އިހަވަންދިއްޕޮޅު ގޭޓުން ބޭރުގެ ޔޮޓަކަށް ކްލިއަރެންސް ދީފި

Read Time:3 Minute, 31 Second

އިހަވަންދިއްޕޮޅުގައި “އިންޓަނޭޝަލް ޝިޕް އެންޑު ޕޯޓު ސެކިއުރިޓީ ގޭޓް” އަށް ވަތް ޔޮޓަކަށް ކްލިއަރެންސް ހިދުމަތް ދީފިއެވެ. މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ މުހައްމަދު ވަޖީހް މިއަދު ވިދާޅުވީ އިހަވަންދިއްޕޮޅުގައި އެ ކުންފުނިން ގާއިމުކޮށްފައިވާ ގޭޓުން ހިދުމަތް ހޯދުމަށް ބޭނުންވި ރާއްޖެ އިން ބޭރުގެ ޔޮޓަކަށް ކްލިއަރެންސްގެ ހިދުމަތްދީ ނިންމާލެވިފައިވާ ކަމަށެވެ.

ވަޖީހު ވިދާޅުވި ގޮތުގައި މިއީ ފަތުރުވެރިން ގޮވައިގެން ރާއްޖެ އައި ޔޮޓެކެވެ.

ވަޖީހު ވިދާޅުވީ މިދުވަސްވަރު ރާއްޖެ އަށް ފަތުރުވެރިން ގޮވައިގެން ގިނަ އަދަދަކަށް ޔޮޓުފަހަރު ދަތުރު ކުރާނެ ކަމަށް ބެލެވޭތީ، ޔޮޓު ފަހަރަށް ބޭނުންވާ ފުރިހަމަ ހިދުމަތްތައް ފޯރުކޮށްދިނުމަށް އެމްޕީއެލް އިން ތައްޔާރުވެފައިވާ ކަމަށެވެ.

އިހަވަންދިއްޕޮޅުގައި ބައިނަލްއަގުވާމީ ބަންކަރިންގެ ހިދުމަތް ފެށުމަށް އެސްޓީއޯ އިން 15-20 މިލިއަން ޑޮލަރާ ދެމެދުގެ އަދަދެއް އިންވެސްޓްކޮށްފައިވެއެވެ. އެ ހިދުމަތް ރާއްޖޭގައި ފަށާފައިވަނީ ބަންކަރިންގެ ހިދުމަތް ފުޅާ ދާއިރާއެއްގައި ކުރާ ބައިނަލްއަގުވާމީ ކުންފުންޏެއްކަމަށްވާ ވިޓޯލްއާ ގުޅިގެންނެވެ.

ބަންކަރިންގެ ހިދުމަތް ފެށުމަށް ބޭއްވި ރަސްމިއްޔާތުގައި އިކޮނޮމިކް މިނިސްޓަރު މުހައްމަދު ސައީދު ވިދާޅުވީ، ރާާއްޖެ އޮތް ސަރަހައްދަކީ މުހިންމު ސަރަހަދެއް ކަމަށާއި މި ސަރަހައްދުން ދުވާލަކު 300 އެއްހާ ބޯޓު ހުރަސްކުރާއިރު އޭގެ ކުޑަ އިންސައްތައް ރާއްޖެއަށް ލިބިގެންދިއުމަކީ ވެސް ކުރިއެރުމެއް ކަމަށެވެ.

ބަންކަރިން ހިދުމަތް އިތުރަށް ފުޅާކޮށް ހޯރަފުށީގައި ބިން ހިއްކައިގެން ތެޔޮ ޓާމިނަލަކާއި ކޮންޓެއިނާ ޓާމިނަލެއް އެޅުމަށް ވަނީ ހަމަޖެހިފައެވެ. އަދި ހއ. އުލިގަމުގައި ޔޮޓް މެރީނާއެއް ތަރައްގީ ކުރުމަށް ހަމަޖެހިފައިވާ އިރު، އެ ކަމަށް ހަ ފަރާތަކުން މިހާރު ވަނީ ޝައުގުވެރިކަން ވެސް ފާޅުކޮށްފައެވެ.