ޕީއެންސީގެ ހަރުގެ ޖަލްސާއެއް މިރޭ

Read Time:5 Minute, 6 Second

(ފޮޓޯ ކްރެޑިޓްސް: ވަގުތު)

ވެރިކަން ކުރާ މައި ޕާޓީ، ޕީއެންސީގެ ހަރުގެ ޖަލްސާއެއް މިރޭ ބޭއްވުމަށް ހަމަޖެހިއްޖެއެވެ. މި ޖަލްސާ އޮންނާނީ ކޮންގްރެސް ހައުސް، ހ. ވެޔޮވިލާގައި ރޭގަނޑު 8:45 ގައެވެ. މި ޖަލްސާގައި ރައީސް ޑރ. މުހައްމަދު މުއިއްޒު ބައިވެރިވެވަޑައިގަންނަވާ ކަމެއް ނުވަތަ ނޫން ކަމެއް ސާފެއް ނޫނެވެ. އެކަމަކު، މީގެކުރިން ބޭއްވި މިކަހަލަ ޖަލްސާތަކުގައި އެމަނިކުފާނު ބައިވެރިވެވަޑައިގެންފައިވެއެވެ. ޕީއެންސީގެ ޖަލްސާގައި ޕާޓީގެ އެންމެހާ މެމްބަރުން ބައިވެރިވުމަށް ވަނީ އެދިފައެވެ.

ޕީއެންސީގެ ޖަލްސާއެއް މި ބާއްވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ތެރޭގައި ކޮރަޕްޝަންގެ މައްސަލަތަކެއް ފެންމަތިވެ، އެކަމުގެ ތަހުގީގު ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ) ގުޅިގެން ކުރަމުން އަންނަ ދަނޑިވަޅެއްގައެވެ. “ބިންވެރިޔާ” އަދި “ގެދޮރުވެރިޔާ” ސްކީމާ ގުޅޭ ޖިނާއީ ތަހުގީގެއް ހިންގަން ޕްރޮސިކިއުޓާ ޖެނެރަލް (ޕީޖީ) އައްބާސް ޝަރީފް ފުލުހުންނަށާއި އެންޓި ކޮރަޕްޝަން ކޮމިޝަން (އޭސީސީ) އަށް ކުރެއްވި އަމުރާ އެއްގޮތަށް އެކަމާ ގުޅޭ އަވަސް ތަހުގީގެއް އެ އިދާރާތަކުން ކުރިއަށް ގެންދާތާ ދުވަސްކޮޅެއްވެއްޖެއެވެ.

ޕީޖީ އޮފީހުން ވިދާޅުވީ “ގެދޮރުވެރިޔާ” ގެ ސްކީމްގެ ފޯމު ބަލައިގަތުމާއި ގޯއްޗާއި ފްލެޓް ލިބޭ މީހުން ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި ކަނޑައެޅިފައިވާ އުސޫލުތަކާއި ގަވާއިދުތަކާ ހިލާފަށް އަމަލުކޮށްފައިވާ ކަމުގެ ޝަކުވާތައް ލިބިފައިވާ ކަމަށެވެ. އަދި މި ކަމަކީ އާންމު މަސްލަހަތު މަތީ މިންވަރަކަށް އެކުލެވޭ ކަމަކަށްވާތީ މިކަމަކީ ފުރިހަމަ ޖިނާއީ ތަހުގީގެއް ހިންގަންޖެހޭ ކަމެއްކަމަށް ޕީޖީ ދެކެވަޑައިގަންނަވާ ކަަމަށްވެސް އެ އޮފީހުން ވަނީ ވިދާޅުވެފައެވެ.

ބިންވެރިޔާ ސްކީމްގެ ގޯތީގެ މައްސަލަ މި ފާހަގަވީ އެޗްޑީސީގެ ކުރީގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ މުހައްމަދު ފަޒީލް ރަޝީދުގެ ގޯއްޗަށް ޝަރުތު ހަމަނުވާ ކަމަށް ކަނޑައަޅާފައި އޮއްވައި އޭނާއަށް ގޯއްޗެއްގެ ހުއްދަ ދޫކޮށްފައިވާ މައްސަލައެއް ފެންމަތިވެފައި ވަނިކޮށެވެ. އެކަމަކު އޭނާ އަށް ގޯތި ލިބިފައިވާ ކަމަށް ބުނާ ރަޖިސްޓްރީއާ އެކު، އެ ބިމުގެ ވަށާފާރު ރޭނުމުގެ ހުއްދައަކަށް އެޗްޑީސީގައި އެދުނެވެ.

ފަޒީލް އެ ހުއްދަ އަށް އެދުނީ ޖޫން 30، 2024 ގައެވެ. އެޗްޑީސީން އަމަލުކުރާ އުސޫލުން އެ ގޯތީގެ ރެޖިސްޓްރީ ވެރިފައި ކުރުމަށް ހައުސިން މިނިސްޓްރީ އަށް ފޮނުވިއެވެ. ހައުސިން މިނިސްޓްރީން މި އަހަރުގެ އޯގަސްޓް 15 ގައި އެޗްޑީސީގެ ސިޓީއަށް ދިން ޖަވާބުގައި އޮތީ އެއީ ބިންވެރިޔާ ލިސްޓުގައި ހިމެނޭ ބައެއް ނޫން ކަމަށާއި އެ ދެ ގޯއްޗަކީ އެއްވެސް މީހަކަށް ދީފައި އޮތް ދެ ގޯތި ނޫން ކަމަށެވެ. މައްސަލަ އެހެން އޮއްވައި ފަޒީލަށް ލިބުނު ގޯތީގެ ވަށައި ފާރު ވެސް ވަނީ ރާނައިފައެވެ.