Read Time:3 Minute, 39 Second
ފޮޓޯ ކްރެޑިޓްސް: އެޗްޑީސީ
ހުޅުމާލެ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓުތަކުގައި އިތުރު ލިފްޓް ހަރު ކުރަން ހޭދަވާނީ 18 މިލިއަން ޑޮލަރު (277 މިލިއަން ރުފިޔާ) ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މިއަދު ވިދާޅުވެއްޖެއެވެ.
ހިޔާގައި އިތުރު ލިފްޓް ހަރުކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. މި އަހަރަށް ލަފާކޮށް ރައްޔިތުންގެ މަޖިލިހުން ފާސް ކުރި ބަޖެޓުގައި ވަނީ ހިޔާ ޓަވަރުތަކުގައި އިތުރު ލިފްޓު ހަރު ކުރަން 200 މިލިއަން ރުފިޔާ ހިމަނައިފައެވެ. ކޮންމެ ޓަވަރަކަށް އިތުރު ކުރާ ދެ ލިފްޓުގެ ތެރެއިން އެއް ލިފްޓަކީ ސްޓްރެޗާ އެރުވޭ ވަރުގެ ބޮޑު ލިފްޓެކެވެ. ދެވަނަ ލިފްޓަކީ ގާތްގަނޑަކަށް 14 މީހުންގެ ކެޕޭސިޓީގެ ލިފްޓެކެވެ.
ރައްޔިތުންގެ މަޖިލިހުގެ މާލިއްޔަތު ކޮމިޓީގައި ފަޒުލް ވިދާޅުވީ، ހިޔާގެ ހުރިހާ ލިފްޓްތައް ހަރު ކުރުމުގެ ޕްރޮޖެކްޓަށް ހޭދަވަނީ 18 މިލިއަން ޑޮލަރު ކަމަށާއި، އެއީ ހިޔާ ފްލެޓްތަކުގައި އަލަށް ގާއިމް ކުރެވޭ ހުރިހާ ލިފްޓްތަކެއް ކަމަށެވެ. އެއީ 32 ލިފްޓްކަަމަށްވެސް ފަޒުލް ވިދާޅުވިއެވެ. “އާދެ ތެދު ހަބަރެއް، 18 މިލިއަން ކޮންމެވެސް ޑޮލަރު، އެއީ އެންމެ ލިފްޓެއް ނޫން، އެއީ ގާތްގަނޑަކަށް ދަންނަވާ ކަމުގައިވާ ނަމަ، ހިޔާގެ ހުރިހާ ލިފްޓްތަކެއްގެ އަގު. އެއީ 32 ލިފްޓް،”. ފަޒުލް ވިދާޅުވިއެވެ.
ލިފްޓު ހަރުކުރުމުގެ މަސައްކަތް ހަވާލުކޮށްފައިވަނީ ޗައިނާގެ ޝެންޔަންގް ޔުއާން އިންޓެލެކްޗުއަލް ގުރޫޕްއާއެވެ. ލިފްޓު ހަރުކުރުމުގެ މަސައްކަތް އެއް އަހަރު ތެރޭ ނިމޭނެ ކަމަށް އެޗްޑީސީ އިން ލަފާ ކުރާއިރު، ރައީސް މުއިއްޒުގެ އަމާޒަކީ އެއަށް ވުރެ ކުރިން މި މަސައްކަތް ނިންމާލުމެވެ.
ރައީސް މުއިއްޒު ހައުސިން މިނިސްޓަރަކަށް ހުންނެވި ދުވަސްވަރު ފެށި ހިޔާ މަޝްރޫއުގެ ދަށުން 25 ބުރީގެ 16 ޓަވަރުގެ ތެރެއިން ކޮންމެ ޓަވަރެއްގައި ހަރުކޮށްފައި ވަނީ ތިން ލިފްޓެވެ. އެއާ އެކު، ޖުމްލަ 54 ލިފްޓު ވަނީ ހަރުކޮށްފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0