ދެ މިލިއަން ވަނަ ފަތުރުވެރިޔާ ބުރާސްފަތި ދުވަހު ރާއްޖެ އަންނާނެ ކަމަށް ލަފާކޮށްފި

މިނިސްޓަރު ފައިސަލް ވިދާޅުވިގޮތުގައި މިއީ ރައީސުލްޖުމްހޫރިއްޔާ ޑރ.މުހައްމަދު މުޢިއްޒުގެ އިރުޝާދާއި ލަފާފުޅުގެ ދަށުން އެ މިނިސްޓްރީ އާއި ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކުން ގުޅިގެން ކުރެވުނު ކާމިޔާބު މަސައްކަތްތަކެއްގެ ނަތީޖާއެވެ. ސަރުކާރުން އަމާޒު ހިފާފައިވަނީ މި އަހަރު ދެ މިލިއަން ފަތުރުވެރިން ގެނައުމަށެވެ. މި މަހުގެ 22 ވަނަ ދުވަހުގެ ނިޔަލަށް ރާއްޖެއަށް 1.97 ފަތުރުވެރިން އައިސްފައިވާއިރު އެ އަމާޒަށް ވާސިލްވާން ބާކީ ބޭނުންވަނީ ތިރީހަކަށް ހާސް ފަތުރުވެރިންނެވެ.

މިހާރު ރާއްޖެއަށް ފަތުރުވެރިން އަންނަ އަދަދުތަކަށް ބަލާއިރު، މި މަހުގެ 26 ވަނަ ދުވަހު މިއަހަރުގެ ދެ މިލިއަންވަނަ ފަތުރުވެރިޔާ ޒިޔާރަތްކުރާނެ ކަމަށް ލަފާކުރެވޭކަމަށް ޓޫރިޒަމް މިނިސްޓަރު ފައިސަލް މީގެކުރިންވެސް ވަނީ ވިދާޅުވެފައެވެ. ރާއްޖެ އަށް މިހާރު އެންމެ ގިނަ ޓޫރިސްޓުން އަންނަ ތިން ގައުމަކީ ޗައިނާ، ރަޝިއާ އަދި އިނގިރޭސިވިލާތެވެ.

2025 ވަނަ އަހަރަށް ލަފާކޮށް ސަރުކާރުން ހުށަހަޅާފައިވާ ދައުލަތުގެ ބަޖެޓުގައި އަންނަ އަހަރުތެރޭ 2.2 މިލިޔަން ފަތުރުވެރިން ރާއްޖެއަށް އަންނާނެ ކަމަށް ލަފާކޮށްފައިވާއިރު، ފަތުރުވެރިކަމުގެ ބެޑް ނައިޓްސް ހުންނާނެ ކަމަށް ބެލެވެނީ 14.2 މިލިއަންގައެވެ. މި ކުރިއެރުމުގެ މައިގަނޑު އެއް ސަބަބަކީ އަންނަ އަހަރު ހުޅުވުމަށް ހަމަޖެހިފައިވާ ވެލާނާ އިންޓަނޭޝަނަލް އެއާޕޯޓުގެ އައު ޓާމިނަލެވެ. 78،000 އަކަ މީޓަރުގެ މި ޓާމިނަލްގެ ސަބަބުން އެއާޕޯޓުގެ ކެޕޭސިޓީ އަހަރަކު 1.5 މިލިއަނުން ހަތް މިލިއަނަށް އިތުރުވެ، އެރޯބޯޑިން ބްރިޖާއި ޒަމާނީ ބެގޭޖް ހޭންޑްލިން ސިސްޓަމްފަދަ ޒަމާނީ ވަސީލަތްތައް ލިބެންހުންނާނެއެވެ.