އިގްތިސާދަށް ފޫނުބެއްދޭ ވަރުގެ ގެއްލުމެއް ވާނެ އަމަލެއް އެމްޑީޕީން ނުހިންގާނެ: ޕީއެންސީ

Read Time:4 Minute, 24 Second

(ފޮޓޯ ކްރެޑިޓްސް: ވަގުތު)

ރާއްޖޭގައި ރަޖިސްޓްރީކޮށްގެން ހިންގާ ސިޔާސީ ޕާޓީއަކުން އަދި މަދަނީ ޖަމްއިއްޔާއަކުން ރާއްޖޭގެ ފަތުރުވެރިކަމަށް އަދި ޖުމްލަކޮށް ދިވެހި އިގްތިސާދަށް ފޫނުބެއްދޭ ވަރުގެ ގެއްލުމެއް ލިބިދާނެ ނުރައްކާތެރި އަމަލެއް ނުހިންގާނެ ކަމަށް ޕީއެންސީން ވިދާޅުވެއްޖެއެވެ.

ފަތުރުވެރިކަމާއި ބެހޭ ވުޒާރާގެ ސްޓޭޓް މިނިސްޓަރު މުހައްމަދު ނިހާދު ރޭ ދެއްކެވި ވާހަކަތަކާއި ގުޅިގެން ޕީއެންސީން މިއަަދު ނެރުނު ބަޔާނެއްގައި ވިދާޅުވީ، އެމްޑީޕީން މާލެ އަތޮޅުގެ ރިސޯޓްތަކަށް އަަރައި، އެ ރިސޯޓްތަކުގައި އެއްވުމެއް ބާއްްވަން ރާވާފައިވާ ކަމަށާއި، މަސައްކަތްތެރިންގެ ހައްގުގައި މަސައްކަތް ކުރާ ޔުނިއަންއަންތައް މެދުވެރިކޮށް ހިންގުމަށް ރާވާމުންދާ އަމަލީ ޓޫރިޒަމަށް އަމާޒުކޮށް ދޭ ޓެރަރިސްޓް އަމަލެއް ކަަމަށް ނިހާދު ސިފަ ކުރައްވާފައިވާ ކަމަށެވެ.

އަދި އެ ޕާޓީން ދެކޭގޮތުގައި ރާއްޖޭގައި ރަޖިސްޓްރީކޮށްގެން ހިންގާ ސިޔާސީ ޕާޓީއަކުން އަދި މަދަނީ ޖަމްއިއްޔާއަކުން ރާއްޖޭގެ ފަތުރުވެރިކަމަށް އަދި ޖުމްލަކޮށް ދިވެހި އިގްތިސާދަށް ފޫނުބެއްދޭ ވަރުގެ ގެއްލުމެއް ލިބިދާނެ ނުރައްކާތެރި އަމަލެއް ނުހިންގާނެ ކަމަށް އެ ބަޔާނުގައި ވެއެވެ. އަދި ޕާޓީތަކާއި މަދަނީ ޖަމްއިއްޔާތައް ހަރަކާތްތެރިވާނީ ގާނޫނު ހުއްދަކުރާ އިމުގެ ތެރެއިންކަމަށްވެސް އެ ބަޔާނުގައި ވެއެވެ.

“އެ އިމުން ބޭރުވާނަމަ އެކަމާމެދު އަޅަންޖެހޭ ފިޔަވަޅުތައް ދައުލަތުގެ ކަމާބެހޭ އިދާރާތަކުން އަޅާނެކަމާއި މެދު ޝައްކު ނުކުރަމެވެ،”. އެ ބަޔާނުގައި ވެއެވެ.

ރާއްޖެއަކީ މި ގައުމަށް ޒިޔާރަތް ކުރާ ފަތުރުވެރިންނަށް ރައްކާތެރި މަންޒިލެއްގެ ގޮތުގައި ދެމެހެއްޓުމަށް ސަރުކާރުން އަބަދުވެސް މަސައްކަތް ކުރަމުންދާނެ ކަމުގެ ޔަގީންކަން އަރުވާ ކަމަށްވެސް އެ ބަޔާނުގައި ވެއެވެ. އަދި ފަތުރުވެރިކަމުގެ ސިނާއަތުގައި އިންވެސްޓްކޮށްފައިވާ ފަރާތްތަކުގެ އިންވެސްޓްމެންޓްތައް ރައްކާތެރިކޮށްދިނުމަށް ދިވެހި ދައުލަތުން އަދާކުރަން ޖެހޭ ޒިންމާ އެންމެ ފުރިހަމައަށް އަދާ ކުރާނެ ކަމަށްވެސް އެ ބަޔާނުގައި ވެއެވެ.

އެ ޕާޓީން ވަނީ ދައުލަތުގެ މުއައްސަސާތަކާއި ސިޔާސީ ޕާޓީތަކާއި މަދަނީ ޖަމިއްޔާތަކާއި ވަކިވަކި ފަރުދުން ވެސް ފަތުރުވެރިކަމަށް އަދި ބައިނަލްއަގުވާމީ ދުނިޔޭގައި ރާއްޖޭގެ ޝުހުރުތަށް އުނިކަން އަތުވެދާނެ އެއްވެސް ކަމެއް ނުކުރަން އިލްތިމާސް ކުރައްވާފައެވެ.