ފެނަކަ ހެޑް އޮފީސް ހިންގަން އިމާރާތެއް އަލުން ހޯދަނީ

Read Time:4 Minute, 9 Second

ފެނަކަ ކޯޕަރޭޝަނުން އެ ކުންފުނީގެ ހެޑް އޮފީސް ހިންގާނެ އިމާރާތެއް ކުއްޔަށް ހޯދުމަށް އިއުލާންކޮށްފިއެވެ. މި އިއުލާނުގައިވާ ގޮތުން، ފެނަކައިން ބޭނުންވަނީ ފަސް އަހަރުގެ މުއްދަތަށް، 10،000 އަކަފޫޓަށް ވުރެ ކުޑަނޫން އިމާރާތެކެވެ.

އެ ކޯޕަރޭޝަނުން ކުރި އިއުލާނެއްގައިވާ ގޮތުން މި ބީލަމުގައި ބައިވެރިވުމަށް ޝައުގުވެރިވާ ފަރާތްތަކަށް ބީލަން ހުށަހެޅުމުގެ ފުރުސަތު އަންނަ މަހުގެ 12 ވަނަ ދުވަހާ ހަމައަށް ހުޅުވާލާފައިވެއެވެ. ބީލަމުގައި ބައިވެރިވާން ރަޖިސްޓްރީވުމުގެ ސުންގަޑިއަކީ އަންނަ މަހުގެ 9 ވަނަ ދުވަހެވެ. ރަޖިސްޓްރީވުމަށް ބޭނުންވާ ފަރާތްތަކުން ފުރިހަމަ މައުލޫމާތު [email protected] އަށް ފޮނުވަން ޖެހޭނެއެވެ.

ބީލަމުގައި ބައިވެރިވާ ފަރާތްތަކުން ބިޑް ސެކިއުރިޓީގެ ގޮތުގައި 100،000 ރުފިޔާ ހުށަހަޅަންޖެހޭނެއެވެ. ފެނަކައިން މީގެކުރިންވެސް ވަނީ އިމާރާތެއް ކުއްޔަށް ހިފުމަށް އިއުލާންކޮށްފައެވެ. ނަމަވެސް ކުރިން ކުރި އިއުލާނާ ގުޅިގެން އެކަށީގެންވާ ތަރުހީބެއް ލިބިފައި ނުވާތީ އަނެއްކާވެސް އިއުލާންކުރީއެވެ. މިއީ ފެނަކައިން މިކަމަށް ކުރާ ދެވަނަ އިއުލާނެވެ.

ފެނަކައަކީ ސަރުކާރުގެ ކުންފުނިތަކުގެ ތެރެއިން މާލީ ހާލަތު އެންމެ ދަށް އެއް ކުންފުނި ކަމަށް ފާހަގަކުރެވެއެވެ. މި ކުންފުނީގެ މާލީ ހާލަތު ދަށްވެފައިވާ މައިގަނޑު ސަބަބުތަކުގެ ތެރޭގައި ކަރަންޓުގެ ޚިދުމަތް ދިނުމުގައި ލިބޭ ގެއްލުމާއި، ބައެއް ރަށްރަށުން ކަރަންޓު ބިލަށް ލިބެންޖެހޭ ފައިސާ ނުލިބި ލަސްވުން ހިމެނެއެވެ.

ފެނަކައިގެ ހެޑް އޮފީސް މިހާރު ހިންގަމުންދަނީ މާލޭގައި ހުރި އިމާރާތެއްގައެވެ. ނަމަވެސް، އެ އިމާރާތުގެ ކުލީގެ މުއްދަތު ވަނީ ހަމަވެފައެވެ.

ފެނަކަ ކޯޕަރޭޝަނުގެ މާލީ ހާލަތު ރަނގަޅުކުރުމަށް ސަރުކާރުން އެކި ފިޔަވަޅުތައް އަޅަމުންދާކަން ފާހަގަކުރެވެއެވެ. މީގެ ތެރޭގައި ކުންފުނީގެ ހިންގުން ހަރުދަނާކުރުމާއި، ޚަރަދުތައް ކުޑަކުރުމުގެ ސިޔާސަތުތައް ތަންފީޒުކުރުން ހިމެނެއެވެ. އަދި ކަރަންޓުގެ ޚިދުމަތް ދިނުމުގައި ދިމާވާ ގެއްލުން ކުޑަކުރުމަށް އާ ޓެކްނޮލޮޖީ ތަޢާރަފުކުރުމުގެ މަސައްކަތްތަކެއް ވެސް ކުރިއަށްދާ ކަމަށް މަޢުލޫމާތު ލިބެއެވެ. ނަމަވެސް، މި ފިޔަވަޅުތަކުގެ ނަތީޖާ ފެންނަން ފަށާނީ ދިގު މުއްދަތެއްގެ ތެރޭގައި ކަމަށް ބެލެވެއެވެ.