ޖެނިފާއަށް ވަޒީފާ އާއި ބަދަލު ދިނުން މަޑުޖައްސާލަން ހައި ކޯޓުން އަންގައިފި

Read Time:3 Minute, 34 Second

(ފޮޓޯ ކްރެޑިޓްސް: ވަގުތު)

އައިލެންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރުގެ މަގާމުގައި ހުންނެވި އައިޝަތު ޖެނިފާ ވަކިކުރީ ގާނޫނާ ހިލާފަށް ކަމަށް ކަނޑައަޅައި، އޭނާ އަށް އަލުން ވަޒީފާ ދިނުމަށް ވަޒީފާއާ ބެހޭ ޓްރައިބިއުނަލުން ކުރި ހުކުމް ތަންފީޒުކުރުން މަޑުޖައްސާލަން ހައި ކޯޓުން އަމުރުކޮށްފިއެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އައިލެންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރުގެ މަގާމަށް ޖެނިފާ އައްޔަންކުރީ ޑިސެމްބަރު 18 ގައެވެ. އަދި ކުންފުނީގެ ބޯޑުގެ ބައްދަލުވުމެއްގައި ޖެނިފާ ވަކިކޮށްފައި ވަނީ މި އަހަރުގެ ޖެނުއަރީ މަހުގެ ތެރޭގައެވެ.

އެހެންވެ، އެ މައްސަލަ ޖެނިފާ ވަނީ ވަޒީފާއާ ބެހޭ ޓްރައިބިއުނަލަށް ހުށަހަޅުއްވައިފައެވެ. މިދިޔަ އޮކްޓޯބަރު 13 ވަނަ ދުވަހު، ވަޒީފާއާ ބެހޭ ޓްރައިބިއުނަލުން ކުރި ހުކުމްގައިވަނީ ޖެނިފާ މަގާމުން ވަކިކުރީ ވަޒީފާ އިން ވަކިކުރަން ޖެހޭ ފަދަ ހާލަތެއް މެދުވެރިވެގެން ނޫން ކަމަށެވެ. އަދި އޭނާ ވަކިކުރީ މައުލޫއީ އަދުލުވެރިކަމާއި އިޖުރާއީ އަދުލުވެރިކަން ގާއިމް ކުރުމެއް ނެތި ކަމަށް ހުކުމްގައިވެއެވެ.

އެހެންކަމުން، ޖެނިފާގެ ވަޒީފާ އަލުން ރުޖޫއަކޮށް، ވަޒީފާއިން ވަކި ކުރި ތާރީހުން ފެށިގެން މައްސަލަ ނިމުނު ތާރީހާ ހަމައަށް ހޭދަވި މުއްދަތަށް ހައްގުވާ މުސާރަ އާއި އިނާޔަތްތައް ދިނުމަށް ވެސް ޓްރައިބިއުނަލުން ވަނީ އަމުރުކޮށްފައެވެ. އަދި ވަޒީފާ އިން ވަކިކޮށްފައިވާތީ ގެއްލުމުގެ ބަދަލެއްގެ ގޮތުގައި އެއް މަހުގެ މުސާރަ އާއި އިނާޔަތްތަކަށްވާ 56،171ރ. މިއަދުން ފެށިގެން 30 ދުވަހުގެ ތެރޭގައި ޖެނިފާއަށް ދިނުމަށް ޓްރައިބިއުނަލްގެ އަމުރުގައިވެއެވެ.

ހައި ކޯޓުން އިއްޔެ ނެރުނު އަމުރުގައި ވަނީ އިސްތިއުނާފުގެ މައްސަލަ ބަލައި ގޮތެއް ނިމެންދެން ނުވަތަ އެ ނޫން ގޮތެއް އަންގަންދެން ވަޒީފާއާ ބެހޭ ޓްރައިބިއުނަލްގެ ނިންމުން ތަންފީޒުކުރުން މަޑުޖައްސާލަން އަންގާ ކަމަށެވެ.