އެސެސަރުންގެ ޕްރޮފެޝަނަލް ތަރައްގީއަށް ކުރާ ހޭދައަކީ މުސްތަގުބަލަށް ކުރެވޭ މުހިންމު ހޭދައެއް: މާރިޔާ

Read Time:5 Minute, 13 Second

ގައުމީ އެސެސަރުންގެ ޕްރޮފެޝަނަލް ތަރައްގީއަށް އިންވެސްޓްކުރުމަކީ ރާއްޖޭގެ ފަހި މުސްތަގްބަލަށް ކުރެވޭ އަގުހުރި އިންވެސްޓްމަންޓެއްކަމަށް މަތީ ތައުލީމާ ބެހޭ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ. ވަޒީރު މިހެން ވިދާޅުވީ މޯލްޑިވްސް ނެޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމްއެންއެސްޑީއޭ) އިން ނޭޝަނަލް އެސެސާ ޓްރެއިނިންގް ޕްލޭން ލޯންޗުކުރުމަށް، މިއަދު ހެނދުނު ބޭއްވި ހާއްސަ ރަސްމިއްޔާތުގައެވެ.

ވަޒީރު ވިދާޅުވީ މިއަދު ތައާރަފުކުރި ގައުމީ އެސެސަރުން ތަމްރީނުކުރުމުގެ ޕްލޭނަކީ ހަމައެކަނި ލިޔުމެއް ނޫންކަމަށެވެ. އެ ޕްލޭނަކީ ހާއްސަކޮށް މިހާރު ރަޖިސްޓްރީވެފައިވާ އެސެސަރުންނަށާއި އަދި ކުރިމަގުގައި މި ޓީމުގެ ސަފުތަކާ ގުޅޭނެ ފަރާތްތަކަށް ހާއްސަކޮށް ފަރުމާކުރެވިފައިވާ ޕްލޭނެއްކަމަށެވެ. އަދި އެ ޕްލޭނުން ސީދާ އަމާޒުކުރަނީ ގައުމަށް ދިމާވެފައިވާ އެންމެ ބޮޑު ގޮންޖެހުންތަކުގެ ތެރެއިން އެއް ގޮންޖެހުމަށްކަމަށެވެ. އެއީ އެކި ދާއިރާތަކުގައި ހުނަރުތައް އިމްތިހާނުކޮށް، ވަޒަންކޮށް، އަދި ސަނަދު ދެވޭނެ ފެންވަރު ރަނގަޅު އެސެސަރުން ހޯދައި ތަރައްގީކުރުންކަމަށް ވަޒީރު ވިދާޅުވިއެވެ.

“މި މަސައްކަތަކީ ހަމައެކަނި އިދާރީ އިޖުރާއަތެއް ނޫން. މިއީ ރައީސް ޑރ. މުހައްމަދު މުޢިއްޒުގެ ދުރުވިސްނުމާއި، އަޅުގަނޑުމެންގެ ސަރުކާރުން ހުނަރުވެރި އަދި އަމިއްލަ ފައިމައްޗަށް ތެދުވެވޭ ޖީލެއް ބިނާކުރުމަށް ކުރާ މަސައްކަތުގެ ފުރިހަމަ ނަތީޖާއެއް. އަޅުގަނޑުމެންގެ ގައުމީ އެސެސަރުންގެ ޕްރޮފެޝަނަލް ތަރައްގީއަށް އިންވެސްޓްކުރުމަކީ ދިވެހިރާއްޖޭގެ ފަހި މުސްތަގްބަލަށް ކުރެވޭ އަގުހުރި އިންވެސްޓްމަންޓެއް.”ވަޒީރު މާރިޔާ ވިދާޅުވިއެވެ.

އަމާޒަށް ވާސިލް ވުމަށްޓަކައި މިހާރުވެސް ވަނީ ފާހަގަކުރެވޭ ކުރިއެރުންތަކެއް ހޯދާފައިކަމަށާއި އެގޮތުން މިވަގުތު އެމްއެންއެސްޑީއޭގައި 201 ގައުމީ އެސެސަރުން ރަޖިސްޓްރީވެފައިވާއިރު، މިއީ އެކި ދާއިރާތައް ތަމްސީލުކުރާ އަދި ގައުމުގެ ތައުލީމީ ނިޒާމަށް ތަޖުރިބާއާއި ހުނަރު ގެނެސްދޭ ބައެއްކަމަށް ވަޒީރު ވިދާޅުވިއެވެ. އަދި އެސެސްމަންޓް އޮނިގަނޑުގެ ފެންވަރު އިތުރަށް މަތިކުރުމަށްޓަކައި، ފުރިހަމަ ތަމްރީނު މެނުއަލެއް އެކުލަވާލައި، އަދި 29 ޓްރެއިނިން އޮފް ޓްރެއިނަރުން ތަމްރީނުކުރުމަށް އިންވެސްޓްކޮށްފައިވާކަމެއް ކަމަށެވެ. އެ ޓްރެއިނަރުންނަކީ ދެމެހެއްޓެނިވި ހުނަރު ތަރައްގީކުރުމުގެ ސްޓްރެޓެޖީގައި މުހިންމު ދައުރެއް އަދާކުރާނެ ބައެއް ކަމަށް ވިދާޅުވިއެވެ.

އެ ޕްލޭނަކީ ރާއްޖޭގައި ފަންނީ ހުނަރުވެރި މަސައްކަތްތެރީން ބިނާކުރުމަށް ހިންގާ ތަމްރީނު ޕްރޮގްރާމުތައް އެސެސްކުރުމުގެ މަސައްކަތުގައި ހަރަކާތްތެރިވާ ނޭޝަނަލް އެސެސަރުންގެ މަސައްކަތުގެ ފެންވަރު އެއް މިންގަނޑެއްގައި ދެމެހެއްޓުމަށްޓަކައި ވޯލްޑް ބޭންކުގެ އެހީގައި އެކުލަވާލައިފައިވާ ޕްލޭނެކެވެ.