Read Time:3 Minute, 43 Second
(ފޮޓޯ ކްރެޑިޓްސް: ވަގުތު)
ޞިއްޙީ ޙާލުކޮޅު ހުރިގޮތުން ޑރ. އާއިޝަތު ރަމީލާ،ދަނޑުވެރިކަމާއި ދިރޭތަކެއްޗާ ބެހޭ ވަޒީރުގެ މަގާމުން މިއަދު އިސްތިއުފާދެއްވާފައިވާތީ، އެމަގާމަށް ބޭފުޅަކު އައްޔަނުކުރެވެންދެން އެ ވުޒާރާ ހިންގެވުން ވަގުތީގޮތުން މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރު ޑރ. މަރްޔަމް މާރިޔާ އާއި ރައީސް ޑރ. މުހައްމަދު މުއިއްޒު، ހަވާލުކުރައްވައިފިއެވެ. ޑރ. އައިޝަތު ރަމީލާގެ ސިއްހީ ހާލުކޮޅު ހުރިގޮތުން އެގްރިކަލްޗާ އެންޑް އެނިމަލް ވެލްފެއާގެ މިނިސްޓަރުގެ މަގާމުން އިސްތިއުފާ ދެއްވުމަށް ހުށަހަޅުއްވާފައިވާތީ އެކަން ރައީސް ޑރ. މުހައްމަދު މުއިއްޒު ގަބޫލްކުރައްވާފައިވާކަން ރައީސް އޮފީހުން އިއުލާން ކުރެއްވީ މިއަދެވެ.
ރަމީލާ މަގާމާ ހަވާލުވެވަޑައިގެން މިވީ އެއް އަހަރު ދުވަހުގެ ތެރޭގައި ގިނަ ކާމިޔާބީތަކެއް ވަނީ ހޯއްދަވައިފައެވެ. ރާއްޖެއަށް ޒަމާނީ ދަނޑުވެރިކަން ތައާރަފްކުރުމަށްޓަކައި ވާޓިކަލް ފާމިންގެ ޕައިލެޓް ޕްރޮޖެކްޓެއް ހިންގަން ފެށުމާއި މާލޭގައި އުޅޭ ބުޅާތަކަށް ރައްކާތެރި މާހައުލެއް ހޯދައިދިނުމަށްޓަކައި ޕެޓް ކެއާ ފެސިލިޓީއެއް ވެސް ގާއިމުކޮށްފައިވަނީ ރަމީލާގެ ބެއްލެވުމުގެ ދަށުންނެވެ. ރަށްރަށުގައި ދަނޑުވެރިކަން ކުރާ ފަރާތްތަކަށް ޒަމާނީ ދަނޑުވެރިކަމުގެ ވަސީލަތްތައް ތައާރަފުކޮށްދިނުމާއި، އާ ބާވަތްތަކުގެ ގަސްގަހާގެހި ތައާރަފުކުރުމުގެ މަސައްކަތް ވެސް ރަމީލާގެ ބެއްލެވުމުގެ ދަށުން މިނިސްޓްރީން ކުރިއަށް ގެންގޮސްފައިވެއެވެ. އޭގެ އިތުރުން، ދަނޑުވެރިންނަށް ހާއްސަ ތަމްރީނު ޕްރޮގްރާމްތައް ހިންގައި، އެފަރާތްތަކަށް ބޭނުންވާ ފަންނީ އެހީތެރިކަމާއި ލޯން ވެސް ފޯރުކޮށްދީފައިވެއެވެ.
ވަޒީރުކަމަށް އައްޔަން ކުރެއްވުމުގެ ކުރިން ރަމީލާ ވަނީ ހެލްތު މިނިސްޓްރީގެ ސްޓޭޓް މިނިސްޓަރުކަން ވެސް ކުރައްވާފައެވެ. އަދި ޖެންޑާ މިނިސްޓްރީގެ ސްޓޭޓް މިނިސްޓަރުކަން ވެސް އޭނާ ކުރެއްވިއެވެ. މީގެ ކުރިން އޭނާ ވަނީ އެވިޑް ކޮލެޖްގެ ޑީންގެ މަގާމު ވެސް ފުރުއްވައިފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0