވިދާޅުވެފައިވެއެވެ.

ރައީސުލްޖުމްހޫރިއްޔާ ފޮނުއްވި މެސެޖު ނިންމަވާލައްވާފައިވަނީ މި ހާދިސާގެ ސަބަބުން ދިމާވި ގެއްލުންތަކުން އަރައިގަތުމަށް ކުރެވެމުންދާ މަސައްކަތްތަކުން ކާމިޔާބު ލިބުމަށް އެދިވަޑައިގެން، އެކަމުން އަރައިގަތުމުގެ ހިއްވަރާއި ސާބިތުކަމަށް އެދިވަޑައިގަންނަވަމުންނެވެ.

ދެކުނު ކޮރެއާގެ ޖޭޖޫ އެއަރގެ މަތިންދާބޯޓެއް، ޖެއްސުމުގެ ތެރެއިން އަލިފާން ރޯވެ ހިނގި ހާދިސާގައި، 179 މީހުން ވަނީ މަރުވެފައެވެ. ސަލާމަތްވީ ދެ ފަޅުވެރިން ކަމަށް ރިޕޯޓުތައް ބުނެއެވެ. މި ހާދިސާ ހިނގި ވަގުތު ނަގާފައިވާ ވީޑިޔޯތަކުން ފެންނަނީ، ލޭންޑިންގ ގިޔަރ ނުވަތަ އެއްގަމުގައި ދަތުރުކުރުމަށް ބޭނުންކުރާ ފުރޮޅުތަކާ ނުލައި، ރަންވޭގައި މަތިންދާބޯޓު ޖައްސަން މަސައްކަތް ކުރަމުންދިޔަ މަންޒަރެވެ. ނަމަވެސް، ރަންވޭއިން ބޭރަށް ކަހާލައި މަތިންދާބޯޓު ޖެހިފައި ވަނީ ވައިގެ ބަނދަރުގައި ހުރި އިމާރާތެއްގެ ފާރުގައެވެ.

މިއީ، ދެކުނު ކޮރެޔާގެ ތާރީހުގައިވެސް ހިނގާފައިވާ އެންމެ ނުރައްކާތެރި ވައިގެ ހާދިސާއެވެ. އަދި، ފާއިތުވި ތިން ދަހަރެއްހާ ދުވަހުގެ ތެރޭގައި އެ ޤައުމުގެ އެއަރލައިނަކަށް ކުރިމަތިވި އެންމެ ނުރައްކާތެރި ހާދިސާކަމަށްވެސް ރިޕޯޓުތައް ބުނެއެވެ.