ޑރ. މަންމޯހަން ސިންގްގެ ތައުޒިޔާގެ ދަފްތަރުގައި ރައީސް ސޮއިކުރައްވައިފި

Read Time:3 Minute, 40 Second

ޑިސެމްބަރު 26، 2024 ގައި އަވަހާރަވި އިންޑިއާގެ ކުރީގެ ބޮޑުވަޒީރު ޑރ މަންމޯހަން ސިންގް އަވަހާރަވުމާ ގުޅިގެން ރާއްޖޭގައި ހުންނަ އިންޑިއާ ހައިކޮމިޝަންގައި ހުޅުވި ތައުޒިޔާ ދަފްތަރުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ސޮއިކުރައްވައިފިއެވެ.

ޑރ މަންމޯހަން ސިންގް އަވަހާރަވުމާ ގުޅިގެން ރައީސުލްޖުމްހޫރިއްޔާ ފޮނުއްވި މެސެޖުގައި ވިދާޅުވީ ޑޮކްޓަރ މަންމޯހަން ސިންޙަކީ ވަރަށް މޮޅު ސިޔާސީ ބޭފުޅެއްކަމަށާއި، 2011 ވަނަ އަހަރުގެ ނޮވެމްބަރު މަހު ޑޮކްޓަރ ސިންގް ރާއްޖެއަށް ކުރެއްވި ތާރީޚީ ދަތުރުފުޅުގެ ހަނދާންތައް އާކުރެއްވިއެވެ. ޑރ. ސިންގްގެ ލީޑަރޝިޕްގެ ދަށުން “ލުކް އީސްޓް ޕޮލިސީ” ހަރުދަނާ ކުރެއްވުމަށް ކުރެއްވި މަސައްކަތްތަކަކީ ދެކުނު އޭޝިއާ ސަރަޙައްދުގެ އެކި ކަންކޮޅުތަކުގައި ތަރައްޤީއާއި އެއްބާރުލުން އިތުރުކުރުމުގައި ވަރަށް މުހިންމު ދައުރެއް އަދާކުރި ކަމެއްގެ ގޮތުގައި ރައީސް މުޢިއްޒު ފާހަގަކުރައްވާފައިވެއެވެ.

މި މެސެޖުގައި، މި ދަނޑިވަޅުގައި، ޑޮކްޓަރ ސިންގްގެ ޢާއިލާއަށާއި، އިންޑިޔާގެ ސަރުކާރަށާއި ރައްޔިތުންނަށް، ދިވެހި ސަރުކާރާއި ރައްޔިތުންގެ ނަމުގައި ހަމްދަރުދީ ފޮނުއްވާފައިވެއެވެ. ސިއްހީ ހާލުކޮޅު ގޯސްވެގެން 26 ޑިސެމްބަރު 2024 ވަނަ ދުވަހުގެ ރޭ އެއިމްސް ދިއްލީގައި އެޑްމިޓްކޮށްގެން ފަރުވާ ދެއްވިއިރު، އެ ހޮސްޕިޓަލުން ވަނީ އެމަނިކުފާނު އަވަރާވީ އުމުރުން ދުވަސްވުމުން ދިމާވި ސިއްހީ ހާލަތްތަކާ ގުޅިގެން ކަމަށް ބުނެފައެވެ.

ވަރުގަދަ އިގްތިސާދީ މާހިރެއްގެ ގޮތުގައި މަޝްހޫރުވި މަންމޯހަން ސިންގްއަކީ އިންޑިއާގެ އިގްތިސާދީ އިސްލާހުތަކުގެ “ބައްޕަ”އެވެ. ސިންގް 2004 ވަނަ އަހަރުން ފެށިގެން 2014 ވަނަ އަހަރާ ހަމައަށް ބޮޑުވަޒީރުކަން ކުރެއްވިއެވެ. އަދި 1990 ގެ އަހަރުތަކުގެ ކުރީކޮޅު ފިނޭންސް މިނިސްޓަރުކަން ކުރެއްވިރު، އެ ދުވަސްވަރު އެމަނިކުފާނު ގެންގުޅުއްވި ސިޔާސަތުތަކުގެ ސަބަބުން އިގްތިސާދީ ލުއިކަމާއި ގްލޯބަލައިޒޭޝަންގެ މަގަށް އިންޑިއާ ދަތުރުކުރިއެވެ.