ރައީސް މުއިއްޒު، އއ. އަތޮޅު ކައުންސިލާ ބައްދަލު ކުރައްވައިފި

Read Time:5 Minute, 32 Second

(ފޮޓޯ ކްރެޑިޓްސް: ވަގުތު)

ރައީސް ޑރ. މުހައްމަދު މުއިއްޒު، އއ. އަތޮޅު ކައުންސިލާ ބައްދަލު ކުރައްވައި އެ އަތޮޅު ތަރައްގީއަށް މުހިންމު ކަންކަމާ ގުޅޭ ގޮތުން މަޝްވަރާ ކުރައްވައިފިއެވެ. އއ. އަތޮޅު ކައުންސިލް އިދާރާގައި ބޭއްވި މި ބައްދަލުވުމުގައި އއ. އަތޮޅު ކައުންސިލުގެ މެންބަރުން އެ އަތޮޅުން ޕާސްޕޯޓާއި އައިޑީ ކާޑުގެ ޚިދުމަތް ލިބޭނެ ގޮތް ހެއްދެވުމަށާއި، ރައްޔިތުންނަށް އާމްދަނީ އާމްދަނީ ހޯދުމަށް ފަޅުގެ ބޭނުން ކުރެވޭނެ ގޮތް ފަހިކޮށްދެއްވުމަށް އެދިވަޑައިގެންނެވިއެވެ. އަދި ލާމަރުކަޒީ ނިޒާމު ހަރުދަނާކުރުމާ ގުޅޭގޮތުންވެސް މަޝްވަރާކުރެވުނެވެ.

ރައީސް މުއިއްޒު ދެއްކެވި ވާހަކަފުޅުގައި އއ. އަތޮޅު ބާކީ ނުކުރައްވާނެކަން އަންގަވައި، އެއާޕޯޓު މަޝްރޫއު ކުރިއަށް ގެންދަވާނެކަމަށް ވިދާޅުވިއެވެ. އަދި މިއަންނަ އަހަރުގެ ތެރޭގައި ހުރިހާ އަތޮޅަކުން އައިޑީ ކާޑާއި ޕާސްޕޯޓުގެ ޚިދުމަތް ލިބޭނެ ގޮތް ހެއްދެވުމަށް މަސައްކަތް ފަށާފައިވާ ކަމަށް ވިދާޅުވިއެވެ. މީގެއިތުރުން، ޓޫރިޒަމް ޓެކުހުން ކައުންސިލްތަކަށް ވަކި ޕަސެންޓެއް ދެއްވުމުގެ ވަޢުދު ފާހަގަކުރައްވައި، މިފަދަ ކަންކަމުން ކައުންސިލްތަކަށް އިތުރު އާމްދަނީ ލިބިގެންދާނެކަމަށް ރައީސް މުޢިއްޒު ވިދާޅުވިއެވެ.

ރައީސް ޑރ. މުއިއްޒު އއ އަތޮޅަށް ކުރައްވަުންދާ ދަތުރުފުޅުގައި ރަސްދޫ ކައުންސިލާވެސް ބައްދަލު ކުރެއްވިއެވެ. މި ބައްދަލުވުމުގައި ރަސްދޫގެ ބޯހިޔާވަހިކަމަށް ސަރުކާރުން ކުރައްވާ މަސައްކަތްތައް ބަލައިގަންނަކަން، ޝުކުރުވެރިކަމާއެކު ކައުންސިލުން ފާހަގަކުރެއްވިއެވެ. ހަމައެއާއިއެކު ރައީސް ވަނީ އަންހެނުންގެ ތަރައްގީއަށް މަސައްކަތްކުރާ ކޮމިޓީއާ ވެސް ބައްދަލު ކުރައްވާފައެވެ.

މި ބައްދަލުކުރެއްވުމުގައި ކައުންސިލުން ވަނީ ރަށުގެ ތަރައްގީ އަށް މިވަގުތަށް އެންމެ މުހިންމު ކަންކަމުގެ މައުލޫމާތު ޙިއްޞާކުރައްވާފައެވެ. އެގޮތުން ރަށުގެ ގިރާ ސަރަހައްދު ހިމާޔަތްކުރުމަށް ބޭނުންވާކަމަށާއި، އަދި ރަށުގައި އިތުރު 50 ހައުސިންގ ޔުނިޓް އެޅުމަށް ބޭނުންވާކަމަށާއި، މަސްވެރިންނަށް އައިސް ލިބުމުގައި ހުރި ކަންބޮޑުންތައް ކައުންސިލުން ޙިއްސާކުރެއްވިއެވެ.

މި ބައްދަލުކުރެއްވުމުގައި ރައީސް ދެއްކެވި ވާހަކަފުޅުގައި ކައުންސިލުން ފާހަގަކުރެއްވި ކަންކަމާއި، އެމަނިކުފާނު ވަޢުދުވެވަޑައިގެންފައިވާ ކަންކަން ފުރިހަމަ ކުރެއްވުމަށް މަސައްކަތް ކުރައްވާނެކަމުގައި ވިދާޅުވިއެވެ. އަދި ކައުންސިލުން ފާހަގަކުރެއްވި ކަންކަން ފަހިކުރެއްވުމަށް މިހާރު ކުރައްވަމުންގެންދަވާ މަސައްކަތްތައް ރައީސް ޙިއްޞާކުރެއްވިއެވެ. މީގެ އިތުރުން ކައުންސިލުން އިގްތިސާދީ ފައިދާވާކަހަލަ ކަމެއްކުރުމަށް ހުށަހަޅުއްވައިފިއްޔާ ސަރުކާރުން އެކަމަށް ފުރިހަމަ އެއްބާރުލުން ދެއްވާނެކަމުގައި އެމަނިކުފާނު ވިދާޅުވިއެވެ. މި ބައްދަލުކުރެއްވުމުގައި ރައީސްގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ ރަސްދޫގެ ތަރައްޤީއަށް ކުރިޔަށްގެންދާ މަޝްރޫޢުތަކުގެ އެންމެ ފަހުގެ މަޢުލޫމާތުތައް ޙިއްޞާކުރައްވާފައެވެ.