ތިން ދުވަސްވީ އިރުވެސް މަސްކޮޅަށް ފައިސާ ނުލިބޭ ކަމަށްބުނާ ވާހަކަ މިފްކޯއިން ދޮގުކޮށްފި

Read Time:4 Minute, 31 Second

ދޯންޏަކުން މިފްކޯއަށް މަސްކިރުވުމަށްފަހު 72 ގަޑިއިރު ވެގެން ދިޔަ އިރުވެސް ފައިސާ ނުލިބޭ ކަމަށްބުނެ މީސްމީޑިއާގައި ފެތުރެމުންދާ ވާހަކަތައް މިފްކޯ އިން ދޮގުކޮށްފިއެވެ. ހަސަން ކުރުސީ ނަމަކަށް ކިޔާ ފަރާތަކުން ޓްވިޓަރގައި ކުރި ޓްވީޓެއްގައި މިފްކޯއަށް ދޯންޏަކުން މަސް ކިރުވިތާ 72 ގަޑިއިރުވެގެން ދިޔައިރުވެސް ބޭނި މަސްކޮޅަށް ފައިސާ ނުލިބުނު ކަމަށް ބުނެފައިވެއެވެ. އަދި މިއީ ސަރުކާރު ލަދުގަންނަންޖެހޭ ކަމެއް ކަމަށް ބުނެ، މަސްވެރިކަމާ ބެހޭ ވަޒީރު އަހުމަދު ޝިޔާމް ޓެގުކޮށް، ދޯންޏަކުން މަސް ކިރާފައި މިފްކޯއިން ދިން ބިލުގެ ފޮޓޯއެއް އާންމުކޮށްފައިވެއެވެ.

މި ޓްވީޓާ ގުޅިގެން މިފްކޯއިން ބުނެފައިވަނީ އެ ދޯނީގެ ބިލުގައިވާ އަދަދު ތެލުގެ ކްރެޑިޓްއިން އެޑްޖަސްޓްމަންޓް ހަދަމުންދާ ކަމަށެވެ. އެގޮތުން މިހާތަނަށް އެ ދޯނީގެ ތެލުގެ ކްރެޑިޓް ފައިސާގެ ގޮތުގައި 10،282 ރުފިޔާ ދައްކަންޖެހޭ ކަމަށްވެސް މިފްކޯއިން ބުނެފައިވެއެވެ. މިފްކޯއިން ވަނީ އެ މައުލޫމާތުތައް ހާމަކޮށް އެ ދޯނީގެ ބިލްތައްވެސް މީޑިޔާތަކާ ހިއްސާކޮށްފައެވެ. މީގެއިތުރުން މިފްކޯއަށް ކިރާ މަހަށް ރައީސް ޑރ.މުހައްމަދު މުއިއްޒުގެ ވައުދުފުޅާ އެއްގޮތަށް 48 ގަޑިއިރުތެރޭ ފައިސާ ދެމުންދާ ކަމަށް އެކުންފުނިން ވަނީ ބުނެފައެވެ. މަސް ކިރާތާ 48 ގަޑިއިރުތެރޭ މަސްވެރިންނަށް ފައިސާ ދިނުމަކީ މި ސަރުކާރުގެ ވައުދެކެވެ.

މި މައްސަލައާ ގުޅިގެން ރައީސް ޑރ. މުހައްމަދު މުއިއްޒުގެ ވައުދުތައް ނުފުއްދުނު ކަމަށް ހަސަން ކުރުސީ ބުނެފައިވީނަމަވެސް، މިފްކޯއިން ބުނެފައިވަނީ އެ ކުންފުނިން ސަރުކާރުގެ ވައުދާ އެއްގޮތަށް ޢަމަލުކުރަމުންދާ ކަމަށެވެ. މި މައްސަލައާ ގުޅިގެން މަސްވެރިކަމާ ބެހޭ ވަޒީރު އަހުމަދު ޝިޔާމް އަދި އެއްވެސް ބަހެއް ވިދާޅުވެފައެއް ނުވެއެވެ. ނަމަވެސް، މިފަދަ މައްސަލަތައް ދިމާވާނަމަ، ކަމާބެހޭ ފަރާތްތަކަށް ސީދާ ހުށަހެޅުމަށް މަސްވެރިންނަށް ވަނީ އިލްތިމާސްކޮށްފައެވެ.

މި ސަރުކާރުން މަސައްކަތް ކުރަމުން ގެންދަނީ މަސްވެރިކަމުގެ ސިނާއަތް ކުރިއަރުވައި އެސްޓީއޯ ރޭޓުގައި މަސްވެރިންނަށް ތެޔޮ ލިބޭނެ އިންތިޒާމުތައް ހަމަޖެއްސުމަށެވެ. އެގޮތުން މިހާރު ވަނީ ހުޅުމާލެ ކަންނެލި ޖެޓީގެ އިތުރުން، ކ. ހިންމަފުށި، ޅ. ފެލިވަރު، ގއ. ކޫއްޑޫ، އަދި ސ. ހުޅުމީދޫއިން އެސްޓީއޯ ރޭޓުގައި ތެޔޮ ވިއްކަން ފަށާފައެވެ. މިފްކޯއިން މަސްވެރިންނަށް ކްރެޑިޓަށްވެސް ތެޔޮ ވިއްކައެވެ. އަދި އެ ފައިސާ މިފްކޯއަށް ކިރުވާ މަހަށްވާ ފައިސާގެ ތެރެއިން ދަނީ ކަނޑަމުންނެވެ.