Read Time:6 Minute, 32 Second
(ފޮޓޯ ކްރެޑިޓްސް: ރައްޔިތުންގެ މަޖިލިސް)
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރު ކަމުން ރޭގައި އިސްތިއުފާ ދެއްވި އިބްރާހިމް ފަޒުލް ރަޝީދު، އެ މަގާމުގައި ހުންނެވި އިރު، ކުރައްވަން ޖެހިވަޑައިނުގަންނަވާ ކަންތައްތަކެއް ކުރެއްވި ކަމަށާއި އެ މައްސަލަ ބަލަން ޖެހޭ ކަމަށް ރައްޔިތުންގެ މަޖިލިހުގެ ހިތަދޫ މެދު ދާއިރާގެ މެމްބަރު އަހުމަދު އަޒާން ވިދާޅުވެއްޖެއެވެ. ނިމިދިޔަ އެމްޑީޕީ ސަރުކާރުން ކުރިޔަށް ގެންދިޔަ ބިންވެރިޔާ ސްކީމްގެ ދަށުން ޝަރުތު ހަމަނުވާ ބައެއް ފަރާތްތަކަށް ގޯތި ދޫކުރި ކަމުގެ މައްސަލައެއް ވަނީ ފެންމަތިވެފައެވެ. އޭގެތެރޭގައި ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނޭ ކަމަށް ބުނާ ލިޔެކިޔުންތަކެއް ވަނީ އާންމުވެފައެވެ. އޭނާއަށް ލިބުނު ގޯތީގެ ވަށާ ފާރު ވެސް މިހާރު ހުރީ ރާނައިފައެވެ. އެކަމަކު، މިދިޔަ އަހަރުގެ އޮގަސްޓު މަހު ނެރުނު “ބިންވެރިޔާ” ސްކީމްގެ ލިސްޓުގައި ފަޒީލް ހިމެނުނީ ޝަރުތު ހަމަނުވާ މީހެއްގެ ގޮތުގައެވެ. ބިންވެރިޔާ ސްކީމަށް ޝަރުތު ހަމަނުވާ ލިސްޓުގައި، ފަޒުލްގެ ބޭބެ އޮއްވައި އޭނާއަށް ގޯތީގެ ރަޖިސްޓްރީއެއް ހަދައިދީފައި އޮތް ކަން ސާފުވެއެވެ.
މި މައްސަލައިގައި ފަޒުލް އާއި ފަޒީލް ވެސް ހިމެނޭހެން ގިނަ ބަޔަކު ވަނީ ސަސްޕެންޑްކޮށްފައެވެ. ފަޒުލް އާއި އޭނަގެ ބޭބެ ފަޒީލްގެ އިތުރުން ކުރީގެ ސަރުކާރުގެ ވެރިންގެ ބައިވެރިވުމެއް އޮތް ކަމަށް ބެލެވިގެން ކުރީގެ ސަރުކާރުގެ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނާއި ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް އާއި ސީނިއާ އެގްޒެކެޓިވް ޑިރެކްޓަރު ލިރުގާމް ވަހީދު އަދި މިހާރުގެ ޑިރެކްޓާ ޖެނެރަލް އަހްމަދު ވިޝާން ނަސީމްގެ ޕާސްޕޯޓު ވެސް ވަނީ ހިފަހައްޓާފައެވެ.
މި މައްސަލަ ފުލުހުން ތަހުގީގު ކުރަމުން ގެންދަނިކޮށް ތަހުގީގަށް ޖާގަ ދިނުމުގެ ގޮތުން ފަޒުލް ވަނީ އެޗްޑީސީގެ އެމްޑީގެ މަގާމުން އިސްތިއުފާ ދެއްވާފައެވެ. އަޒާން “އެކްސް” ގައި ކުރެއްވި ޕޯސްޓެއްގައި ވިދާޅުވީ ފަޒުލްގެ މައްސަލަ ބަލަންޖެހޭ ކަމަށާއި އެފަދަ މަގާމެއްގައި ހުންނަވައިގެން ކޮށްގެން ނުވާ ގިނަ ކަންތައް އޭނާ ކުރެއްވި ކަމަށެވެ. އެކަމަކު، އަޒާންގެ ވާހަކައިގައި އެއީ ކޮން ކަންތައްތަކެއް ކަމެއް ވިދާޅެއް ނުވެއެވެ.
“އެޗްޑީސީގެ ކުރީގެ އެމްޑީއަށް ކުރެވޭ ތުހުމަތުތައް ފުލުހުން އަދި ކަމާ ގުޅޭ އެހެން އިދާރާތަކުން ބަލަންޖެހޭ. އެ މަގާމުގަ ހުރެގެން ކުރަން ނުޖެހޭނެ ފަދަ ގިނަ ކަންކަންކޮށްފަ އެބަހުރި. ސަރުކާރު ހިއްސާވާ އެހެން ކުންފުނިތަކުގެ އިސްވެރިންވެސް ކޮރަޕްޝަނަށް މަގުފަހިވާ ކަންކަމުން ދުރުހެލިވާން ޖެހޭނެ. ރައީސް ޑރ.މުއިއްޒުގެ ސަރުކާރުން ކޮރަޕްޝަނަށް ފުރުސަތު ނުދެއްވާނެ.” އަޒާން ވިދާޅުވިއެވެ.
އަޒާން ވިދާޅުވީ ސަރުކާރުގެ އިސް މަގާމުތަކުގައި ތިއްބަވާ ބޭފުޅުން ކޮރަޕްޝަނާ ދުރުހެލިވާން ޖެހޭ ކަމަށާއި މި ސަރުކާރުން އެކަން ބަލައިނުގަންނާނެ ކަމަށެވެ. މި މައްސަލައިގައި ފަޒުލް ވިދާޅުވީ “ބިންވެރިޔާ” ސްކީމްގެ ދަށުން އެޗްޑީސީން އެއްވެސް ބިމެއް ނުދޭނެ ކަމަށާއި އެ ސްކީމްގެ ދަށުން ބިން ލިބޭ އެއްވެސް މީހަކު އިސްތިސްނާވާ ގޮތަކަށް އެޗްޑީސީން އެއްވެސް ކަމެއް ކޮށްފައި ނުވާނެ ކަމަށެވެ. ހައުސިން މިނިސްޓްރީން ނާންގާ ފަރާތަކަށް ބިމެއް ދީފައި ނުވާނެ ކަމަށް ފަޒުލް ވިދާޅުވިއެވެ. އެކަމަކު، “ބިންވެރިޔާ” ސްކީމްގެ ދަށުން ވަކި ބަޔަކަށް ބިން ދިން ކަން އެނގިގެން އެކަން އިސްވެ، ހައުސިން މިނިސްޓްރީއަށް ހުށަހެޅީ ވެސް އެޗްޑީސީގެ ފަރާތުން ކަމަށް ވެސް ފަޒުލް ވިދާޅުވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0