އެއްވެސް އިންތިހާބަކާއި ދިމާކޮށް އެއްވެސް މީހަކު މިނިވަން ކޮށްފައެއް ނުވާނެ: ރައީސް

Read Time:5 Minute, 47 Second

(ފޮޓޯ ކްރެޑިޓްސް: ވަގުތު)

އެއްވެސް އިންތިހާބަކާއި ދިމާކޮށް ސިޔާސީ ވިސްނުމެއްގައި ކްލެމެންސީ ނުވަތަ ގާނޫނުގެ ތެރެއިން ވިޔަސް ރައީސުލްޖުމްހޫރިިއްޔާ ދެއްވާ މައާފު ދީގެން އެއްވެސް މީހަކު މިނިވަން ކޮށްފައެއް ނުވާނެ ކަމަށް ރައީސުލްޖުމްހޫރިއްޔާ ޑރ. މުހަައްމަދު މުއިއްޒު ވިދާޅުވެއްޖެއެވެ. އަތޮޅުތެރެއަށް ކުރައްވަމުންގެންދަވާ ދަތުރުފުޅުގެ ތެރެއިން މިއަދު އއ. ތޮއްޑޫގައި ބޭއްވި ޖަލްސާގައި ވާހަކަދައްކަވަމުން ރައީސް ވިދާޅުވީ، ނިމިދިޔަ މަޖިލިސް އިންތިހާބާ ދިމާކޮށް ސިޔާސީ ވިސްނުމެއްގައި އެއްވެސް މީހަކު ދޫނުކުރި ނަމަވެސް ސަރުކާރުން މުޅި މި މިއަހަރު ޖުމްލަ 86 މީހުން މިނިވަންކޮށްފައިވާނެ ކަމަށެވެ.

“މީގެ ކުރިން އަޅުގަނޑުމެންނަށް ފެނިގެންގޮސްފައިވަނީ އެކި އެކި އިންތިހާބުތަކާއި ދިމާކޮށް ޖަލުތަކުގެ ތިބޭ ކުށްވެރިން އެއްވެސް ވަރެއްގެ ރިހެބިލިޓޭޝަނެއްގެ ތެރެއަށް ނުގޮސް މަގުމައްޗަށް ދޫކޮށްލާ މަންޒަރު. އޭގެ ސަބަބުން ވަރަށް ގިނަ ނުރައްކާތެރި ކަންތައް އަނިޔާވެރި ކަންކަން މަގުމަތީގައި ހިނގާ ހަމަނުޖެހުން އުފެދިފައިވޭ. އަޅުގަނޑު ހަމަ ރިކޯޑް އަދަދުތަކާއި އެކު ދަންނަވާލަން ގަސްތުކުރަން. އަޅުގަނޑުމެން މިނިމޭ އަހަރު، މިއަހަރު ނިމިގެން މިދަނީ، މިނިމުނު އަހަރުގެ ތެރޭގައި މުޅި އަހަރަށް ބަހާލައިގެން ކްލެމެންސީގެ ތެރެއިންވިޔަސް ގާނޫނުގައ އޮންނަ ފުރުސަތުގެ ތެރެއިން ރައީސުލްޖުމްހޫރިއްްޔާ ދެއްވާ ލުއިގެ ތެރެއިން ވިޔަސް ޖުމްލަކޮށް އަދަބު ލުއި ކޮށްދީ ނޫނިއްޔާ ދޫކޮށްލާފައިވަނީ ޖުމްލަ 86 މީހުން” ރައީސް ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

ނިމިދިޔަ ރިޔާސީ އިންތިހާބާ ދިމާކޮށް މިދިޔަ އަހަރު ތެރޭގައި ކުރީ ސަރުކާރުން 429 މީހުން ދޫކޮށްލިކަން ފާހަގަ ކުރައްވައި ރައީސް ވިދާޅުވީ ލޯކަލް ކައުންސިލް އިންތިހާބު އޮތް 2021 ގައި 458 މީހުން ދޫކޮށްލިއިރު، 2022 ގައި 256 މީހުން ދޫކޮށްލި ކަމަށެވެ. ރައީސް މުއިއްޒު ވިދާޅުވީ އެމަނިކުފާނުގެ ސަރުކާރުން ހިދުމަތް ދެނީ ސިޔާސީ ގޮތުން ވިސްނުމުގެ ބަދަލުގައި، ގައުމަށް ރަނގަޅު ކަންކަން ރައްޔިތުންނަށް ވިސްނައިގެން ކޮށްދިނުމަށް ކަމަށާއި އަމިއްލަ ފައިފާއަށް ނުވިސްނާ ކަމަށެވެ.

އެގޮތުން ޖަލުގައި ތިބި މީހުން ރިހިބިލިޓޭޓް ކުރުމަށް ޕްރޮގްރާމްތަކެއް ހިންގައި، އޭގެ ތެރެއިން އަހުލާގު ރަނގަޅު މީހުންނަށް އާމްދަނީ ލިބޭ ގޮތަށް ސަރުކާރު މަޝްރޫއުތަކުގައި ޝާމިލުވުމުގެ ފުރުސަތު ވެސް ދޭނެ ކަމަށް ރައީސް ވިދާޅުވިއެވެ. “އިހަށް ދުވަހު ކެބިނެޓުން ފާސްކުރީ ޖަލުގައި ތިބޭ މީހުންނަށް ވެސް ރިހެބިލިޓޭޓްވުމަށް ނޫނީ މުޖުތަމައުއަށް ފައިދާހުރި ކަންތައްތަކެއް ކޮށްދިނުމުގެ ޕްރޮގްރާމްތަކެއް ހިންގަން. ސަރުކާރުން ހިންގާ ބައެއް މަޝްރޫއުތަކުގައި އޭގެ ތެރެއިން އަހުލާގު ރަނގަޅު މީހުންނަށް އިސްކަން ދީގެން ބައިވެރި ކުރަން. މިސާލަކަށް މަގު ހެދުމުގެ މަޝްރޫރު ނޫނިއްޔާ ކޮންމެސް އެހެން މަޝްރޫއެއްގައި އޭގެތެރެއިން މީހުން ބައިވެރިކޮށްގެން ދަސްކޮށްދީ އޭގެތެރިންވެސް އިތުރު ލުއިތަށް ދީގެން ގޮސް ދެން ދޫކޮށްލަން” ރައީސް ވިދާޅުވިއެވެ.

ސިޔާސީ ވިސްނުން އިސްކޮށް ބަދަލު ހިފުމުގެ ވިސްނުގައި މަސައްކަތް ނުކުރާނެ ކަމުގެ ޔަގީން ކަން ވެސް ރައީސް މުއިއްޒު ވަނީ ދެއްވާފައެވެ.