މައުރޫފް ޖަމީލަކީ އިތުބާރު ކުރެވޭ ހިންގުންތެރި ބޭފުޅެއް: ރައީސް

Read Time:5 Minute, 46 Second

އެޗްޑީސީގެ މެނޭޖިން ޑިރެކްޓަރަކަށް މިއަދު އެމަނިކުފާނު އައްޔަން ކުރެއްވި މައުރޫފް ޖަމީލަކީ އެމަނިކުފާނު އިތުބާރު ކުރައްވާ ތެދުވެރި އަމާނާތްތެރިކަމާއެކު މަސައްކަތް ކުރައްވާނެ ބޭފުޅެއް ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ. މީޑީއާއަށް ދެއްވި އިންޓަވިއުއެއްގައި ރައީސް ވިދާޅުވީ މައުރޫފް ޖަމީލަކީ ފުލް އިންޓަގްރިޓީއާ އެކު މަަސައްކަތް ކުރާނޭ ކުޅަދާނަ ބޭފުލެއް ކަމަށާއި ޤާނޫނާއި ގަވައިދާ ޚިލާފަށް އެއްވެސް ކަމެއް މައުރޫފް ޖަމީލު ނުކުރައްވާނެ ކަމަށް އެމަނިކުފާނު އިތުބާރު ކުރައްވާ ކަމަށެވެ.

“އެޗްޑީސީއަށް މިއަދު އައްޔަން ކުރި ކުރީގެ މިނިސްޓަރު މައުރޫފް ޖަމީލްއަކީ އަޅުގަނޑު ވަރަށް އިތުބާރުކުރާ ފުލް އިންޓަގްރިޓީ ހުރި ބޭފުޅެއް. ފުލް ކޮމިޓްމަންޓާއި ޕްރޮފެޝަނަލިޒަމްއާއެކީގައި މަސައްކަތް ކުރާ ބޭފުޅެއް.” ރައީސް ވިދާޅުވިއެވެ.

މައުރޫފް ޖަމީލް އަކީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ކޮންސްޓްރަކްޝަން މިނިސްޓަރުކަން ކުރެއްވި ބޭފުޅެކެވެ. އޭގެ ފަހުން މައުރޫފް ޖަމީލް ވަނީ މޯލްޑިވްސް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ) ސްޕެޝަލް އެޑްވައިޒަރު ކަން ވެސް ކުރައްވައިފައެވެ. ޑިޒައިން ކުރެއްވުމުގައި ވެސް ކުޅަދާނެ މައުރޫފް ޖަމީލް މީގެކުރިން ވަނީ ސަރުކާރުން ދިން ހާއްސަ އިނާމް، ޑިޒައިން އެނަޖީ އެފިޝަންސީ އެވޯޑް ވެސް ހާސިލް ކުރައްވައިފައެވެ. މައުމޫންގެ ވެރިކަމުގައި ހުޅުމާލެ ހިއްކި ދުވަސްވަރުގައި ހުޅުމާލެ ޑިވެލޮޕްމަންޓް ޔުނިޓުގެ ވެރިޔާގެ ހައިސިއްޔަތުން ހުޅުމާލޭގެ ތަރައްގީއަށް އޭނާ ގިނަ މަސައްކަތްތަކެއް ކުރެއްވިއެވެ. އެޗްޑީސީ އުފެއްދެވުމާއެކު، ކުންފުނީގެ ސީއީއޯގެ މަގާމު ދުވަސްކޮޅަކަށް ފުރުއްވިއެވެ.

ރައީސް ވިދާޅުވީ ރާއްޖޭގެ އެއްވެސް މުއައްސަސާއެއްގައި ކޮރަޕްޝަނުގެ އެއްވެސް އަމަލެއް ހިންގަން އެމަނިކުފާނު ނޭދޭ ކަމަށާއި އެފަދަ އަމަލުތައް ކުރާ ފަރާތްތަކަށްވެސް މިސަރުކާރުން ޖާގަ ނުދޭނެ ކަމަށެވެ. އަދި މިނިސްޓްރީއެއް ވިޔަސް ސަރުކާރުގެ އޮފީހެއް ވިޔަސް ކޮރަޕްޝަނުގެ އަމަލު ހިންގައި ޤާނޫނާ ޚިލާފަށް އެއްވެސް ކަމެއް ނުކުރުމަށް ރައީސް ވަނީ އިލްތިމާސް ކުރައްވާފައެވެ. އަދި ރާއްޖޭގައި މޫލާފައިވާ ކޮރަޕްޝަނުގެ އަމަލުތައް އެންމެން އެއްބާރުލުން ދީގެން ނައްތާލަން މަސައްކަތް ކުރުމަށް ރައީސް ވަނީ އިލްތިމާސްކޮށްފައެވެ.

“އަޅުގަނޑަށް ފުރިހަމަ ޔަޤީންކަން އެބައޮތް އިރާދަކުރެއްވިއްޔާ ކުރިޔަށް އޮތްތާނގައި އެޗްޑީސީ ތެރެއިން މި ދިމާވި ކަންތައްތަކުގައިވެސް އެންމެ ރަނގަޅަށް ކަންތައްތައް ފަހިވެގެންދާނެ ކަމަށް އަޅުގަނޑު އުއްމީދުކުރަން.” ރައީސް ވިދާޅުވިއެވެ. ރައީސް އިތުރަށް ވިދާޅުވީ އެޗްޑީސީ ތެރޭ ހިނގާދިޔަ ކަންތައްތައް ފުލުހުން ރަނގަޅަށް ތަހުޤީގުކޮށް އެކަންތައް ހިނގައިދިޔަ ގޮތާއި އޭގައި ހިމެނޭ ފަރާތްތައް ހާމަވެ އެފަރާތްތަކާމެދު ފިޔަވަޅު އެޅިގެންދާނެ ކަމަށެވެ. ކަނޑައެޅިފައިވާ އުސޫލުތަކާ ޚިލާފަށް ނުވަތަ ޤާނޫނުތަކާ ޚިލާފަށް މީހަކަށް ގޯއްޗެއް ނުވަތަ ފްލެޓެއް ދިނުމާއި ނުދިނުމަކީ އެއްވެސް މީހަކަށް ލިބިގެންވާ ހައްގެއް ނޫން ކަމަށް ރައީސް ވިދާޅުވިއެވެ.