ދެވަނަ ފަހަރަށް ޚިޔާނާތްވާން އެމްޑީޕީއަށް ފުރުސަތު ނުދޭނަން: މަމްދޫހު

Read Time:5 Minute, 8 Second

އެމްޑީޕީ ސަރުކާރުން ރާއްޖެއަށާއި ރައްޔިތުންނަށް ޚިޔާނަތްތެރިވެފައިވާ ކަމަށާއި ދެވަނަ ފަހަރަށް އެފަދަ ހިޔާނާތެއްވާން ފުރުސަތު ނުދޭނެ ކަމަށް ރައްޔިތުންގެ މަޖިލީހުގެ ފުނަދޫ ދާއިރާގެ މެންބަރު މުހައްމަދު މަމްދޫހު (މަންޑޭ) ވިދާޅުވެއްޖެއެވެ.

ޕީއެންސީން މިރޭ ބޭއްވި ހަރުގެ ޖަލްސާގައި މަމްދޫހު ވިދާޅުވީ ނިމިދިޔަ އެމްޑީޕީ ސަރުކާރުން ރައްޔިތުން އަޅުވެތިކޮށް ގައުމު ދަރުވާލި ކަމަށާއި ހިޔާނާތްތެރިންނަށް ދެވަނަ ފުރުސަތެއް ނުދޭނެ ކަމަށެވެ. ޕީއެންސީގެ ބޮޑު ލަޝްކަރު ނުކުމެ ތިބީ ރައްޔިތުންގެ ޚިދުމަތުގައިކަން ފާހަގަކުރައްވަމުން އޭނާ ވިދާޅުވީ ކުރީ ސަރުކާރުން ކަންތައް ބައްޓަން ކުރީ ސަރުކާރުގެ އިސްވެރިންނަށް ނަފާ މަންފާ ލިބޭ ގޮތަށް ކަމަށެވެ. ރައްޔިތުން ބިކަކޮށް ހާލުގައި ޖައްސާލިކަމަށް ވަނީ ވިދާޅުވެފައެވެ.

“އަޅުގަނޑުމެން މިތިބީ އެމްޑީޕީއަށް ދެވަނަ ފަހަރަށް މި ރާއްޖެއަށް އެފަދަ ބޮޑު ހިޔާނަތެއް ވާން ފުރުސަތު ދޭގޮތަށް ނޫން. ކޮންގްރެސް ޕާޓީގެ މިލަޝްކަރު މިއޮތީ އެގޮތަކަށް ނޫން.”، މަމްދޫހު ވިދާޅުވިއެވެ. އެގޮތުން ނިމިދިޔަ 19 ވަނަ މަޖިލީހުގެ މެޖޯރިޓީ ސަރުކާރަށް އޮތް ނަމަވެސް ޤާނޫނުތަކުގެ ބާރު ކަނޑުވާލާ ޤާނޫނާ ޚިލާފަށް އެތައް ކަމެއް އެމްޑީޕީން ކޮށްފައިވާކަން މަމްދޫހު ފާހަގަކުރެއްވިއެވެ. އަދި އޭރުގެ ވެރިން ބޭނުންވީ ސިޔާސީ ވެރިންގެ ފައިބުޑަށް ގޮސްގެން ރައްޔިތުން ކަންކަން ކުރުވާނެ މަގަށް ހުރިހާ ކަންކަން ބައްޓަން ކުރުން ކަމަށް އޭނާ ވިދާޅުވިއެވެ.

އެހެންނަމަވެސް ރައީސް ޑރ.މުހައްމަދު މުއިއްޒުގެ ވިސްނުންފުޅަކީ ނިޒާމުގެ ތެރެއިން ބޭނުންޖެހޭ ކޮންމެ ރައްޔިތަކަށް އެކަމަށް ފުރިގެން، ފުދިގެން ފުރިހަމަވެގެން ދިޔުން ކަމަށް މަމްދޫހު ވިދާޅުވިއެވެ. ” އެމްޑީޕީ ސަރުކާރުގެ ތެރެއިން ކަނޑަށް ޒިންމާވުމުގެ ޤާނޫނު 19 ވަނަ ރައްޔިތުންގެ މަޖިލީހުގެ ސުޕަމެޖޯރިޓީ އޮތީތީ ޕެރެލައިޒް ކޮށްލާފަ.” މަމްދޫހު ވިދާޅުވިއެވެ.

މަމްދޫހު ވިދާޅުވި ގޮތުގައި މި ސަރުކާރުގެ ފުރަތަމަ އަހަރު ނިމިގެން ދިޔައިރު، ފާހަގަކުރެވުނު އެންމެ މުހިންމު ކަމަކީ ރައްޔިތުން އެދޭ ގޮތަށް، ރާއްޖެއަށް ފައިދާ ވާނޭ ގޮތަށް މުޅިވެރިކަމުގެ ނިޒާމު ބައްޓަން ކުރަމުންދާ ކަމެވެ. އަދި ރިޔާސީ އިންތިހާބުގައި ރައީސް ވެވަޑައިގެންނެވި ހުރިހާ ވައުދުފުޅެއް އަކުރުން އަކުރަށް، ރަނުން ރަނަށް ފުއްދަމުންދާ ކަމަށް ވަނީ ވިދާޅުވެފައެވެ.

“އެންމެ މުހިންމު އެއް ކަމެއްގެ ގޮތުގައި އަޅުގަނޑުމެން ބަލާލަން ޖެހޭ އެއް ކަމަކީ ދިވެހިރާއްޖޭގެ އިގްތިސޯދު އޭރު ދިޔަ ގޯސް މިސްރާބުން ސަލާމަތް ކުރުމަށް ރައީސް ޑރ.މުހައްމ،ަދު މުއިއްޒު އަޅުއްވަމުން ގެންދަވާ މުހިންމު ފިޔަވަޅުތައް.” މަމްދޫހު ވިދާޅުވިއެވެ.

މަމްދޫހު އިތުރަށް ވިދާޅުވި ގޮތުގައި ރާއްޖޭގެ ތާރީހުގައި ނަން ލިޔެވިގެންވާ ރައީސަކަށް ރައީސް ޑރ.މުއިއްޒު ވެގެންދާނެއެވެ.