މަތީ ތައުލީމުގެ ޕްރޮގްރާމްތަކުގެ އެކްރެޑިޓޭޝަން ގައިޑްލައިނަށް ބަދަލުގެނެސްފި

Read Time:4 Minute, 2 Second

މަތީ ތަޢުލީމުގެ ޕްރޮގްރާމްތަކުގެ އެކްރެޑިޓޭޝަން ގައިޑްލައިނަށް ބަދަލުގެނެސްފިއެވެ. މޯލްޑިވްސް ކޮލިފިކޭޝަންސް އޮތޯރިޓީން (އެމްކިއުއޭ) އިން ކުރި އިއުލާނެއްގައި ވިދާޅުވެފައިވަނީ 16 މޭ 2022 ގައި ޝާއިއު ކޮށްފައިވާ “ގައިޑްލައިން ފޯ ޕްރޮގްރާމް އެކްރެޑިޓޭޝަން” އަށް 2 ޑިސެންބަރު 2024 ގައި ދެވަނަ އިސްލާހެއް ގެނެސްފައިވާކަމަށެވެ.

މި އިސްލާހުގައި، ގައިޑްލައިންގެ 3.1 “އެސެސްމަންޓް އެންޑް އިވެލުއޭޝަން ޕްރޮސެސް”ގެ ދަށުން 50 އިންސައްތަ ކޮންޓްރޯލްޑް އެސެސްމަންޓްގައި ހިމެނޭ ކޮންމެ ބަޔަކުން ފާސްވުން ލާޒިމު ކޮށްފައިވެއެވެ. އަދި މިފަދަ އެސެސްމަންޓްތައް ކުރިއަށް ގެންދަންވާނީ ގައިޑްލައިންގައި ބަޔާންކޮށްފައިވާ ގޮތުގެ މަތިންނެވެ. މި ބަދަލާ ގުޅިގެން، މަތީ ތަޢުލީމުދޭ މަރުކަޒުތަކުން ކުރިން އެޕްރޫވަލް ދީފައިވާ ޕްރޮގްރާމްތަކާއި އެކްރެޑިޓޭޝަން ދީފައިވާ ޕްރޮގްރާމްތައް ކުރިއަށް ގެންދިއުމުގައި، ދިވެހި ސަރުކާރުގެ ގެޒެޓްގައި ޝާއިއުކުރާ ދުވަހުން ފެށިގެން މި ބަދަލާ އެއްގޮތަށް އަމަލުކުރުމަށް އޮތޯރިޓީން އަންގާފައިވެއެވެ.

މި ބަދަލަކީ މަތީ ތައުލީމު ދޭ މަރުކަޒުތަކާއި، ދަރިވަރުންނާއި، އާންމުންނަށް އެންގުން މުހިންމު ކަމެއްކަމަށް ބުނެ، އޮތޯރިޓީން ވަނީ މިކަން އާންމުކޮށް އަންގައި އިއުލާންކޮށްފައެވެ. އެމްކިޔުއޭގެ އެކްރެޑިޓޭޝަނާއި ޚިލާފަށް ކޯސް ހިންގާނަމަ ފިޔަވަޅު އަޅާނެ ކަމަށް އެމްކިޔުއޭ އިން ވަނީ މީގެކުރިން އަންގައިފައެވެ.

މިފަދަ ޝަކުވާތައް އެ އޮތޯރިޓީގެ [email protected] އިތުރުން މިނިސްޓްރީ އޮފް ހަޔަރ އެޑިއުކޭޝަން، ލޭބަރ އެންޑް ސްކިލް ޑިވެލޮޕްމެންޓަށް ވެސް އެ މިނިސްޓްރީގެ ފޯމް “މަތީ ތައުލީމާއި ތަމްރީނުދޭ މަރުކަޒުތަކާ ބެހޭގޮތުން ހުށަހަޅާ ޝަކުވާ ބެލުމަށް އެދޭ ފޯމް މެދުވެރިކޮށް މިނިސޓްރީގެ [email protected]އަށް ހުށަހެޅުމުގެ ފުރުސަތު ވަނީ ހުޅުވާލާފައެވެ.

ރާއްޖޭގެ މަތީތައުލީމްގެ ފެންވަރު ރަނގަޅުކޮށް، ރާއްޖޭގެ ޔުނިވާސިޓީތަކާއި ބޭރުގެ ދަރިވަރުން އައިސް ތައުލީމް އުގެނޭނެ ފެންވަރުގެ ތަންތަނަށް ހެދުމަކީ މި ސަރުކާރުގެ އަމާޒެކެވެ. އެހެންކަމުން ރާއްޖޭގައި މަތީ ތައުލީމްގެ ފެންވަރު ރަގަޅުކުރުމަށް ކުރެވެންހުރި މަސައްކަތްތައް މިނިސްޓްރީން އަންނަނީ ކުރަމުންނެވެ.